Qarabağ əlilinin təqaüdündən faiz tutan banka qarşı iddiası “itib”
Təqüdlərdən, pensiyalardan , müavinətlərdən faiz tutulmasının cinayət məsuliyyəti yaratması qanunla təsbit olunub. Amma, “Kapital Bank” əməkdaşları nə qanuna baxırlar, nə Konstitusiyaya, nə də ki, Prezidentin fərmanına məhəl qoyurlar. Bank müxtəlif yollarla, hətta Prezident təqaüdlərindən də faiz tutur. Özü də müştərinin, təqaüdçünün, pensiyaçının kartını bloklaşdırıb, yalnız avtomatik pul silməklə oxşar addımlarını atır. Təqaüdündən qanunsuz məhrum edilənlər isə, məhkəmə yolu ilə də hüquqlarını, pensiyalarını, təqaüdlərini bərpa edə bilmirlər. Bank məhkəmələrə rüşvət verib, iddianı it–bata saldırır.
Bu sətirlərin yazarını Prezident təqaüdünün 7 ay bloklaşdırılıb verilməməsindən bankın özünə və dövlət qurumlarına etdiyi müraciətlərə, nə Vergilər Nazirliyi, nə İqtisadiyyat Nazirliyi, nə Mərkəzi Bank, nə Ombudsman, nə də ki, polis-prokurorluq orqanları baxıb. Prezident təqaüdçüsünün Nizami Məhkəməsində bankın Nizami filialına qarşı qaldırdığı 24 may 2016 tarixli iddia ərizəsini isə, hakim Fikrət Mirzəyev itirib. Əslində hakimin banka vəkillik etməsini görən iddiaçı əlil işə, iştirakının olmadan baxılmasını və hətta, bankın xeyrinə qərar qəbul edilməsinə də ərizə verib . Yenə də məqsədinə nail olmayan vətəndaşın Ombudsmana, Məhkəmə Hüquq Şurasına şikayətlərinə cavab verilməyib. 2016-cı ilin dekabrın əvvəllərində Nəsimi Məhkəməsinin hakimi Rəşid Səmədov, məhkəməyə iddia ərizəsinin 18.08.2016 – da daxil olduğunu və baxılmamış saxlandığını bildirib. Axı, təqaüdçü Nəsimi Məhkəməsinə iddia ərizəsi verməyib!(??) Belə bir özbaşınalığa Nizami Məhkəməsinin hakimi Fikrət Mirzəyev, 13 yanvar 2017-ci il tarixli məktubla “aydınlıq gətirib”. Heç demə, Nizami rayon Məhkəməsi 17.07.2016-cı il tarixli qərardadla ərizəni “aidiyyatı üzrə” (oxu : rüşvət qarşılığında) Nəsimi rayon Məhkəməsinə göndərib. Fikir verin, Nizami rayonunda yerləşən bankın Nizami filialına qarşı qaldırılan iddia 3 aydan sonra Nəsimiyə dəyişilib. Özü də iddiaçıya nə qərardad, nə də bildiriş verilmədən özbaşına başqa məhkəməyə göndərilməsi, MPM-ə ziddir. Axı, iddiadan şikayətvermə müddəti başa çatmadan iddianı başqa məhkəməyə göndərmək olmaz ! MPM-dən xəbərsiz olan məhkəmələrin, MPM-in 39-cu maddəsini də oxumaları məsləhətdir. Orada yazılıb ki, istehlakçı hüququnun müdafiəsi ilə bağlı iddialar, iddiaçının yaşayış yeri üzrə məhkəməyə verilə bilər və məhkəməni seçmək hüququ iddiaçıya məxsusdur. Bankın məhkəmələrə təzyiq edib məhkəmə təminatı hüququna və təqaüd hüququna qadağa qoymasına, yalnız Maliyyə Bazarlarına Nəzarət Palatası (MBNP) reaksiya verib . “Kapital Bank” ASC –nin idarə heyəti sədrinin 1-ci müavini Fərid Məmmədov, MBNP –nin baş icraçı direktoru İbrahim Alışova 21.12.2016-cı il tarixli məktubunda banka aid hissədə bildirib ki, “plastik kartlar üzrə tarif cədvəlinə əsasən, plastik kartın blokdan çıxarılması üzrə 2 manat xidmət haqqı, kartın hesabından silinmiş və plastik kart blokdan çıxarılmışdır”. Bu məktubla özbaşına təqaüddən faiz tutmasını açıqladığından, banka qarşı cərimə sanksiyası tətbiq edilməsi qaçılmazdır. Məhkəmə isə bankı öz rüşvət qaydaları ilə cərimələyib, Qarabağ əlilinin, Prezident təqaüdçüsünün 7 ay təqaüdündən məhrum edilməsinə qiymət vermir .
“Kapital Bank” 7 ay əlilin pulunu “fırladıb”, məhkəmə isə ərizəsini “fırladıb itirib”. Kim nə deyər belə hökumətə, belə hüquqa, belə banka, belə məhkəmə - hüquq sisteminə ?
Məğrur Bədəlsoy

gundemxeber.az