Paytaxt Bakımız nə qədər gözəgəlimli olsa da, bəzi problemlərin varlığı müəyyən fəsadların əmələ gəlməsinə səbəb olur desək, yəqin ki, yanılmarıq. Problemlər içərisində tam əksəriyyətin üz-üzə qaldığı sosial məsələlər, məişət problemləri, vətəndaş hüquq və azadlığı, digər amillərin varlığı diqqəti cəlb etsə də, elə problemlər var ki, onların əmələ gətirdiyi fəsadlar bir qədər nəzər-diqqətdən kənarda qalır.

Məsələn, toxunacağım problemin varlığı ilə yəqin ki, tam əksəriyyət gündəlik üz-üzə gəlir. Amma, problemin varlığı, əmələ gətirdiyi fəsadların mahiyyəti ilə, bəlkə də bir kimsə maraqlanmır, bir kimsə bu yöndə düşünmür. Nədir bu problemin varlığı, nədir onun əmələ gətirdiyi fəsadların mahiyyəti?

Elə bu səbəbdən də, hər gün üzləşdiyimiz və əksəriyyətə də birbaşa təsir edən problemin mahiyyətinə toxunmağı qərara aldım. Əvvəla qeyd edim ki, bu gün paytaxt Bakımızın dəyişən siması, əmələ gətirdiyi gözəlliyin olduğu bir məkanda, bir kimsənin dilənçiliklə məşğul olması məqsədəuyğun hal deyil. Amma, təəssüflər olsun ki, bu gün əhalinin daha çox gəlib-keçdiyi yerlərdə, yarmarkalarda, mərkəzi küçələrdə və digər ünvanlarda dilənçiliklə məşğul olanların sayı, olduqca çoxluq təşkil edir.

Düzdür, dilənçiliklə məşğul olmaq, bu yolla əldə olunan gəlirlə yaşayışı təmin etmək, kimlərinsə həyat tərzinə çevrilib. Çünki, bu peşəni yaşadanlar o qədər də anlamırlar ki, dilənçilk dövlət, xalq adına utanc gətirən addımdır. Axı, onla necə anlasınlar ki, Azərbaycana gələn əcnəbilər dilənçilərin sayca çox olduğunu görəcəklər, dövlətimiz üçün fərqli düşüncəyə dalacaqlar, xalqımız haqda fərqli fikirlər söyləyəcəklər.

Bütün bunlar qalsın bir yana, daha çox yeraltı keçidlərdə, tunellərdə və.s yerlərdə, şikəst insanların dilənçiliklə məşğul olmaları isə, birbaşa ötüb-keçənlərin səhhətinə ciddi təsir edən səbəblərdəndir. Məsələn, bir kimsə yeraltı keçidi keçərkən

dilənçilik edənin ayağının, qolunun, yaxud da orqanizminin digər hissəsinin olmadığını gödükdə, bir anlığa olsa da stress keçirir, əhval-ruhiyyəsi dəyişir. Çünki, üzləşdiyi mənzərəyə hazır olmayan, fikir və düşüncələrini başqa problemlər üzərində kökləyən şəxs, üz-üzə qalacağı mənzərəni görərdükdə daxilən sınır. Düşüncələrini problemləri üzərində deyil, üz-üzə qaldığı mənzərəyə yönəltməyə məcbur olur. Bir anlığa fikir verək, tutaq ki, hansısa yeraltı keçiddən ailə başçısı azyaşlı uşaqları ilə keçir. Qəflətən qolunun biri olmayan və kəsilmiş hissəsi açıq şəkildə görünən dilənçinin “mənə kömək edin” deməsi, ailə başçısı qalsın bir yana, azyaşlı uşaqlara necə təsir edəcək? Bax bu haqda düşünmək lazımdır ki, problemin varlığını birlikdə aradan qaldıra bilək.

Yəqin ki, problemin əmələ gətirdiyi fəsadların acı nəticələrini kim bilməsə də, tibbi mütəxəssislərimiz kifayət qədər anlayar. O halda hər kəs dərk etməlidir ki, qolu, ayağı olmayan bir kimsənin dilənçilik etməsi, kimlərinsə yeni bir problemlə üz-üzə qalmasına da səbəb olur. Odur ki, bu kimi problemin həllində adi vətəndaş yox, dövlət qurumları həssas olmalı və qabaqlayıcı tədbir də görməlidir.

Kamal