VERGİ CİNAYƏTLƏRİNİN VERGİLƏR NAZİRLİYİNDƏ ARAŞDIRILMASI QANUNSUZDUR

İnsanların başlıca olaraq təhqiqat, istintaq, araşdırma orqanlarının qanunsuzluqlarından narazılığı getdikcə artmaqdadır. Bu orqanların nə maddi, nə də prosessual hüquqa sayğı göstərməməsi acı gerçəkdir. El dili ilə desək, müstəntiqin kəsdiyi başa sorğu – sual yoxdur. Hər hüquq – mühafizə orqanının özünün istintaq qurumunun olması isə sorğu – sualsız “kəsilən başların” günü – gündən daha da çoxalmasına nədən olur . İstənilən nazirliyin, orqanın istintaqçısı, təhqiqatçısı, araşdırmaçısı öz rəhbərinin sözündən necə çıxa bilər? Sözə baxmamazlığı işinin itirilməsilə və hətta məkum edilməsilə sonuclanar axı! Uzağa niyə gedək. Elə Zərdab rayon prokurorluğunun müstəntiqi Rüfət Səfərovun “cinayət işini” prokurorluğun araşdırması nə dərəcədə düzgündür və məntiqə uyğundur? Bu faktın özü də ölkədə ayrıca istintaq komitəsinin yaradılmasının gərəkliliyini ortaya qoyur. Di gəl, nazirliklərin yanında yeni – yeni istintaq, araşdırma departamentləri, idarələrinin yaradılmasına qərar verilir. Vergilər Nazirliyi (VN) yanında Vergi Cinayətlərinin İbtidai Araşdırılması Departamenti kimi .
Adından görünür ki, bu Departament vergi cinayətlərini araşdırır. Belədə niyə bu qurum VN – in yanında olmalıdır? Axı, vergi cinayətlərini təkcə vergi ödəyiciləri yox, həm də vergi məmurları edə bilər və elə edirlər də! Belə çıxır, Baş prokuor yanında “prokurorluq cinayətləri”, DİN – in yanında “polis cinayətləri”, Ədliyyə Nazirliyinin yanında “ədliyyə cinayətləri”, Dövlət Gömrük Komitəsinin yanında “gömrük cinayətləri” və s. departamentləri yaradılmalıdır? Axı, bunun vətəndaşa “torba tikməkdən”, sahibkarı bəri başdan “cinayətkar “ sayıb məhbəsə atmaqdan başqa hansı sonucu ola bilər? Fikrimizcə, Vergi Nazirliyinin sözügedən departamentinin adı görəvinə, görəvi də adına uyğun gəlmir. Fikir verin, az qala hər gün bu departament “əməliyyat – axtarış tədbiri nəticəsində” qanunsuz sahibkarlıqla məşğul olan “cinayətkarları” müəyyən edib həbs edir və vətəndaş sahibkarın təqsirli olması barədə mediaya operativ məlumat ötürür! Axı, bu Konstitusiyanın 63 – cü (“Təqsirsizlik prezumpsiyası”) maddəsinə ziddir! Deməli, vergi araşdırıcıları Ana Qanunu pozmaqla, əməliyyat – axtarış fəaliyyətində qanunun tələbini pozmaqla özləri də qanunsuzluq etmiş olurlar. Bunun özü elə vergi cinayəti deyilmi? Daha böyük qanunsuzluq isə vergi cinayətlərinin rüşvət qarşılığında ört – basdır edilməsidir. “Gündəm Xəbər” bildirir ki, Bakının eyni rayonunun eyni qəsəbəsində - Sabunçu rayonu, Bakıxanov qəsəbəsində eyni gündə iki ayrı vergi ödəyicisi “qanunsuz idman mərc oyunlarının təşkili” adı ilə həbs edilir, 80 kv.m.-lik obyektdə “cinayət edən” şəxs 3 günə buraxılır, amma 15 kv.m.-lik “əlil köşkü”nü “cinayət köşkü”nə çevirən gözdən əlil Qarabağ savaşı veteranı 3 aydır həbsdədir !?? Bu ayrı –seçkiliyin rüşvətdən qaynaqlanması və vergi cinayəti olması bəyəm açıq – aşkar deyil? Bir qanunsuzluğu da vurğulayaq. VN - in sözügedən “ cinayət departamenti” yaydığı “cinayət məlumatları”nda həbs etdikləri şəxslərin illərdir qanunsuz idman oyunlarından milyonlarla gəlir götürdüklərini bildirir. 2 ay öncə Gəncədə 2011-ci ildən qanunsuz idman oyunu keçirmələrinə görə tutulanların bir milyondan yuxarı gəlir götürmələrinin necə hesablandığını qırağa qoyaq. Bəs axı, bu illər ərzində əraziyə baxan vergi orqanları, məmurları bunu niyə görməzliyə vurub? Deməli, rüşvət qarşılığında qanunsuzluq ediblər. Bunun da adı vergi cinayətidir, korrupsiya cinayətidir və vergi məmurlarının araşdırma predmetinin ola bilməzliyi gün kimi aydındır.
VN –in sözügedən departamentinin bir çox qəzetləri, KİV – i, QHT-ni astronomik məbləğdə vergi cinayətlərində suçlaması isə bir yandan sifarişdirsə, digər yandan tənqidə qarşı dözümsüzlüyün göstəricisidir, başqa media orqanlarına “cızıqdan çıxmama” xəbərdarlığıdr və sözsüz vergi cinayəti kateqoriyasına aiddir .
Vurğuladıqlarımız VN – in vergi cinayətlərini araşdırmasını yolverilməz edir. Bu cinayətlərin başında elə vergi məmurlarının dayandığına görə .

Məğrur Bədəlsoy