Müstəqillik dövrümüzdə Azərbaycan televiziyalarının Rəmişlə bağlı yanaşmaları da, müəyyən mənada ittiham olunası haldır.

Çünki, unutduqca gələcək nəsllər də unudulmaya məhkum olunacaqlar. Odur ki, gəlin unutmayaq və bu günümüzü, gələcəyimizi birlikdə yaşatmağa çalışaq

0 Sovet qurluşunun süqutu və onun əvəzində yeni siyasi sistemin bərqərar olmasının nəticəsi o oldu ki, hər sahədə olduğu kimi Azərbaycan mədəniyyətində, elmində, ədəbiyyatında və digər sahələrində, əsaslı dəyişikliklərin baş verməsi prosesi də özünü göstərdi. İnsanların düşüncə tərzində isə, sanki yeni çalarlar da əmələ gəlməyə başladı. Bəs ötən illər ərzində dəyişən nə oldu və dəyişdirilən nələr oldu? Ümumi şəkildə götürdükdə onu müəyyən etmək olur ki, dəyişən zəmanə olsa da, dəyişdirilən çox şeylər oldu.

0 Hal-hazırda toxunacağımız problemin varlığı da, dəyişən zəmanədə dəyişdirilənlərin günahı ucbatından yaşananlardır. Yəqin ki, bu gün təkcə Azərbaycanın geniş ictimaiyyəti deyil, hətta xarici ölkə vətəndaşlarının çoxu da, Hüseynov Rafiq (daha çox Rəmiş adı ilə tanınan) Hüseyn oğlu barədə xeyli məlumatlara malikdirlər. Çünki, bu şəxs təkcə sovet dönəmində deyil, hətta müstəqillik əldə etdiyimiz illərdən indiyə kimi də, xalqımızın milli musiqi alətlərindən birinə çevrilən gitaramızın əlçatmaz zirvəsi hesab olunur. Əbəs yerə deyil ki, daha böyük bir çevrə Rəmiş adı ilə məşhurlaşan bu dahi sənətkarı, “gitaramızın banisi” hesab etməkdən belə çəkinmirlər və onu böyül el sənətkarı da adlandırırlar. Çünki, onun qabiliyyətinə, fitri istedadına daha yaxından bələd olan hər kəs, Rəmişi xx-xı-ci əsr gitara sənətinin yaşadılmasında əvəzsiz xidməti olan sənətkar adlandırırlar.
0 Bəs bu gün 72 yaşında olan gitaraçı sənətkarın maddi durumu necədir, onun ötən illər ərzindəki əməyi dövlətimizin müvafiq qurumları tərəfindən necə qiymətləndirilir, yaxud da qiymətləndirilirmi? Belə bir səbəblər üzündən də, bir neçə gün bundan əvvəl bir növ unudulan bu dahi sənətkarla görüşməyi, onunla bağlı bəzi açıqlamaları geniş ictimaiyyətin diqqətinə çatdırmağı, sanki özümüzə bir borc da bildik. Ümumi söhbət zamanı o da bəlli oldu ki, tam əksəriyyətin Rəmiş adı ilə tanıdığı gitaraçı sənətkar, Azərbaycan Respublikası Prezidentinin 17 sentyabr 2008-ci il tarixli sərəncamı ilə “Əməkdar artist” fəxri adına layiq görülür. O, layiq olduğu belə bir fəxri ada görə ilk əvvəl dövlətdən 30 manat, bir müddət keçdikdən sonra isə 60 manat fərdi təqaüd alır. Ölkə rəhbərinin 18 dekabr 2014-cü il tarixli digər sərəncamı ilə, ona “Xalq artisti” fəxri adı da verilir. Rəmiş verilmiş bu fəxri ada görə isə, hal-hazırda dövlətdən cəmi 100 manat fərdi təqaüd almaqdadır.
0 O, bizimlə söhbətində bəzi məsələlərlə bağlı müəyyən giley-guzarını bildirsə də, amma ölkə rəhbəri cənab İlham Əliyevə minnətdarlıq etməyini, heç cür unutmadı. Çünki, o, vurğuladı ki, “yaşadığımız mənzil 2009-cu ildə möhtərəm Prezidentimiz tərəfindən mənə hədiyyə olunub. Əgər bu mənzil mənə verilməsəydi, o halda ümumi vəziyyətim olduqca çətin olardı. Odur ki, hər zaman ölkə rəhbərinə minnətdar olduğumu bildirirəm. O, çətin vəziyyətimdə məni unutmadı, atdığı addımı ilə, sanki mənə dayaq da oldu” deyir.
0 Onu da vurğulayaq ki, ölkə rəhbərinin diqqətdə saxladığı bu dahi sənətkar, təqribən on ildir ki, asma-bronxit xəstəliyindən əziyyət çəkir. Onun bu gün ümumi durumu olduqca ağır vəziyyətdədir və ciddi şəkildə müalicəyə də ehtiyacı var. Amma, maddi imkansızlığı ona müalicəsini davam etdirməyə heç cür imkan vermir. Çünki, bugünkü gitara sənətimizin korifeyi hesab olunan Rəmiş, hal-hazırda dövlətin verdiyi 100 manata möhtac qalıb. Adicə səhhətindəki probleminin müalicəsi ilə bağlı aldığı dərmanın biri 45-50 manatdır. Bu belə olduğu halda o, 100 manat təqaüdlə müalicəsini necə həyata keçirə bilər? Axı, 1966-cı ildən “Azərbaycan Televiziya və Radio Verlişləri” QSC-nin solisti olan bu şəxs, həmişə dövləti maraqlardan çıxış edən sənətkarlarımızdan olub və ötən illər ərzində də, heç bir təmənna belə güdmədən “N” saylı hərbi hissələrdə, Bilgəh qəsəbəsindəki “Qocalar evi”ndə, bir çox internat məktəblərində və.s konsert proqramları vermiş, vaxtilə çoxsaylı xeyriyyə tədbirləri də həyata keçirmişdir. İndi səhhətində ciddi problemləri olan belə bir sənətkarı unutmaq olarmı? Axı, o, bu gün də gitaramızın korifeyi adlanır. Görəsən bu gün hansısa addımı atmaqla, başqa bir Rəmişi yetişdirmək olarmı? Bax bu haqda düşünmək, bir qədər də götür-qoy etmək lazımdır. Çünki belə bir sənətkarı itirsək, yəqin ki, gitara sənətimiz ağır günlərini də yaşayacaq.
0 Bəli, bu gün gitara deyəndə hər kəs Rəmişi, Rəmiş deyəndə gitaranı başa düşür. Bu qədər ictimai nüfuzu olan, vaxtilə rusların, ispanların əlindən gitaranı alıb özmüzünküləşdirən, gitara musiqi alətinin korifeyi hesab olunan dahi sənətkar, görəsən bu gün niyə fərdi prezident təqaüdünə layiq görülmür, yoxsa haqqımı çatmır? Axı, onun belə bir təqaüdə ehtiyacı var!. Sadəcə olaraq düşünürük ki, Mədəniyyət və Turuzm Nazirliyi onunla bağlı yanaşmada, sanki unutqanlıq nümayiş etdirməkdədir. Bu da heç cür yolverilməz haldır. Çünki, cənab Prezident 2009-cu ildə Rəmişə mənzil hədiyyə etməklə bir daha ehyam etdi ki, bu cür sənətkarı heç cür unutmaq olmaz. Çünki unudulan sənətkarların aqibəti, çox zaman acı sonluqla da nəticələnib. Məsələn, Azərbaycan rəssamlıq sənətinin görkəmli nümayəndəsi, Azərbaycan Respublikası Prezidentinin fərdi təqaüdçüsü Toğrul Fərman oğlu Nərimanbəyov da bir növ unuduldu və o, ömrünün 83-cü ilində Fransada dünyasını dəyişdi.
0 Ümumi şəkildə desək, bu cür unutqanlıq, heç də yaxşı hal deyil. Çünki, unutduqca gələcək nəsllər də unudulmaya məhkum olunacaqlar. Odur ki, gəlin unutmayaq və bu günümüzü, gələcəyimizi birlikdə yaşatmağa çalışaq. Məhz ona görə ki, bir çox sənətkarlarımız, o cümlədən Rəmiş adı ilə tanınan məşhur gitaraçı sənətkar da, xalqımızın fəxridir, bugünkü tariximizdir, gələcəyimizdir.
0 Müstəqillik dövrümüzdə Azərbaycan televiziyalarının Rəmişlə bağlı yanaşmaları da, müəyyən mənada ittiham olunası haldır. Çünki, sovet dönəmində tez-tez televiziya ekranlarına dəvət olunan bu böyük sənətkar, hal-hazırda televiziya bolluğunun olduğu bir zamanda isə, nadir hallarda ekranlarda görünür. Bu da o deməkdir ki, onun unudulması istiqamətində televiziya kanallarının da müəyyən mənada rollları olur.
0 Belə bir səbəblər üzündən də, biz bu gün hesab edirik ki, Mədəniyyət və Turizm Nazirliyi tərəfindən Rəmişlə bağlı unutqanlıq qısa zaman kəsiyində aradan qaldırılacaq və ona da fərdi prezident təqaüdünün verilməsi üçün, əməli addımlar da atılacaq.
Mövzunu diqqətdə saxlayacağıq.

Mirzə
gundemxeber.az