Niyaməddin Qarayev: “Təəssüflər olsun ki, üz-üzə qaldığım problemlə bağlı bu günədək aidiyyəti dövlət qurumlarına, hətta metropolitenin rəhbərliyinə dəfələrlə şikayət ərizələri ünvanlasam da, Natəvan Abdullayeva ilə bağlı heç bir tədbir görülmür”
“Gündəm Xəbər” qəzeti işıq üzü gördüyü vaxtdan bu günə kimi, daim ictimai həyatımızda baş verən sosial-iqtisadi problemlərin ictimailəşməsinə geniş yer ayırmış və bu səpkili problemlərin həllinə də çalışmışdır. Belə bir səbəblər üzündəndir ki, bu gün də müəyyən haqsızlıqlarla, məmur özbaşınalığı, vətəndaş süründürməçiliyi və.s kimi hallarla üz-üzə qalan çoxsaylı sakinlər, redaksiyamıza üz tutmaqda davam edirlər. Məqsədləri yalnız və yalnız haqq səslərini aidiyyəti qurumlara çatdırmaq və problemlərinin həllinə nail olmaq olur. Belə bir səbəblər üzündəndir ki, hal-hazırda “Gündəm Xəbər” qəzeti öz ətrafına xeyli sayda oxucu kütləsi də toplaya bilib.
Bir neçə gün bundan öncə üz-üzə qaldığı probleminin həllinə hələ də nail ola bilməyən və Yardımlı rayonunun Zövün kənd sakini olan Qarayev Niyaməddin Əzizağa oğlu da, redaksiyamıza üz tutan çoxsaylı oxucularımızdan biridir. O, yaşanan problemlə bağlı redaksiyamıza ünvanladığı şikayət ərizəsində yazır ki, “əvvəllər tanıdığım və "Bakı Metropoliteni” QSC-nin “Dərnəgül” metrostansiyasında nəzarətçi işləyən Abdullayeva Natəvan Almazxan qızı ilə, 2015-ci ilin yanvar ayında olan söhbətimdə ona işsiz olduğumu bildirdim. Ümumi söhbət əsnasında o, yaxın qohumunun “Bakı Metropoliteni” QSC-də yüksək vəzifədə işlədiyini bildirdi və məni qeyd olunan quruma işə düzəldəcəyinə də söz verdi. Bir neçə gün keçdikdən sonra biz onunla təkrar görüşdük və həmin vaxt o, mənə işə düzəlməyimin müqbilində 1500 manat pul istədiklərini bildirdi. Düzdür, həmin vaxt məndə istənilən məbləğdə pul yox idi. Ona görə də ona bildirdim ki, həmin pulun 700 manatını yaxın bir-iki günə, qalanını isə işə düzəldikdən sonra verə bilərəm. Bir qədər söhbətdən sonra biz ümumi razılığa gəldik və mən ondan ayrıldım. 2015-ci ilin yanvar ayının sonunda isə, o, gecə xidmətində işdə olarkən 700 manatı ona əlbəəl verdim. Bir qədər söz-söhbətdən sonra, Natəvan Abdullayeva bildirdi ki, “sən heç də tələsmə, uzağı 6 ay müddətinə səni işə düzəldəcəyik” dedikdə, ondan iş haqqında nəsə soruşmaq istədim. O, bir daha vurğuladı ki, “sən niyə tələsirsən, özləri səni çağıracaqlar” dedi.

2015-ci ilin may ayının əvvəllərində onunla görüşərkən, Natəvan Abdullayeva mənə bildirdi ki, ki, “analiz vermək üçün Respublika Dəri Zöhrəvi Dispanserinə getmək istəyirəm, amma dispanserin harada yerləşməsini bilmirəm. Olarmı mənə köməklik edəsən” dedikdə, mən onunla dispanserə getmək qərarına gəldim və adı çəkilən səhiyyə ocağına da getdim. Elə ki, həmin dispanserdə onun təhlükəli xəstəliyin daşıyıcısı olduğunu bildim, dərhal pulumu geri tələb etməyə başladım. Həmin vaxt Natəvan Abdullayeva məni hədələməyə və təhqir də etməyə başladı.
Onun belə bir hərəkətləri mənə olduqca toxunduğundan, məcbur oldum ki, “Bakı Metropoliteni” QSC-nin rəhbərliyinə, onunla bağlı şikayət ərizəsi də ünvanlayım. Etdiyim şikayətdən xeyli vaxt keçsə də, heç bir tədbir görülmədi. Tədbirin niyə görülməməsi ilə bağlı belə bir məlumat da əldə edə bildim ki, Natəvan Abdullayevanın qanunsuzluq əməllərinə yol verməsinə, xidməti vaxtında özbaşınalıqlar etməsinə və digər xoşagəlməz addımları atmasına səbəb, metronun department xidmətinin rəisi Tərlan Dadaşovun və hüquqşünas Babək İsmayılovun onu müdafiə etmələri olur.
Təəssüflər olsun ki, üz-üzə qaldığım problemlə bağlı bu günədək aidiyyəti dövlət qurumlarına, metropolitenin rəhbərliyinə dəfələrlə şikayət ərizələri ünvanlasam da, Natəvan Abdullayeva ilə bağlı heç bir tədbir görülmür. Onu müdafiə edənlərin əməlləri onu sübut etməyə tam əsaslar verir ki, bu cür qanunsuzluq əməllərinin başında, yəqin ki, elə onların özləri dururlar” deyir.
Bəli belə bir olayın yaşanması, öz-özlüyündə təəssüfdoğuran haldır. Çünki, sadə bir kənd sakinini işə düzəldəcəyəm adı ilə “tora salan” metropoliten əməkdaşının bu cür əməllərlə məşğul olması və sonradan da, ona hədə-qorxu gəlməsi, hətta təhqir etməsi belə, birbaşa cinayət əməlidir. Axı, bu gün “Bakı Metropoliteni” QSC-i ölkəmizin ən strateji sahələrindən biri hesab olunur və hansısa əməkdaşının bu cür əməllərə qol qoyması, yəqin ki, adı çəkilən qurumun nüfuzuna olduqca da xələl gətirir. Biz ona da inanırıq ki, problemin ictimailəşməsindən sonra, aidiyyəti qurumlar Niyaməddin Qarayevin üz-üzə qaldığı problemin həllinə diqqətlə yanaşıb, günahkarın qanun qarşısında cavab verməsinə də çalışacaqlar.
Məqalədə adı çəkilən şəxslərin də, mövqeyini dinləyə bilərik. Problemin varlığı diqqət mərkəzimizdə olacaq.

Tariyel Bayramlı

gundemxeber.az