2017.09.20 00:50

Meksikanın Pueblo şəhərində 7,1 bal gücündə zəlzələ baş verib.

Dəhşətli zəlzələ baş verdiyi şəhər paytaxt Mexikonun 123 km-də yerləşir.

Təbii fəlakət nəticəsində xeyli yaşayış binası, inzibati tikililər dağılıb.

***

Zəlzələ nəticəsində Morelos ştatında ən azı 42 nəfər ölüb.

Bu barədə Morelos ştatının qubernatoru Qrako Ramires məlumat verib.

Daha 3 nəfərin isə Puebla ştatında öldüyü barədə məlumat daxil olub.

Qeyd edək ki, zəlzələ Bakı vaxtı ilə 22:14 baş verib. Zəlzələnin episentri Puebla-de-Saraqos şəhərindən 49 km cənub-qərbə düşüb. Episentr həmçinin Tepeoxuma yaşayış məntəqəsinin 8 kilometrliyində olub.

Zəlzələ ocağı 60 km dərinlikdədir.

Zəlzələ paytaxt Mexikoda da güclü şəkildə hiss edilib. Mexikodakı Benito Xuares adına beynəlxalq hava limanı fəaliyyətini dayandırıb.

***

Meksikanın Qəza-Xilasedici Xidmətinin rəhbəri Luis Felipe 44 nəfərin öldüyünü rəsmən təsdiqləyib. O bildirib ki, Morelos ştatında 42, Mexikoda isə 2 nəfər ölüb.

***

Meksikada zəlzələ nəticəsində ölənlərin sayı 149-a çatıb.

Bu haqda Meksikanın Qəza-Xilasetmə Xidmətinin rəisi Luis Felipe Puente Tviter hesabında qeyd edib.

"Hazırda olan məlumata görə, Morelos ştatında 55, Mexikoda 49, Puebla ştatında 32, Mexiko ştatında 10, Qerrero ştatında 3 nəfər ölüb.", - deyə o bildirib.

***

Meksikadakı dəhşətli zəlzələ nəticəsində ölənlərin sayı 226-ya çatıb.

***

"Hazırda dağıntılar altından 248 deyil, 216 meyit çıxarılıb" - Luis Felipe Puentenin yaydığı məlumatda bildirilir.