Ukraynaya Rusiyaya dərin zərbələr endirmək üçün Qərb müttəfiqlərinin uzaqmənzilli silahlarından istifadə etməyə icazə verilə bilər. 

Qaynarinfo "The Times"a istinadən xəbər verir ki, bu, Rusiya aviabazalarına, sursat anbarlarına və digər hədəflərə zərbələr endirməyə imkan verəcək.

Ukrayna ilə bağlı məhdudiyyətlər aradan qaldırılarsa, Rusiya öz təyyarələrini cəbhədən daha da irəli aparmalı olacaq. Kütləvi informasiya vasitələrinin yazdığına görə, Ukrayna hərbçilərinin əsas vəzifələrindən biri ölkə ərazisinə idarə olunan aviabomba və FAB (partlayıcı aviasiya bombası) atmaq üçün istifadə olunan SU-34 və SU-35-ləri oradan uzaqlaşdırmaqdır. Bu, Rusiya təyyarələrinin uçuş sayını məhdudlaşdıracaq.

"Siyasət dəyişikliyi bizə Rusiyanın zərbələrinin qarşısını almağa və lazımi çəkindirməni yaratmağa imkan verəcək. Bütün bunlar bizi müharibənin sonuna yaxınlaşdırır", deyə Ukarayna hərbi rəsmisi nəşrə bildirib.

Britaniyanın "Storm Shadow" raketləri (ixrac limiti 250 km-ə qədər) və Amerikanın ATACMS ballistik raketləri (300 km) əvvəllər Ukraynaya ötürülüb. Bununla belə, ABŞ-ın eskalasiya qorxusu səbəbindən Rusiyanın dərinliklərinə zərbələr endirmək hələ də qadağandır. Jurnalistlərin fikrincə, məhdudiyyətlər İranın "Fəth-360" ballistik raketlərinin Rusiyaya ötürülməsini təsdiqlədikdən sonra aradan qaldırıla bilər.

Kütləvi informasiya vasitələri bu siyasi qərarın uzaqmənzilli raketlərin kifayət qədər olmaması səbəbindən müharibənin gedişatını əsaslı şəkildə dəyişməyəcəyini vurğulayıb. Almaniya hələ də eskalasiya qorxusundan "Taurus" raketlərini Ukraynaya verməkdən imtina edir. Onlar 600 ədəd istehsal edilib, onlardan yalnız yarısı işlək vəziyyətdədir.

Qəzet qeyd edir ki, Ukraynanın Rusiyanın dərinliklərində uzaqmənzilli silahlarla zərbə endirməsinə imkan verən ən böyük təhlükə Putinin mümkün müvafiq reaksiyası və onun Ukrayna daxilində taktiki nüvə silahından istifadə edə biləcəyi qorxusudur, bu da NATO üçün qırmızı xətt hesab olunur.

Gundemxeber.az