MTN bəlasından canı qurtarmış sahibkarlar indi Fazil Məmmədovun 4 + 1 faiz vergi soyğunçuluğu ilə üzləşiblər; iş adamlarına divan tutan vergilər nazirinin maxinasiyaları və bank fırıldaqları “Gündəm-Xəbər”də....
Prezidentin siyasətinə qarşı gedən Vergilər Nazirliyi “Gündəm-Xəbər” da daxil olmaqla MMC-ləri və şirkətləri çökdürür, sahibkarları müflisləşdirir - Şok rəqəmlər
Ləğv olunmuş Milli Təhlükəsizlik Nazirliyindən canı qurtarmış sahibkarlar indi daha bir dövlət qurumu ilə üzbəüz qalıblar. Vergilər Nazirliyi iş adamlarının başına oyun açmaqda davam edir. Bu haqda prezidentə, prokurorluğa çoxsaylı müraciətlər ünvanlanmaqdadır.
4 faiz + 1 oyunu



Dövlət başçısı sahibkarları iki illik vergidə azad etməsinə baxmayaraq, nazirlik iş adamlarını müflisləşdirmək siyasətindən əl çəkməyib. Sahibkarlar MTN-nin yerini Vergilər Nazirliyinin tutduğunu söyləyirlər.
Bu vəziyyət sahibkarları dövlətin üstünə qaldırır. Nazirlik məqsədli şəkildə yenə də sahibkarlığı sıxışdırıb sıradan çıxarmağa çalışır.
İqtisadi böhran getdikcə dərinləşir və iş adamlarına işləməyə imkan yaradılmalıdır. Amma vergi quramaları onları basqı altında saxlayır.
MTN bandası sahibkarları tək-tək ovlayıb zirzəmidə işgəncə verməklə pullarını alırdısa, yeni vergi oyunları isə onlara qarşı iqtisadi sanksiyadır.
Elə “Gündəm-Xəbər” bir MMC olaraq 4 faiz sadələşdirilmiş vergi ödəyir. Ancaq indi vergilər naziri Fazil Məmmədov təzə metoda keçib.
Belə ki, köçürmə pulların nəğdləşdirmə əməliyyatında əlavə vergiyə 1 faiz pulumuzdan tutulacaq və əlavə olaraq həmişə olduğu kimi bankda 0,06 faiz tutur. Bu qəzeti nə qədər satdıraq ki, Fazil Məmmədovun timsalında büdcəmiz dolsun?!
Bir neçə ay bundan öncə F. Məmmədov "ağıllı" təklif irəli sürdü ki, spirtli içkiləri və tütün məmulatlarının alışını kart variantına keçirək büdcəmiz dolsun. Bu təklif əhali arasında narazılıqla qarşılandı və prezident bu təklifi rədd etdi.
İndi isə Vergilər Nazirliyinin sadələşdirilmiş dörd faizdən əlavə bir faiz də pul tutması düzgündürmü və bununla büdcəni doldurmaq olarmı? Belə çıxır ki, artıq sadələşdirilmiş vergi ödəyiciləri 4 yox 5 faiz vergi ödəməli olur.
Nazirin TIR-ları və MMC-lərin qara günü
“Gündəm-Xəbər”in verdiyi məlumata görə, vergilər naziri Fazil Məmmədov dövlət büdcəsinin cəfasını çəkirsə, Rusiya və Ukraynaya TIR-larla vurduğu milyonları ölkəmizə sərf etsə heç də pis olmaz.
Hər kəs bilməlidir ki, bu məmurlar artıq xalqın rəsmi cibinə girib pulunu çəkir. Deyəsən, MTN Vergilər Nazirliyinə baxanda şükürlü olacaq. Çünki belə bir halın varlığı, bir MMC olaraq ümumi iş prosesimizin ləngiməsinə, bəzən də iflic olmasına gətirib çıxarır
Ümumiyyətlə, son vaxtlar respublikamızda yaşanan acınacaqlı durumun varlığından biri də, Vergilər Nazirliyi tərəfindən kiçik və yaxud da böyük istehsal müəssislərinə yaradılmış süni əngəllərin varlığıdır. Məsələn, adicə bir faktı qeyd edək.
“Gündəm Xəbər” qəzetinin redaksiyası olaraq hər ay satışdan əldə olunan gəlirə görə dövlətə 4%-lik vergi ödəyib, aidiyyəti üzrə rüblük hesabatlar da təqdim edirik. Yəni, istehsalçı tərəf olaraq qanunvericiliyin tələblərinə əməl edib fəaliyyətimizi davam etdiririk və lazımi vergi faizini də ödəyirik.
Faciə odur ki, əgər əvvəllər qəzetimizin satışı ilə məşğul olan müəssisələrlə, kassa mədaxil ordeninin qəbzi və yaxud da vəkalətnamələr, yəni ciddi sənədlər vasitəsilə nəğd hesablaşmalar aparırdıqsa, bu gün fərqli tələb-şərt mövcuddur.
Nazirliyin maxinasiyaları, siqaret biznesinə “əl qoymaq”
“Gündəm-Xəbər” yazır ki, hazırda həmin müəssisələr qəzetin satışından əldə olunan pulları bank hesabına köçürməyə vadar edilirlər və belə bir əməliyyatı həyata keçirərkən, banka xidmət haqqı olaraq 0,06% pul da ödəyirlər.
Elə ki, hesaba köçürülmüş pulları hesabdan götürmək lazım gəlir, o halda da istehsalçı tərəf olaraq yenidən 0,06 %-lik bank xidməti ödəməyə məcbur oluruq.
Deməli, istehsalçı tərəf olaraq “Gündəm Xəbər” qəzetinin satışı və satışından əldə olunan gəliri əldə etmək üçün, bir neçə dəfə xərcə düşməli oluruq.
Hətta elə hallar da olur ki, satışdan əldə olunan gəlirlərin banka köçürülməsi, yaxud da pul vəsaitlərinin bankdan çıxarılması olduqca problemə çevrilir. Belə bir halın varlığı, bir MMC olaraq ümumi iş prosesimizin ləngiməsinə, bəzən iflic olmasına da gətirib çıxarır.
Bu cür addımların atılması Vergilər Nazirliyi rəhbərliyinin yazıb-pozduğu maxinasiyalardan biridir ki, bu da çoxsaylı sahibkarların, o cümlədən “Gündəm Xəbər” qəzeti redaksiyasının da fəaliyyətini əngəlləməyə hesablanmış addımlardır.
Dəhşətli hal odur ki, iki həftədir köçürülən pulu hələ də əldə edə bilmirik. Bu da o deməkdir ki bizim min bir əziyyətlə ərsəyə gətirdiyimiz qəzetimizin satış pulundan banklar vasitəsi ilə müəyyən fırıldaqlarını həyata keçirirlər və eyni zamamda müstəqil olmalı olan mətbuatyayımı yüksək çinli məmurların əlində inildəyir.
Fazil Məmmədovun bu taktikası sahibkarların süründürməçiliyinə gətirib çıxartmaqdan başqa bir şey deyil. Biz zəhmətkeş sahibkarların haqqını yeyib min bir əziyyətə salan məmurlara dur
deyən olacaqmı? Təbii ki, yox. Ona görə yox deyirik ki, başımıza gətirilən bu oyunlardan prezidentin xəbəri yoxdur. Əgər olsa bu haqsızlıqlara bəlkə də son qoyular.
Departamentlə iki bankın oyunu
Bu məsələdə Bakı şəhər Ticarət Departamentinin də “əməyini” xüsusi vurğulamaq lazımdır. Çünki məhz onların sayəsində bu gün qəzet yayımı ən ağır günlərini yaşayır. Eyni zamanda yayım firmalarının da üzərinə məsuliyyət düşür.
Məhz yayım firmaları müstəqil fəaliyyət göstərsəydi bu vəziyyət yaranmazdı və bu sahə məmurların əlində cəmləşməzdi.
Bakı şəhər Ticarət Departamentinin əl qoyduğu "Yeraltı Keçidlər Üzrə Ticarət Birliyi" bu oyunun icraçılarıdırlar. "KapitalBank"ın Nəsimi rayon filialı bu oyunun iştirakçısına çevrilib.
Bu problemin varlığı mətbuat yayımların məmurların nəzarətində olması və mətbuat yayımlarının müstəqil olmamasıdır. Ən əsası odur ki, məmur özbaşınalıqları hər bir iş adamlarını rəzil günə salır.
Əlavə olaraq onu da vurğulayaq ki, hazırda qiymət artımının daha çox müşahidə olunduğu siqaret biznesinə də, Vergilər Nazirliyi “əl qoyub”.
Yəni, bu məhsulun alqı-satqısı ilə ilə məşğul olan iş adamlarına da, hesablaşmaların banklar vasitəsilə həyata keçirilməsi qaydası tətbiq olunub.
Belə bir səbəb üzündəndir ki, hazırda qiymət bazarında dəyəri 2 manata qədər olan siqaretlər 10 qəpik, dəyəri 2 manatdan yuxarı olan siqaretlərin qiyməti isə 20 qəpik bahalaşıb. Bu da hər şeydən öncə, sadə, olduqca imkansız olan hər kəsə ciddi təsirini göstərməkdədir.
Prokurorluğa ən çox bu nazirlikdən şikayət olub
“Gündəm-Xəbər”in yaydığı məlumata görə, belə olan halda hər kəs o qənaətə gələ bilər ki, Vergilər Nazirliyinin sahibkarlara qarşı bu cür tələb-şərt qoyması, boşaldılmış büdcənin doldurulmasına hesablanmış addımıdır.
Amma onu da unutmaq olmaz ki, bu gün Azərbaycanda fəaliyyət göstərən hər bir bank, hansısa iri ranqlı oliqarx məmurun, yaxud da yüksək çinli vəzifə sahibinindir.
Onu da deyək ki, ölkədə ən çox korrupsiyalaşmış qurumların adları açıqlanıb. Baş Prokurorluq yanında Korrupsiyaya Qarşı Mübarizə Baş İdarəsinin rəisi Kamran Əliyev statistikanı açıqlayıb.
K.Əliyev bildirib ki, Vergilər Nazirliyindən 48, rayon məhkəmələrindən 37, Bələdiyyələrlə İş üzrə Mərkəzdən 23, İqtisadiyyat Nazirliyindən 9 material Korrupsiyaya qarşı Mübarizə Baş İdarəsinə daxil olub.
Göründüyü kimi, ən çox şikayət və müraciətlər Vergilər Nazirliyi ilə bağlı olub. Fazil Məmmədovun rəhbərlik etdiyi nazirlik yenə də korrupsiya piramidasının zirvələrinə ucalıb.
Prezident iş adamlarını 2 illik vergidən azad etsə də, nazirlikdə son 2 ay ərzində kadr islahatları həyata keçirilsə də, yenə də siyahının başında Vergilər Nazirliyi qərarlaşıb.
Bu faktlar nazirliyin fəaliyyətindən narazılar ordusunun olduğuna sübutdur. İş adamları, sahibkarlar, biznes sahəsində çalışanlar vergi müfəttişlərindən cana doyub. Vergilər naziri ölkə rəhbərliyinin yanında etimadını kifayət qədər itirib.
Prezident İlham Əliyev müşavirələrin birində əsassız vergi yığımlarını xatırladarkən F.Məmmədovun istefaya göndəriləcəyi güman edilirdi.
Amma nazirin səs-küylü istefasına gedilmədi. Əvəzində illik dövriyyəsi 120 min manatdan aşağı olan sahibkarlıq subyektlərində səyyar vergi yoxlamaları qanunla qadağandır.
Bu, naziri istefaya yollamaqdan daha ağır qərar idi. Nazirin əl-qolunun bağlanması, rüşvət yığımı imkanlarının məhdudlaşdırılması ona istefa getmək qədər böyük zərbə idi. Görünür ki, nazir prezidentin göstərişlərinə zidd fəaliyyətini davam etdirməkdən çəkinmir.
Sahibkarların nəfəsliyi də bağlanıb
“Gündəm-Xəbər”in media üzərindən yaydığı məlumata görə, Gədəbəy rayonunun icra başçısı Ramiz Yediyarov və Binəqədi rayonunun icra başçısı Xaləddin İsgəndərovu rayon icra başçıları arasında sahibkarların çökdürülməsi üzrə çempion adlandırmaq olar.
Bu 2 rayonun icra başçısınin adı ölkə mətbuatının gündəmindən düşmür. Hər yeni gün bu biznesmen ovçularının fəaliyyətlərinə yeni çalar əlavə olunur. Vergilər naziri Fazil Məmmədovun qeyri-rəsmi quberniyasına daxil olan bu rayonlarda mülkləri yağmalanan sahibkarların ah-nalələri televiziya ekranlarına qədər gəlib çıxır.
Ümumiyyətlə, internet resurslarında axtarış verməklə kifayət qədər şikayət məktublarına rast gəlmək olar. Onların əksəriyyəti vergi müfəttişlərinin özbaşınalıqlarından, iş adamlarına qan uddurmasından bəhs olunur.
İş adamları vergilər nazirinin dəyişməsi ilə bəlkə müsbət irəliləyiş olacağına ümid edirlər. Çünki böhran davam etsə də, nazir heç bir islahata həyata keçirmir.
Ekspertlər hesab edirlər ki, nazirlərin “yarpaq tökümü” davam edəcək. Artıq hədəfdə olan növbəti nazirin kimliyi barədə ilkin versiyalar ictimaiyyət arasında səsləndirilməkdədir. Bu, vergilər naziri Fazil Məmmədovdur.
Hökumət iqtisadiyyatın liberallaşdırılması prosesini həyata keçirməlidir. Əvvəlki kimi hökumətin maliyyə resursları yoxdur. Yeganə çıxış yolu sahibkarlığın dəstəklənməsidir. Bu yolda yeganə maneə hakimiyyətdə sahibkarlığa qənim kəsilən bəzi strukturlardır.
Sahibkarlara bu qurum ciddi problemlər yaradır. Onların əmlakının müsadirə edilməsi prosesində Vergilər Nazirliyi də aktiv görünür.
Əgər hakimiyyət sahibkarlığa qənim kəsilən qurumların, şəxslərin qarşısını almasa, ölkəni iqtisadiyyat böhranından çıxarmaq mümkün olmayacaq. Mövzunu diqqətdə saxlayacağıq.

Rafiq Qara