"Əgər NATO ölkələri ABŞ-nin təzyiqi altında Rusiya neftini almaq bəhanəsi ilə Xalq Respublikasına qarşı rüsumlar tətbiq etməyə çalışarsa, Çin qətiyyətli cavab tədbirləri görəcək".

Gundemxeber.az-ın xarici mediaya istinadən xəbərinə görə, bu sözləri Çin Xalq Respublikasının Xarici İşlər Nazirliyinin rəsmi nümayəndəsi Lin Tszyan brifinqdə çıxışı zamanı G7 və NATO ölkələrinin Rusiya neftinin idxalına görə Çinə rüsum tətbiq etmə ehtimalını şərh edərkən deyib.

"Çinin dünya ölkələri, o cümlədən Rusiya ilə normal ticarət-iqtisadi və enerji sahəsində əməkdaşlığı qanunidir və heç bir şikayət yaratmır. Çinin qanuni hüquq və maraqlarının pozulması halında o, qətiyyətlə əks tədbirlər görəcək, biz suverenliyimizi, təhlükəsizliyimizi və inkişaf maraqlarımızı qətiyyətlə qoruyacağıq", - deyə o vurğulayıb.

Çin diplomatının qeyd etdiyi kimi, Avropa İttifaqına təzyiq etməyə çalışan ABŞ-nin hərəkətləri "birtərəfli hədə-qorxu və iqtisadi məcburiyyətin tipik nümunəsidir". O vurğulayıb ki, Vaşinqton bununla beynəlxalq ticarət qaydalarını ciddi şəkildə pozur və qlobal istehsal-təchizat zəncirlərinin təhlükəsizliyini və sabitliyini təhdid edir.

"Faktlar sübut etdi ki, məcburiyyət və təzyiq populyar deyil və problemləri həll etmir", - deyə Lin Tszyan əlavə edib.

Rəsmi nümayəndə xatırladıb ki, Çinin Ukrayna münaqişəsi ilə bağlı mövqeyi dəyişməz və birmənalı olaraq qalır: Pekin hesab edir ki, dialoq və danışıqlar böhranı həll etmək üçün yeganə əlverişli yoldur.

"Böhranın əvvəlindən Çin obyektiv və qərəzsiz mövqe nümayiş etdirərək, israrla barışıq və dialoqun tərəfdarı olub. Biz bəzi tərəflərin öz arqumentlərində daim Çinə istinad etməsinə qəti şəkildə qarşıyıq və ölkəmizə qarşı tətbiq edilən qeyri-qanuni birtərəfli sanksiyaların və ekstraterritorial yurisdiksiyanın heç bir fərq qoyulmadan tətbiqinə qəti etirazımızı bildiririk", - deyə o əlavə edib.

Xatırladaq ki, daha əvvəl ABŞ Prezidenti Donald Tramp Avropanın Rusiyaya qarşı sanksiyalarının "kifayət qədər sərt olmadığını" bildirmişdi. O, NATO ölkələri birgə şəkildə Rusiyadan neft alınmasını dayandırarsa, "effektiv" anti-Rusiya məhdudiyyətləri tətbiq etməyə hazır olduğunu ifadə etmişdi, həmçinin alyans üzvlərinə Çindən idxala 50-100% rüsum tətbiq etməyi də təklif etmişdi.

Gundemxeber.az