Niyaməddin Qarayev: “Yəqin ki, ölkə rəhbərinin ünvanına yazmış olduğum şikayət ərizələrimin araşdırılması Bakı Metropoliteninə göndərlir. Belə bir səbəb üzündən də, ortada heç bir nəticə olmur”

Ölkəmizin olduqca strateji əhəmiyyət kəsb edən sahələrindən biri olan Bakı Metropoliteni, bu gün paytaxt sakinləri üçün ən əlverişli nəqliyyat vasitəsi hesab olunur. Belə ki, bu sahədə yaşanan reallıqları nəzərə alaraq onu da vurğulaya bilərik ki, sakinlərin mənzil başına çatmasında əvəzsiz rola malik olan Bakı Metropoliteni, hal-hazırda da yenilikləri ilə diqqəti cəlb etməkdədir. İlk öncə onu vurğulayaq ki, son üç-dörd il ərzində bu sahədə həyata keçirilən islahat proqramları, atılan bir çox addımlar və s. hər kəs tərəfindən rəğbətlə qarşılanır və layiqincə də qiymətləndirilir.

Amma, bu sahədə çalışan və Bakı Metropiliteninin adına bu və ya digər formada ləkə gətirən bəzi əməkdaşların əməllərini eşitdikcə, bir anlığa olsa belə sanki şoka da düşürük. Buna səbəb, Bakı Metropiliteninə qarşı formalaşmış ictimai inamın varlığıdır. Belə bir münasibətin olmasına baxmayaraq, bir neçə gün bundan əvvəl “Gündəm Xəbər”ə şikayət ərizəsi ünvanlayan, Yardımlı rayonu Zevin kənd sakini Qarayev Niyaməddin Əzizağa oğlu yazmış olduğu ərizəsində bildirir ki, “2015-ci ilin yanvar ayında Bakı Metropoliteninin Dərnəgül stansiyasında çalışan əməkdaşı Abdullayeva Natəvan Almazxan qızı, metropolitenə işə düzəltmək adı altında məndən 700 manat pul aldı. Bu günə qədər nə məni işə düzəldir, nə də ki, aldığı 700 manat pulumu geri qaytarır. 2015-ci ilin iyununda ondan pulumu istədim, həmin vaxt o, pulumu qaytarmaq əvəzinə məni təhqir etməyə də başladı. Belə olan halda bir neçə dəfə Bakı Metropoliteninin rəhbərliyinə şikayət etsəm də, heç bir halda şikayətimə əhəmiyyət verən olmadı. Əksinə Natəvan Abdullayeva metropolitendə departament xidmətinin rəisi T.Dadaşov və qurumun hüquqşünası B.İsmayılov tərəfindən lazımınca da müdafiə olundu. Bundan sonra digər hüquq-mühafizə orqanlarına da müraciətlər etdim, yenə də şikayətlərimə bir kimsə baxmadı. Hətta, ölkə rəhbərinin ünvanına da şikayət ərizəsi ünvanladım, bunun da bir nəticəsi olmadı. Yəqin ki, ölkə rəhbərinin ünvanına yazmış olduğum şikayət ərizələrimin araşdırılması Bakı Metropoliteninə göndərlir. Belə bir səbəb üzündən də, ortada heç bir nəticə olmur. Son anda məcbur olub ayrı-ayrı mətbu orqanlara, bəzi xəbər portallarına da müraciətlər etdim ki, üz-üzə qaldığım problemin varlığı ictimailəşsin.

Onu da qeyd edim ki, ayrı-ayrı dövlət qurumlarına ünvanladığım şikayət ərizələrimin araşdırılması, Bakı şəhər Baş Polis İdarəsinin İstintaq və Təhqiqat şöbəsinə göndərilmişdir. Şikayətimin araşdırılmasını həyata keçirən polis mayoru V.Şəbəndiyev, metropolitenin dələduzluq etmiş əməkdaşı Natəvan Abdullayevanın əməllərində cinayət xarakterli əməlləri müəyyən etdiyi üçün, toplanmış iş materiallarını istintaq şöbəsinə göndərir. 12 may 2016-cı il tarixdə isə, iş materialları müstəntiq Rüstəm Bayramovun icraatına verilir. Belə olan halda müstəntiq mənə bildirdi ki, “istintaq işinə başlamaq üçün Bakı şəhər Prokurorluğundan razılıq almaq lazımdır”. Eyni zamanda o, məndən dələduzluq yolu ilə alınmış pulun az olduğunu əsas gətirərək, prokurorluğa da hörmət etmək lazım olduğunu bildirdi. Mən ona imkanım olmadığını bildirsəm də, iyun ayında izahat almaq üçün, o, məni polis idarəsinə dəvət etdi. Rüstəm Bayramov məndən izahat aldı və az sonra bildirdi ki, “Bakı Metropoliteni”QSC-i Paşayevlərə

məxsus bir qrumdur. Hətta o, istintaqın aparılmasına yüksək çinli vəzifə sahiblərinin maneə olduqlarını da dilə gətirdi.

Eyni zamanda Rüstəm Bayramov bu məsələ ilə bağlı prokurorluqda danışacağını və nəticəsi barədə mənə məlumat verəcəyini vəd etsə də, son anda o, vədinə əməl etmədi. Hətta, etdiyim telefon zənglərimə belə cavab vermədi. İdarəyə gedib qəbuluna düşmək istəsəm də, məni qəbul da etmədi. Bir qədər vaxt keçdikdən sonra onu da müəyyən edə bildim ki, müstəntiq Rüstəm Bayramov şikayətimin rədd edilməsi barədə qərar qəbul edib və nə qədər çalışsam da o, qərarın surətini mənə vermədi”.

Bəli, bu bir sadə, olduqca kasıb, iş axtarmaq istəyi ilə qapılarda qalan və aylar, illər uzunu getgələ salınan Niyaməddin Qarayevin üz-üzə qaldığı problemin varlığıdır. Bizi o hal şoka salır ki, səbəb nədir ki, Bakı Metropoliteninin yeni rəhbərliyi dələduzluq etmiş bir kimsəni hələ də iş başında saxlayır. Axı, bu cür əməl sahiblərinin atdığı addımlar, əksəriyyətin rəğbət bəslədiyi qurumun nüfuzuna ləkə gətirməklə bərabər, Bakı Metropoliteninin adı ətrafında formalaşan ictimai etimadın itrilməsinə də xidmət edir.

Qarşı tərəfin də mövqeyini dinləyə bilərik.

Araşdırmamız davam edəcək.

Cəfər
gundemxeber.az