Ukraynanın Rusiyanın işğalı altında olan Donetsk bölgəsində
avtomobilə quraşdırılmış bombanın partlaması nəticəsində həbsxana rəisinin həlak olduğu bildirilir. Serqey Yevsyukov 2022-ci ildə Rusiya qüvvələri tərəfindən əsir götürlən onlarla ukraynalı əsgərin öldürüldüyü həbsxana rəisidir.

Sosial şəbəkələrdə yayılan təsdiqlənməmiş məlumatlara görə, hadisə dekabrın 9-da Rusiyanın işğalı altında olan Olenivka şəhərində baş verib. Avtombildə Yevsyukovun həyat yoldaşı da olub.

Məlumatda bildirilir ki, Yevsyukov hadisə yerində ölüb, həyat yoldaşı isə ağır yaralarla xəstəxanaya aparılıb.

Partlayışa görə heç kim məsuliyyəti öz üzərinə götürməyib.

2022-ci ilin iyulunda Olenivka həbsxanasında saxlanılan 50-dən çox ukraynalı əsgərin raket zərbəsi nəticəsində öldürülməsi zamanı Yevsyukov orada nəzarətçi olub. Partlayış nəticəsində 150 nəfər yaralanıb.

Rusiya Kyivi həbsxananı ABŞ-ın verdiyi HIMARS raketləri ilə vuraraq rus əsirliyində olan öz əsgərlərini öldürməkdə ittiham edib. Ukrayna Rusiyanın iddialarını rədd edərək, Moskvanın ölümcül hücuma görə məsuliyyət daşıdığını təkid edib.

BMT ekspertləri araşdırma aparıblar və sonradan hücumda HIMARS-ın istifadəsi ilə bağlı Rusiyanın versiyasını rədd ediblər. 2024-cü ilin iyulunda çıxan hesabatda Rusiya ukraynalı hərbi əsirləri “acınacaqlı həbsxana şəraitində” saxlamaqda günahlandırılıb.

2023-cü ildə Ukrayna hakimiyyəti Yevsyukovu cəzaçəkmə müəssisəsində saxlanılan “Ukrayna əsgərlərinə kütləvi işgəncə verməkdə” qiyabi ittiham edib.

Digər tərəfdəb bu ilin iyulunda Ukrayna Yevsyukovu əsir götürülmüş ukraynalı əsgərlərə vaxtında tibbi yardım göstərməməkdə ittiham edib.

Keçmiş Ukrayna polisi Yevsyukov 2014-cü ildə Donetsk vilayətində Ukrayna əsgərlərinə qarşı döyüşən Rusiyanın dəstəklədiyi separatçı qüvvələrə qoşulub.

Gundemxeber.az