Rəcəb Babaşov nədən idarə müdirlərini söyür, Qazaxlıları narkotiklə, şərləməklə hədələyir?

"Gündəm xəbər"in redaskiaysına Qazax rayonundan şikayət dolu bir məktub daxil olub. "Əsl Qazaxlı" imzası ilə yazan müəllif rayon icra hakimiyyətinin başçısı Rəcəb Babaşovu, bu rayondan deputat seçilən Kamran Nəbizadəni tənqid edib. "Açıq məktub" janrında yazılan həmin yazını kiçik ixtisar və düzəlişlərlə dərc edirik:

Qonaq gərək öz yerini bilsin...


Cənab icra başçısı! Gözünü aç, bu el-obaya yaxşı bax! Bura ziyalılar diyarı Qazaxdır! Bu torpaqda Səməd Vurğun, İsmayıl Şıxlı, Molla Pənah Vaqif, Dədə Ədalət və bu kimi sayı-sambalı olan şairlər, ziyalılar və dahilər yetişib. Bizim silahımız sazdı, sözdü, qələmdi. Qazax çox qonaxpərvər və hörmətcil bir obadı. Qazaxın etikası, mədəniyyəti yüksək olan bir camaatı var. Qazaxlılar özünə qarşı da belə münasibət gözləyir. Bura gələn qonaq da gərək öz yerini bilsin, danışdığının fərqində olsun. Qazaxda gələn qonağa “xoş gəlmisiniz” deyərlər! Qonaq da elə etməlidir ki gedəndə ona “xoş getdin” desinlər!

Qazax həm də cəbhə bölgəsidir. Qazax oğulları düşmənlə üz-üzə əli yalın, balta-yabayla, ən yaxşı halda isə ov tüfəngiylə düşmənə sinə gərdilər, Qazaxı qorudular, düşmənə qan uddurdular, şəhidlər verdilər. Dinc əhalinin başına "Qrad" mərmiləri yağdı, amma Qazaxlılar elini-obasını atıb qaçmadılar. İllərlə qazsız, işıqsız qaldılar, min bir əziyyətə qatlaşdılar, amma dönmədilər. Bir sözlə, Qazaxlılar çox əziyyət çəkdilər. Ona görə də Qazaxlılar ən ali hörmətə layiq olduqları halda təəssüflər olsun ki, onlar rayonun rəhbəri, yəni sizin tərəfinizdən təhqir və təhdid olundu, alçaldıldı, hörmətsizliklə qarşılaşdılar, qapıları bağlandı, çörəklərindən, işindən oldular.


İcra başçısının narkotik və həbs təhdidid

Cənab başcı, sizə sual verirəm. Siz, Qazaxlıları narkotiklə şərləyib tutdurmağa gəlmisiniz? Nə isə! Bu söhbətə hələ qayıdacağıq!

Cənab Başcı! Rayon rəhbəri işləmək sizə elə də asan gəlməsin. Çünki hər bir rayonun öz adət- ənənələri, öz qaydaları var. Hər bölgənin camaatı fərqli düşüncəyə, mədəniyyətə və xarakterə malikdir. Bunların hamısını gərək nəzərə alasan. "Burada mənəm, Bağdadda kor xəlifə" idarəçilik üslubu artıq keçərli deyil. Hər şey sizin bütün istəkləriniz və diktənizlə olmur. Siz padşah deyilsiniz. Bir də ki ən əsası qulluq etdiyin iqtidarın rayon rəhbəri kimi sənnən olan gözləntilərini gərək anlaya biləsən. İqtidarın tələbi isə hər kəsə bəllidir. Yerli əhaliylə yola get, hörmətlə davran, dolandır, problemlərini həll et və heç vaxt ictimai narazılıq yaratma.

İdarə müdirlərini söyən və təhqir edən başçı


Eldar Nəsibin “Bura Qazaxdır, oğlum” şerindən bir misra yadıma düşdü:

İgidlərin köksu ilə qorunur bənd, bərəsi, Koroglunu andırır hər oğlunun nərəsi, Düsmənlərə məzardır qədim İncə dərəsi Dostlarınsa yolunda bir şam çıraqdır,oğlum Bura Qazaxdir,oğlum!

Cənab Başcı! Siz Qazaxlılara hörmət qoymadınız və ictimai narazılıq yaratdınız, bununla da hakimiyyətin sizə olan etimadını itirdinız. Artıq hər kəsə bəllidir ki siz tabeçiliyinizdə olan İcra aparatinin işciləriylə, rayonun idarə müdirləriylə çox kobud davrandınız, onları söydünüz, təhqir etdiz və onlarla kölə kimi davrandınız. Sizin ifadə etdiyiniz söyüşlər və təhqirlər küçə uşaqları arasında istifadə olunan sözlərdir. Deyin görək, bu haqqı sizə kim verib?

Rəcəb Babaşovla gömrük rəisinin qarşıdurması

Gomruk rəisiylə əlbəyaxa olub kəllə kəlləyə gəldiniz. Hətta çəkinmədən Qazaxlıları siyasi təxribata yönəldərək onları gömrükdə mitinq etməyə cəlb etdiniz.

Rayon rəhbərinin müşavirə zamanı hər kəsin yanında dəfələrlə “Cibinə, avtomobilinə narkotik atdırıb tutduraram“ ifadəsini işlətməsi bir rayon rəhbərinin edə biləcəyi ən böyük xəta və siyasi səhv ola bilərdi. Onu da cənab Babaşov, siz etdiniz. Qazax Elektrik Şəbəkəsinin müdiri 60-a yaxın yaşı olan Elşad müəllimi, 70 yaşlı el ağsaqqalı, Salahlı kənd icra nümayəndəsi Şahismayıl müəllimə və daha kimlərə “sənin cibinə, avtomobilinə narkotik atdırıb tutduraram” təhdidini bizim yanımızda edən də siz oldunuz. İndi Şahismayıl müəllim cibini tikdirib gəzir, bunu da hamı çox gözəl bilir.

Qanunsuz kadr islahatları, özəl sektora zərbə


“Cibinə narkotik atdırıb tutduraram” ifadəsi adətən, kiçik rütbəli polis tərəfindən küçə uşaqlarına, xuliqanlara qarşı istifadə olunan bir təhdid növüdür. Lakin siz bir cəbhə bölgəsində yerləşən rayonun rəhbərisiniz. Budurmu sizin idarəçilik üslubunuz? Çoxlu sayda ticarət, xidmət, təhsil obyektlərinin əsassız olaraq bağlanmasına qərar verdiniz. Yüzlərlə vətəndaşı işindən etməklə, ailəsinə, uşağına çörək pulu aparmasına mane oldunuz. Dövlət işində işləyənləri fəaliyyətində ciddi qüsur olmadan işindən kənarlaşdırdınız. Bir sözlə, özünüz də bilmədən ictimaiyyəti narazı saldınız. Bununlad a hakimiyyətin əsas özək siyasi dəsti-xəttinə qarşı çıxdınız. Hakimiyyət isə həmişə bir qızıl qaydaya riayət edir. “Hər hansısa problemin qarşısını vaxtında almaq sonradan onun yaratdığı problemlərin nəticələrini aradan qaldırmaqdan qat-qat asandır”. Bu sözləri ümummilli lider Heydər Əliyev deyib. Siz artıq hakimiyyət üçün bir problemsiniz, problemli məmursunuz. Hakimiyyət heç vaxt riskə getmir və problemli məmurları vəzifədən uzaqlaşdırır. Cənab başcı, siz çox qısa bir zamanda, cəmi 5 ay ərzində olduqca çoxlu problemlər yaratmaqa müvəffəq olunuz. Hətta bir rayon başcısının 5 ildə yarada biləcəyi problemdən bir az da artıq problemlər yaratdınız.

Cənab Başcı! Siz Qazaxdan gedəcəksiniz! Mütləq gedəcəksiniz! Amma heç düşünmüsünüzmü, gedəndən sonra Qazaxlılar sizin barənizdə nələr danışacaqlar? Qazaxlılar sizə qədər heç vaxt rayon rəhbəri tərəfindən belə hörmətsizlik və belə ucuz təhdidlər görməmişdilər, yəqin ki, sizdən sonra da inşaallah, görməyəcəklər! Hakimiyyət də bundan sonra çətin ki sizə etimad göstərə.

Sözüm baş redaktoradır... Saxta qızıl qələmin içindəki mürəkkəb də saxta imiş. O qələmin hansı yollarla alındığı Qazaxlılara yaxşı bəllidir. Ona görə də suyu bulandıran və nəyəsə kölgə salan axtarışına çıxıbsınızsa, özünüzü havayı yormayın. Elin gözü tərəzidir. Qazaxın dupduru suyunu bulandıran da, Qazaxlıların üzərinə kölgə salan o qara buludlar da sizin müdafiə etmək istədiyiniz o şəxsdir... Hələ heç kəsə, kimisə sudan quru çıxarmaq nəsib olmayıb. Buna cəhd edənlərsə, özləri islanıb suya batıblar. Amma islanmışın sudan nə qorxusu?

İcra başçısına yarınan deputat

Sözüm Qazaxın deputatınadır... Qazaxın deputatı Kamran Nəbizadə öz Feysbuk səhifəsində yazır: “Bir sıra media resurslarında və saytlarda Qazax Rayon İcra Hakimiyyətinin başçısı Rəcəb Babaşovla bağlı məqalələr və Qazax camaatına ünvanlanmış etiraz mitinqinə çağırışlar dərc olunur. Məqalələr tamamilə yalan və təxribat xarakteri daşıyır, bu, aydındır. Mənə aydın olmayan başqa məqamdır: etiraz aksiyasının, narazılığın səbəbi nədir?”

Cənab deputat! Əgər siz arada bir Qazaxa baş çəkib seçicilərinizlə görüşsəydiniz, onda yəqin deputatı olduğunuz rayonda 25 noyabr saat 12.00-a təyin olunmuş “Prezidentdən Rəcəb Babaşovun istefası tələbi”nin səbəbini və ictimai narazılığın nədən qaynaqlandığını bilərdiniz. Lakin əgər xəbəriniz yoxdursa, bu yalnız sizin öz şəxsi probleminizdir. Deməli siz əsl deputat, həm də əsl Qazaxlı deyilsiniz. Siz Qazaxlıların taleyinə qarşı laqeyd olmaqla yanaşı, rəsmi ittiham diliylə desək, bir deputat kimi “yerinizdə deyilsiniz”.

Cənab başcı! Siz düşünürsünüz ki, əgər məni bu rayona rəhbər qoyublarsa, deməli, istədiyimi edə bilərəm. Ümumi idarəçilik prinsiplərinə riayət etmədiniz. İdarəçiliyi öz aqressiv xarakterinizin öhdəsinə buraxdınız. Tabeçiliyinizdə olan işcilərlə normal davranmadınız. Xof və qorxu toxumu səpməklə işcilərdə narahatcılıq yaratdınız. Hörmət və qarşılıqlı anlaşma əvəzinə qorxu, xof və diktəylə idarə etmək istədiniz.

Cənab Başcı! Sizin quruculuq, abadlıq işlərinizdən çox yazılır çox danışılır. Sizdən əvvəlki hər bir icra başcısı da az və ya çox dərəcədə Qazaxda abadlıq işləri aparıb. Lakin gül əkmək, yol çəkmək, işıq dirəyi basdırmaq və s. işlər hələ hər şey demək deyil və bu işləri camaatın gözünə kül edib üfürməklə qürrələnmək sadəlövlükdür. Bu abadlıq işləri dövlətin və hörmətli prezidentimiz İlham Əliyevin hər bir rayona olduğu kimi biz Qazaxlılara da layiq gördüyü bir haqqdır. Unutmayın ki siz sadəcə prezidentin tapşırığını yerinə yetirən bir icraçısınız. Məhz icraçı. “İcra Hakimiyyəti” sözünün hərfi mənasına diqqət yetirsəniz, oradan vəzifənizin mənasını da tapacaqsınız. İcra Hakimiyyəti iqtidarın tapşırıqlarını, planlarını icra edən və həyata keçirən bir dövlət qurumudur, icra başcısı isə həmin qurumun müvəqqəti rəhbəri. Düzdür, rayonun abadlıq quruculuq işlərində sizin əziyyətiniz də az deyil. Buna biz Qazaxlılar yüksək dəyər veririk. Qazaxlılar əməyə qiymət verəndir. Yaxşı işlərinizə görə çox sağ olun. Lakin səhvlərinizə görə də cavab verməlisiniz. Əgər səhvləriniz bağışlana biləcək səviyyədədirsə. Amma görünən mənzərə odur ki, əməlləriniz bağışlanacaq dərəcədə yüngül deyil. Ona görədə cənab başcı! Siz uduzdunuz, məğlub oldunuz! Özünüzə uduzdunuz, öz xarakterinizə məğlub oldunuz! Lakin Qazaxlılar humanist camaatdır, bəlkə də sizi bağışladılar, amma hakimiyyət sizi bağışlamayacaq.

Əziz Qazaxlılar Siz deyin! Onu bağışlamaq olarmı?
İlham