“Gündəm Xəbər” bildirir ki, bu günlərdə Bakı Şəhər Baş Dövlət Yol Polis İdarəsinin ictimaiyyətlə əlaqələr şöbəsinin rəisi, polkovnik Vaqif Əsədov açıqlama verərək jurnalistlər üçün ayrılan binadan ev almaq istəyini bildirdi. Uzun illər jurnalistlərin dostu kimi tanınan Vaqif Əsədov bu açıqlamadan sonra gözlənilmədən jurnalistlərin hədəfinə gəldi. Ən qəribəsi isə budur ki, Vaqif Əsədova qarşı basqı edənlərin əksəriyyəti hakimiyyətə yaxın mətbu orqanlardır.



Bunun səbəbini isə bilmək o qədər də çətin deyil. Belə ki, dəfələrlə Vaqif Əsədovun görəvindən ayrılması üçün ona qarşı kompaniyalar təşkil edilmişdi və hər dəfə Vaqif Əsədov bu maneələri dəf edərək haqlı olduğunu sübut edə bilmişdi. Bundan başqa onun media nümayəndələri arasındakı nüfuzuda onun rəqiblərinə problem yaradırdı. İndi isə ələ düşən fürsətdən istifadə edərək Vaqif Əsədovun ictimai nüfuzuna zərbə vurmağa çalışırlar. Amma polkovnik Vaqif Əsədov adəti üzrə yenə cəmiyyətə açıq olaraq konkret mövqeyini ortaya qoydu:”Haqqında yazılan onu gözü götürməyənlərin növbəti qarayaxmalarıdır. Əvvəla, mənim evim yoxdur. Ailə üzvlərim isə çoxdur. Siz heç bilirsiniz, mənim nə qədər ailə üzvüm var? Kimin nə yazdığından asılı olmayaraq, Allah alnımıza nə yazıbsa, o da olacaq. Sosial şəbəkələrdə haqqımda yazılanlar ürək bulandırmadan, paxıllıqdan başqa bir şey deyil. Mənzil almaq üçün müraciət etmişəm, ya etməmişəm ondan kimə nə? Əgər yazırlarsa ki, Vaqif Əsədovun villası filanı var, yenə deyirəm, bu ancaq paxılıq hissidir, onlar haqq-ədalət hissini unudublar. Əgər haqqımda yazılanlar həqiqətən varsa, onda başqaları buna niyə kədərlənir, niyə paxıllıq hissini ortaya qoyurlar? Tutaq ki, evim var, yenə də ev istəyirəm. Bunun kimə nə aidiyyatı var, heç bilirlər mən hansı şəraitdə yaşayıram? Ən azından məni mətbuat nümayəndəsi kimi qəbul edənlər, necə olur ki, ev üçün müraciətimə belə reaksiya verirlər. Belə çıxır ki, mən sizdən deyiləm? Evi olan, ya olmayan müraciət edir, bu onların düşüncəsidir. Haqqımda yazılanlar cəfəngiyyatdır. Bu cür yazanlar fəaliyyətimə paxıllıq edənlər, yaxşı işlərimi gözü götürməyənlərdir”.
Xatırladaq ki, Mətbuat işçilərinin mənzil şəraitinin yaxşılaşdırılması məqsədilə dövlət başçısı İlham Əliyev jurnalistlər üçün 255 mənzilli bina tikilməsilə bağlı Sərəncam imzalayıb.

Cəfər
gundemxeber.az