Hərbi hissədə dəhşətli işgəncə faktları

Hərbi hissədə hədə-qorxu yolu ilə pul tələb etməkdə və digər cinayətlərdə ittiham olunan Sabirabad rayon sakini, 1996-cı il təvəllüdlü Elvin Məmmədovun cinayət işi üzrə məhkəmə prosesi başa çatıb.

İttihama görə, Elvin Məmmədov Müdafiə Nazirliyinin Goranboy rayonunun ərazisində yerləşən “N” saylı hərbi hissəsində əsgər rütbəsində xidmətdə olub. O, 2014-cü ilin oktyabr ayının sonlarında əsgər yoldaşı Rəhman Rəhimlinin atası Zabit Rəhimovun onun yanına gəlməsini və ona qol saatı verdiyini bilib.

Elvin Məmmədov taborun avtomobil parkında naryadda olan Rəhman Rəhimlinin yanına gəlib və qolundakı qiyməti 5 manat lan qol saatını ondan istəyib. Rəhman həmin saatın bacısının hədiyyəsi olduğunu bildiib və ona verməkdən imtina edib. O, Rəhman Rəhimliyə saatı verməyəcəyi təqdirdə onun üçün pis olacağını, yəni onu döyəcəyini bildirərək saatı ondan hədə-qorxu ilə tələb edib.

Rəhman Rəhimli yenə də saatı verməkdən imtina edib. Elvin Məmmədov naryaddan çıxdıqdan sonra əsgər yataqxanasına qayıdıb, onu döyəcəyini bildirib.

Bundan sonra Elvin Məmmədov Rəhman Rəhimlinin atası Zabit Rəhimovun sovqat da gətirdiyini bilərək xidmət etdiyi bölüyün əşya anbarına gedib. O, anbardar vəzifəsini müvəqqəti icra edən əsgər Romik Aydəmirova Rəhman

Rəhimlinin orada saxladığı, içərisində atasının gətirdiyi ərzaqlar olan çantanı istəyib.

1 toyuq və 25 manat pul

Elvin Məmmədov çantanı götürmək üçün Rəhman özü ondan xahiş etdiyini deyib. O, bildirib ki, əşya anbarında saxlanılan Rəhman Rəhimliy əməxsus çantanı guya taborun avtoparkına apararaq onun özünə verəcəyini bildirib

Elvin Məmmədov Romik Aydəmirovu aldadaraq Rəhmana məxsus çantanı anbardan götürüb və daha sonra həmin çantanı taborun inzibati binasının yaxınlığında yerləşən Novruz Məmmədova məxsus obaya aparıb. Elvin orada çantada olan bir ədəd soyutma toyuq və meyvəni yeyib və çantada olan Zabit Rəhimovun oğlu Rəhman Rəhimliyə xərclik üçün verdiyi 25 manat pulu götürüb.

Əsgər yataqxanasında dava

Daha sonra Rəhman Rəhimli həmin gün saat 20.40 radələrində xidmət etdiyi bölüyün əsgər yataqxanasına gəlib. Bu zaman Elvin Məmmədov Rəhmam Rəhimlini yanına çağırıb və qolundakı həmin qol saatını ona verməsini təkrar tələb edib. Elvin Məmmədov qol saatını verməyəcəyi təqdirdə onu döyəcəyini bildirib. Rəhman yenə də saatı ona verməkdən imtina edib.

Bundan əsəbləşən Elvin Məmmədov Rəhman Rəhimlinin yaxasından tutub və divara çırpıb, sonra onun sifətinə 2 sillə zərbəsi vurub. Daha sonra isə onun qol saatını zorla qolundan dartaraq qoparıb. Elvin saatı divara çırpıb və sonra ayaqlayaraq sındırıb.

Bundan başqa Elvin Məmmədov 2015-ci ilin mart ayının ortalarında saat 15:30 radələrində xidmət etdiyi bölüyün əsgər yataqxanasında istirahət vaxtı olduğu üçün öz yerlərində dincələn əsgərlərə “diqqət” komandası verib, dərhal qalxıb tapşırılmış işlərlə məşğul olmalarını tələb edib.

İstirahət saatında işgəncə

Bu zaman Elvin Məmmədov bölüyün 3-cü tağımının 2-ci manqasının sanitar-atıcısı vəzifəsində müddətli həqiqi hərbi xidmətdə olan əsgər Elvin Əhmədovun doğranmış odunların əsgər yataqxanasındakı sobanın yanına daşınması üçün getməli olduğu halda yatdığı yerdən gec qalxdığını bəhanə edib. O, Elvin Əhmədovun sifətinə 1 sillə və ayağına 1 təpik vurub.

Həmin vaxt Elvin Məmmədov Elvin Əhmədovu itələyərək başını əsgər çarpayısının dirəyinə çırpıb. O, Elvinə qarşı fiziki zor tətbiq edib. Elvin Əhmədov həmin zərbədən huşunu itirərək yerə yıxılıb, digər əsgər yoldaşları üzünə su vuraraq onu ayıldıblar.

Əsgərlərin tualet davası

Bundan başqa, Elvin Məmmədov 2015-ci ilin may ayının sonlarında saat 09.10 radələrində həmin bölüyün 1-ci tağımının 2-ci manqasının sanitar-atıcısı vəzifəsində həqiqi hərbi xidmətdə olan əsgər Həzrət Rəsulov ilə birlikdə bölüyün əsgər yataqxanasında yerləşən tualeti təmizləmək tapşırılıb.

Tualeti hər ikisi birlikdə təmizləməli olub. Amma Elvin Məmmədov Həzrət Rəsulovdan tualeti tək təmizləməsini tələb

edib. Həzrət Rəsulov tualeti tək təmizləməkdən imtina edib və hər ikisinin birlikdə təmizləməli olduqlarını bildirib.

Buna görə də onlıarın aralarında mübahisə yaranıb. Mübahisə zamanı Elvin Məmmədov Həzrət Rəsulovun şərəf və ləyaqətini alçaldıb və ona qarşı zor tətbiq edib.

Elvin Məmmədov bölüyün əsgər yataqxanasında əvvəlcə Həzrət Rəsulovun kitelinin yaxasından tutaraq onu tualetin divarına çırpıb, daha sonra isə sifətinə 2 sillə və ayağına 1 təpik zərbəsi vurub.

Təqsirləndirilən şəxs: “Əməlimdən peşmanam”

Elvin Məmmədov Cinayət Məcəlləsinin 332.2.1-ci (tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozma) və 182.2.3-cü (hədə-qorxu yolu ilə tələb etmə) maddələri ilə ittiham edilib. Cinayət işi Tərtər Hərbi Məhkəməsində, hakim Abbas Abbasovun sədrlik etdiyi kollegiyada araşdırılıb.

Məhkəmədə ifadə verən Elvin Məmmədov elan olunmuş ittiham üzrə özünü təqsirli bilib: “Zərər çəkmiş şəxslər Rəhman Rəhimli , Həzrət Rəsulov və Elvin Əhmədova qarşı fiziki zor tətbiq etmişəm. Rəhman Rəhimlinin əlindən ona məxsus bir ədəd qol saatını zorla almışam, divara çırparaq sındırmışam. Əməlimdən peşman olmuşam. Məhkəmədən xahiş edirəm ki, gəncliyimi, peşman olmağımı nəzərə alsın, mənə qanunla yol verilən güzəştləri etsin”.

Cinayət işi üzrə zərər çəkmiş Rəhman Rəhimli bildirib ki, 3 iyul 2014-cü ildə Səfərbərlik və Hərbi Xidmətə Çağırış üzrə Dövlət xidmətinin Tovuz rayon şöbəsindən həqiqi hərbi

xidmətə çağırılıb: “Əsgər hərbi rütbəsində xidmət etmişəm, xidmət müddətimin başa çatması ilə 1 yanvar 2016-cı ildə ehtiyata buraxılmışam”.

“Məni döyəcəyi ilə hədələdi”

Zərər çəkmiş şəxsin sözlərinə görə, 2014-cü ilin oktyabr ayının ortalarında şəxsi heyətin bölgüsü zamanı 2-ci taborun 5-ci bölüyünün 2-ci tağımının 2-ci manqasının atıcısı vəzifəsinə təyin edilib, tabora göndərilməmişdən əvvəl atası Zabitlə telefon əlaqəsi saxlayaraq bu barədə ona məlumat verib: “2-ci taborda xidmət etməyə başladıqdan bir həftə sonra atam xidmətim ilə maraqlanmaq məqsədi ilə yanına gəldi. Atam mənə 25 manat, həmçinin evdən anamın göndərdiyi şirniyyat, bir ədəd bişmiş toyuq və meyvə olan zənbil, bacım Aytənin ad günümə hədiyyə etdiyi bir ədəd qol saatı verdi. Həmin gün atam getdikdən sonra mənə gətirdiyi zənbili əşya anbarına aparıb anbardar Romik Aydəmirova verdim və saat 18-dən 20-dək taborun avtoparkına patrul naryadına çıxdım”.

“Atamın verdiyi qol saatını istədi”

Rəhman Rəhimli bildirib ki, anbardardan naryaddan çıxdıqdan sonra zənbili götürəcəyini deyib: “Atamın verdiyi qol saatını qoluma taxmdım, 25 manat pulu isə dəsmalın arasında həmin zənbilə qoydum. Saat 19-30 radələrində əsgər Şamxal Əkbərovla birlikdə taborun avtoparkında naryadda olarkən Elvin Məmmədov İlkin Həmzəyevlə avtoparka gəldi. Elvin Məmmədov məndən qolumdakı saatı ona verməyimi tələb etdi. Saatın bacımın hədiyyəsi olduğunu bildirərək ona verməkdən imtina etdim. Elvin Məmmədov əsgər

yataqxanasına qayıtdıqda saatı ona verməyəcəyim təqdirdə, məni döyəcəyi ilə hədələdi”.

Rəhman Rəhimli qeyd edib ki, patrul naryadından çıxdıqdan sonra bölüyün əsgər yataqxanasına gedib: “Elvin Məmmədov məni yanına çağıraraq üstünə qışqırdı, qolumdakı saatı məndən hədə-qorxu ilə tələb etdi. Saatı verməyəcəyimi bildirdi. Elvin əsəbləşərək yaxamdan tutaraq məni divara çırpdı. Sonra sifətimə iki sillə zərbəsi vurdu, daha sonra isə qolumdakı saatı zorla dartaraq qopardı və sındırdı”.

Zərərçəkmiş daha sonra ifadəsində Elvin Məmmədovun onun anvarda olan çantasını götürməsindən, içində olan yemək və şirniyyatları yeməsindən, 25 manat pulunu götürməsindən danışıb.

Rəhman Rəhimli həmçinin ifadəsində daha iki dəfə Elvin Məmmədov tərəfindən zorakılığa məruz qalımasından da danışıb.

Cəza

Digər zərərçəkmişlər və şahidlər dinlənildikdən sonra hökm elan edilib. Məhkəmənin hökmü ilə Elvin Məmmədov 3 il müddətinə azadlıqdan məhrum edilib.

Hökmdən narazı qalan Elvin Məmmədovun vəkili Ramiz Musayev apelyasiya şikayəti verib. Vəkil müdafiə etdiyi şəxsin cəzasının yüngülləşdirilməsini istəyib. Vəkilin şikayəti araşdırılması üçün Gəncə Apelyasiya Məhkəməsinə göndərilib.

Şikayət hakim Bədəl Əliyevin sədrlik etdiyi kollegiyada araşdırılıb. Apelyasiya şikayətinin dəillərini araşdıran hakim heyəti sonda qərar elan edib.

Qərara görə, müdafiəçinin apelyasiya şikayəti qismən təmin edilib və Tərtər Hərbi Məhkəməsinin hökmü dəyişdirilib. Yeni hökmə əsasən, Elvin Məmmədovun cəzası 1 il 6 aya endirilib.