gundemxeber.az - Məlum olduğu kimi dünən “Bakı 2015 Avropa Oyunları” Əməliyyat Komitəsi “Coca-Cola” şirkətinin yayda keçiriləcək ilk Avropa Oyunlarının rəsmi tərəfdaşı olmasına dair müqaviləyə imza atıb. Müqaviləyə görə, “Bakı 2015”in brendi şirkətin bütün Azərbaycan ərazisindəki “Coca-Cola” və “Bonaqua” içkilərinin etiketləri üzərində əks olunacaq.

“Coca-Cola” şirkəti xüsusi olaraq “Bakı 2015 Avropa Oyunları” üçün məhdud sayda məhsulların qablaşdırılmasını həyata keçirəcək və oyunlarla bağlı məlumatlılığı artırmağa kömək edən kompleks marketinq kampaniyasına başlayacaq.

Gənclər və idman naziri və “Bakı 2015 Avropa Oyunları” Əməliyyat Komitəsinin baş icraçı Azad Rəhimov isə bu anlaşmadan məmnun qalaraq deyib: “Beynəlxalq aləmdə tanınması və mühüm beynəlxalq idman yarışlarına hər zaman dəstək olmasını nəzərə alaraq “Coca-Cola” brendini “Bakı 2015 Avropa Oyunları” üçün mükəmməl tərəfdaş hesab edirik”.

gundemxeber.az bildirir ki, bu anlaşmadan məmnun qalmayan təkcə Azərbaycandakı «Soca Cola» müştəriləridir. Hər halda görünəni odur ki, «Coca Cola»nın rəhbərliyi «Bakı 2015 Avropa Oyunları»nı sponsorluq edə bilməsi üçün ciddi xərcə düşəcək. Və ən maraqlısı da odur ki, şirkət bu xərcləri satışa buraxdığı məhsullarının qiymətini artırmaqla kompensasiya etməyi planlayıb.

Artıq bu barədə şirkət tərəfindən rəsmi şəkildə elan da verilib.

Bu da “AZƏRBAYCAN COCA-COLA BOTTLERS MMC” şirkətinin qiymət dəyişikliyi ilə əlaqədar elan etdiyi yeni rəqəmləri:

24 Yanvar 2015-ci il tarixindən aşağıdakı siyahıda adları göstərilmiş məhsullarımızda satış qiyməti artırılacaqdır.

Qiymətlər mərhələli şəkildə:
0,5 lt plastik qabda qablaşdırılan "Cappy" içkisinin tövsiyyə olunan satış qiyməti 60 qəpikdən 70 qəpiyə
0,5 lt plastik qabda qablaşdırılan "Fuse tea" içkisinin tövsiyyə olunan satış qiyməti 60 qəpikdən 70 qəpiyə
0,5 lt plastik qabda qablaşdırılan "Burn" içkisinin tövsiyyə olunan satış qiyməti 1 manat 90 qəpikdən 2 manat 10 qəpiyə
0,5 lt plastik qabda qablaşdırılan "Bonaqua" (qazlı və qazsız) içkisinin tövsiyyə olunan satış qiyməti 20 qəpikdən 25 qəpiyə
2 lt plastik qabda qablaşdırılan "Bonaqua" (qazlı və qazsız) içkisinin tövsiyyə olunan satış qiyməti 50 qəpikdən 60 qəpiyə
5 lt plastik qabda qablaşdırılan "Bonaqua" (qazsız) içkisinin tövsiyyə olunan satış qiyməti 1 manat 10 qəpikdən 1 manat 30 qəpiyə artırılacaqdır.

Bəli, dəyərli oxucular. «Coca Cola» əslində hansısa faydalı işlə məşğul deyil. Əlinə özünü reklam üçün gözəl bir fürsət düşüb. Və bu fürsətdən də ustalıqla yararlanır. Belə anlaşılır ki, məhz bu səbəbdən rəsmilərimiz də «Coca Cola»nın qiymətini artırmasını sükutla qarşılayır…