İcra başçısı bina yanğınında niyə “yanmadı” ? - Təfsilat

Xaləddin İsgəndərov “günah keçisi” taparaq məsuliyyətdən yayına bildi; onu son anda “ip”dən kimlərin alması haqda şok iddialar “Gündəm-xəbər”də...

Paytaxtın Binəqədi rayon icra başçısı məlum yanğında “yanmadı”. Xaləddin İsgəndərov “günah keçisi” taparaq məsuliyyətdən yayına bildi. “Gündəm-xəbər”in məlumatına görə, Binəqədidə yanan binaq faciəsindən bir il ötür və icra başçısına bu məsuliyyətsiz qərarına görə heç bir cəza tətbiq olunmadı .

İyulun 19-da Bakı Ağır Cinayətlər Məhkəməsində son illər Azərbaycan tarixinin ən məşum olayı - ötən il mayın 19-da Binəqədi rayonunda yerləşən 16 mərtəbəli binada baş vermiş yanğınla bağlı məhkəmə prosesi davam etdirildi. Yanğın hadisəsi ilə bağlı 8 nəfər təqsirləndirilir.

Bunlar 2012-2013-cü illərdə Binəqədi Rayon Mənzil-Kommunal Təsərrüfat Birliyinin rəisi işləmiş, daha sonra Binəqədi Rayon İcra Hakimiyyətinin təsərrüfat şöbəsinin müdiri olmuş Ədalət Rəcəbov, 72 saylı Mənzil-Kommunal İstismar Sahəsinin rəisi Nizami Orucovdur.

Həmçinin, 2012-2013-cü illərdə Binəqədi rayon İcra Hakimiyyəti başçısının birinci müavini olmuş Qəzənfər Novruzov, “Dərnəgül Boru” zavodunun polimlərin kimyəvi, fiziki-mexaniki xassələrin təyini laboratoriyasının rəhbəri Ağacavad Məmmədovdur.

Habelə, Səhiyyə Nazirliyi yanında Gigiyena və Epidemiologiya Mərkəzinin baş direktoru Akif Əlibəyov, “Global Stone” şirkətinin rəhbəri, əməkdar mühəndis Miryusif Mahmudov, “Global Stone” MMC-nin baş direktoru Uğur Bəşirov və “Global Construction” MMC-nin sədr müavini Ələkbər Əsgərovdur.

Təqsirləndirilən şəxslərə qarşı Cinayət Məcəlləsinin 225.2-ci (ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma) və 308.2-ci (vəzifə səlahiyyətlərindən sui-istifadə, ağır nəticələrə səbəb olduqda) maddələri ilə ittiham irəli sürülüb. Həbsdə olan şəxslər iş icraçılarıdır.

“Gündəm-xəbər”in əldə etdiyi məlumata görə, işi sifariş verən isə Binəqədi Rayon İcra Hakimiyyətinin başçısıdır. Məntiqlə istintaq təqsirləndirilən şəxslərin siyahısını müəyyənləşdirərkən ilk dindirməli, istintaqa cəlb edilməli şəxs kimi məhz icra başçısının adını yazmalı idi.

Təqdim etdiyimiz təqsirləndirilən şəxslərin siyahısından göründüyü kimi, icra başçısı Xaləddin İsgəndərovun adı orada yoxdur. Ümumiyyətlə, X.İsgəndərovun adı olsaydı belə, bu şəxslər istintaqa cəlb edilməzdən əvvəl binanın qəsdən yandırılması haqda məlumatlar çox ciddi şəkildə araşdırılmalı idi.

Prezident İlham Əliyev yanğın hadisəsinin baş verməsində təqsirli bilinən şəxslər barədə cinayət işinin qaldırıldığını və onların ciddi şəkildə cəzalandırılacağını demişdi: "Əgər bütün işlər düzgün qurulsaydı, bu hadisə baş verməzdi. Azərbaycan vətəndaşları bilməlidir ki, günahkar və günahkarlar kimdir? Bu hadisəyə görə kim məsuliyyət daşıyacaq?..”

Baş verən yanğından sonra Xaləddin İsgəndərov heç nə olmayıbmış kimi insanların qarşısına çıxdı. Hətta onu ittiham edən bir vətəndaşı sakitləşdirmək cəhdləri belə uğursuz alındı.

Sakinlərə verdiyi sözün tutulması isə Xaləddin İsgəndərovla onların arasındakı uçurumu daha da dərinləşdirdi. Sakinlər bəyan edirlər ki, yanan binaya görə həbs olunan Nizami adlı jek müdirini buralarda heç vaxt görməyiblər.

Əslində Xaləddin İsgəndərovun rayona gəlişi ilə Binəqədidə canlanma müşahidə olundu, Prezidentin “məmur vətəndaşın ayağına getməlidir” çağırışına yüzdə-yüz əməl olundu... Bu proses təkcə Binəqədidə deyil, bütün Azərbaycanda gedirdi.

Və bu binəqədili kütləni - vətəndaşı sevindirirdi. Rayonun Biləcəri, Xocasən, Binəqədi və digər böyük yaşayış məntəqələrində vətəndaş İcra başçısı görürdü.

Hərdən də Alı Qocayevin tör-töküntülərini (keçmiş başçının dövründən qalan məmurları) yerli-yersiz tənqid edir, vətəndaşın qarşısında alçaldır, sanki bundan zövq alırdı. İlk günlər hər şey qaydasında idi: quruculuq və abadlıq yüksək səviyyədə idi, küçələr ot-alaqdan təmizlənir, əvvəlki başçı Alı Qocayevin “miras” qoyduğu zibil dağları “yarılırdı”.

Hətta Binəqədidə keçirdiyi ilk iclaslarını daşınan zibillərə həsr edən Xaləddin İsgəndərovun “onların sayı 400-500 və ya 700-800 kamazdan da çox idi” deməsinə təəccüblənənlərdə az deyildi.

Məlumatda deyilir ki, yanğının Avropa Oyunlarının açılışı ərəfəsinə təsadüf etməsi iqtidardakı qərar mərkəzlərini hədsiz qəzəbləndirib və mayın 20-də X.İsgəndərovun həbsinə qərar verilib. İcra başçını həbs edəcək qrup hərəkətə keçib.

X.İsgəndərov həbsinə qərar verildiyindən xəbərdar olub və kabinetində həyəcanla gözləyib. Binəqədi İcra Hakimiyyətinə çatan əməliyyat qrupu hərəkətə keçmək istəyərkən onlara "bir qədər gözləmək” göstərişi gəlib. Dəqiqələr sonra X.İsgəndərov üçün gələn maşınlar geri qayıdıb. Bəs nə baş verib ki, X.İsgəndərov həbsdən canını qurtarıb?

Mənbənin iddiasına görə, məsələyə ən son anda onu himayə edən nazir özü qarışıb. Nazir bu həbsin onun karyerasına da nöqtə qoyacağını söyləyərək siyasi rəhbərlikdən yaxın qohumu olan X.İsgəndərov üçün əfv diləyib, üstəlik, tezliklə "icra başçısının bütün səhvlərini” düzəldəcəyinə özü təminat verib. X.İsgəndərovun "ipdən” alınmasının ilginc hekayəti belədir.

Həbs təhlükəsi sovuşan kimi Binəqədidəki bütün binalarda "ölüm üzlükləri” sökülüb, X.İsgəndərov ən yaxın adamlarına heç kimdən rüşvət almamağı, bütün qanunsuz tikililəri dayandırmağı tələb edib.

İndi məlum olur ki, icra başçısı əslində "ipdən” alındığı üçün müəyyən müddət ətrafına diqqətli olmağı tapşırıb. Amma yaşadığı stress X.İsgəndərova baha başa gəlib. Xatırladaq ki, yanğın nəticəsində 15 nəfər ölüb, 50 nəfər xəsarət alıb.

Bundan başqa, mənbənin bildirdiyinə görə, “kadr islahatlar”ı tabeçiliyində olan insanları istismar etməklə yanaşı, onları hər zaman təzyiq altında saxlamağa hesablanıb.

İllərdir rayonun sosial-iqtisadi inkişafında əməyi olan insanlar Xaləddin müəllimin bir sözü ilə işləri ilə vidalaşmalı olublar. X.İsgəndərov təyinatından dərhal sonra köhnə müavinləri ilə vidalaşıb – Eldar Ağayev və Fəxrəddin postlarını itiriblər.

Daha bir müavini Qəzənfər Novruzovu isə (Bir qardaşı Vaqif Novruzov Bakı Yaşıllaşdırma Departamentinin müdiri, daha bir qardaşı Səbuhi Novruzov isə Naxçıvan MR daxili işlər nazirinin müavinidir) həbsxanaya yollaya bilib - yanan bina ilə bağlı bütün məsuliyyəti ona “yükləyib” zindana göndərdi.

İlqar Süleymanov və Aygün Əliyeva təyinat alıb. Bunların hər ikisi Cənab İsgəndərova yaxınlığı ilə tanınırlar. Digər müavin Vüsal İsmayılov isə illərdir “ip üstündə” gəzir.

Mənbə bildirir ki, İsgəndərov icra hakimiyyətinin şöbə müdirlərini də əlüstü dəyişib – Natiq, Mehdi, Emin, Nəsimi, İlqar, Nəbi və Səmayə adlı köhnə şöbə müdirləri vəzifələrini itiriblər. Başçının köməkçiləri Eldar və Rəşad digərləri kimi vəzifələri ilə sağollaşdılar. Bundan sonra İcra Hakimiyyətinin müxtəlif şöbələrində “təmizliyə” başlayıb. Belə ki, Ümumi şöbədən 3 nəfər, Qəyyumluq Komissiyasından 2 nəfər vaxtından əvvəl “təqaüdə” göndərilib, İctimai-siyasi şöbənin əməkdaşları tamamilə dəyişdirilib.

Mənbənin məlumatına görə, X.İsgəndərov İcra Hakimiyyəti ilə yanaşı, YAP Binəqədi rayon təşkilatını da inhisarına alıb. Rayon təşkilatının sədri Nəbi Xəlilovu məqamından uzaqlaşdıraraq onun yerinə Ramiz Göyüşovu “məsləhət görüb”.

N.Xəlilovun könlünü almaq və çoxillik YAP-çı təcrübəsindən bəhrələnmək üçün vergi sistemində işlə təmin ediblər. X.İsgəndərov həmçinin YAP Binəqədi rayon təşkilatının Aparat rəhbərini iki dəfə dəyişib. İlk dəfə təyin olunan Qabil adlı YAP-çını Sevinc adlı xanım əvəz edib.

Məlumatlara görə, cənab İsgəndərovun “sehrli dəyənəyi” rayon bələdiyyələrinin sədrlərindən də yan keçməyib. Binəqədi rayon Bələdiyyəsinə Sitarə Cabbarlı, Xocasən Bələdiyyəsinə Anar, Binəqədi qəsəbə Bələdiyyəsinə Aytac Əliyeva, Biləcəri qəsəbə Bələdiyyəsinə isə Hikmət sədr “seçilib”. Əslində bələdiyyələrlə bağlı İsgəndərovun bu kimi özfəaliyyəti bununla yekunlaşmır.

Prezident İlham Əliyevin təbirincə desək, ortada iş deyilən bir şey yoxdur: “Bələdiyyənin öz səlahiyyəti var, indi mən o fəaliyyəti görmürəm. Bütün bölgələrdə, kəndlərdə, şəhərlərdə görülən işlər dövlət büdcəsi hesabına görülür. Bələdiyyə bir kənd yolunu tikib? Halbuki bu, bələdiyyənin bilavasitə işidir”.

Bu fikirləri Prezident İlham Əliyev elə Xaləddin bəyin hakimi-mütləq olduğu rayonda – 16 mərtəbəli binada baş verən yanğınla əlaqədar yaradılan Dövlət Komissiyasının ilk iclasında çıxışı zamanı söyləmişdi.

Dövlət başçısı demişdi ki, bütün kənd yolları dövlət büdcəsi, yaxud Prezidentin Ehtiyat Fondu hesabına tikilir: “Bələdiyyə sadəcə, bir möhür idarəsidir. Yəni qanunsuz əməllərə ştamp qoysun! Bu məsələ də prokurorluq tərəfindən araşdırılmalıdır, buna son qoyulmalıdır…”

Xatırladaq ki, İsgəndərov Xaləddin Şahmar oğlu 5 noyabr 1962-ci ildə Qasım İsmayılov (indiki Goranboy) rayonunun Xanqərvənd kəndində anadan olub. Əmək fəaliyyətinə 1979-cu ildə Yevlax rayonu Birləşdirilmiş Qaz Birliyində çilingər olaraq başlayıb.

2001-2003-cü illərdə Bakı Şəhər İcra Hakimiyyəti başçısı Aparatının Ərazi idarəetmə orqanları ilə iş şöbəsinin böyük referenti vəzifəsində, 2003-2012-ci illərdə Vergilər Nazirliyinin 11 saylı və 14 saylı Ərazi Vergi İdarələrində, Bakı şəhəri Vergilər Departamentində, Vergilər Nazirliyi yanında Xüsusi rejimli Vergi Xidməti Departamentində müxtəlif rəhbər vəzifələrdə çalışmışdır.

Rafiq Qara

gundemxeber.az