ABŞ-nin Klivlend şəhərində may ayının ilk iki həftəsində 30-a yaxın uşaq itkin düşüb.

Bu barədə ABŞ polis rəsmiləri məlumat veriblər.

Həmçinin bölgədə bununla bağlı həyəcan təbili çalınıb.

Polis rəisi Con Majoy bildirib ki, mayın 2-dən 16-a qədər ən azı 27 uşaq itkin düşüb. O qeyd edib ki, 2023-cü ildə 12-17 yaşlı uşaqların yoxa çıxması göstəriciləri görünməmiş səviyyəyə çatıb.

“Nədənsə 2023-cü ildə həmişə olduğundan daha çox itkin düşmə halı qeydə alınıb ki, bu da bir qədər narahatedicidir. Çünki bu uşaqların başlarına nə gəldiyini bilmirik - insan alveri qurbanı ola və ya müəyyən qruplaşmalar tərəfindən oğurlana, narkotik məsələlərinə qarışa bilərlər ki, bu barədə məlumatımız yoxdur.

May ayının ortalarına olan məlumata görə isə, Klivlenddə ümumilikdə 56 aktiv itkin uşaq hadisəsi qeydə alınıb.

Majoy vurğulayıb ki, 33 illik karyerası ərzində heç vaxt bu qədər çox sayda uşağın itdiyinə şahid olmayıb. “Bu, burnumuzun dibində törədilən səssiz cinayətdir”, - deyə o qeyd edib.

Majoy əlavə edib ki, gənclər çarəsiz qaldıqları zaman özlərini vəziyyətdən çıxarmaq üçün avtomobil oğurluğu və soyğunçuluqla məşğul olan dəstələrə qoşula, bədənlərini sata və ya narkotik vasitələrdən istifadə edə bilirlər.

Klivlend və Ohayo ştatının şimalındakı digər bölgələrdə artan yoxaçıxma halları ilə mübarizə aparmaq üçün ABŞ Hüquq-Mühafizə Xidməti may ayında “Sizi tapacağıq” əməliyyatına başlayıb.