ABŞ-nin baş prokuroru Pem Bondi Federal Təhqiqat Bürosunu (FTB) amerikalı biznesmen Ceffri Epşteynin işi ilə bağlı minlərlə səhifə sənədi gizlətməkdə ittiham edib.

Gundemxeber.az-ın xarici mediaya istinadla verdiyi məlumata görə, bununla bağlı Bondi FTB direktoru Keş Patelə məktub ünvanlayıb.

Bildirilib ki, 200 səhifə istisna olmaqla, bütün sənədlər hələ də büronun Nyu-Yorkdakı ofisində gizli saxlanılır. Onun sözlərinə görə, fevralın 26-da FTB-dən olan bir mənbə ona işlə bağlı əlavə məlumatların mövcudluğu barədə xəbər verib. Baş prokuror bu məlumatların fevralın 28-dək ona təqdim edilməsini tələb edib.

"Fevralın 28-dək FTB mənim ofisimə Epşteynin tam və əhatəli dosyesini, o cümlədən bütün qeydləri, sənədləri, audio və videoyazıları, həmçinin onun və müştəriləri ilə bağlı materialları, bu məlumatların necə əldə olunmasından asılı olmayaraq, təhvil verməlidir", - deyə Bondi vurğulayıb.

O dəqiqləşdirib ki, ilkin paketdə yalnız uçuş jurnalları, qurbanların adları və telefon nömrələri yer alıb.

Qeyd edək ki, amerikalı maliyyəçi və biznesmen Ceffri Epşteyn cinsi cinayətlərə görə dünya miqyasında səs-küyə səbəb olub. 2005-ci ildə ona qarşı yetkinlik yaşına çatmayan qızlara qarşı cinsi istismar və insan alveri ilə bağlı ittihamlar irəli sürülüb. 2008-ci ildə o, istintaqla sövdələşməyə gedib və yüngül cəza alıb - cəmi 13 ay həbsxanada yatıb və bu müddətin çox hissəsində xüsusi şərtlərlə azadlıqda olub. 2019-cu ildə Epşteyn yenidən həbs olunub və bu dəfə federal səviyyədə insan alveri ilə bağlı daha ciddi ittihamlarla üzləşib. Onun işində çoxsaylı məşhur siyasətçi, iş adamı və digər nüfuzlu şəxslərlə əlaqələri üzə çıxıb. 2019-cu il avqustun 10-da, məhkəmə prosesi gözlənərkən, Epşteyn Nyu-Yorkdakı həbsxanada ölüb. Məhkəmə-tibb ekspertizasının nəticələrinə görə, ölümün səbəbi intihar olub.

Gundemxeber.az