Nəhayət də istədiklərini əldə etdilər. 2019-cu ildən etibarən Azərbaycanda ali məktəblərə qəbul imtahanı dəyişdiriləcək. Azərbaycan test sistemi ilə vidalaşır, gözəl ölkəmizdə test sisteminə ehtiyac qalmayacaq.

Sentyabrın 20-də Dövlət İmtahan Mərkəzinin (DİM) Direktorlar Şurasının sədri Məleykə Abbaszadə Təhsil Nazirinin müavini və mütəxəssislərlə görüş keçirib. Görüşdə Azərbaycan ali və peşə məktəblərinə yeni qəbul modeli ətrafında müzakirələr aparılıb. Görünən odur ki, 2018-ci ildə Azərbaycan da orta məktəbi bitirən şagirdlər son dəfə test üsulu ilə ali məktəblərə qəbul imtahanı verəcək. Bununla da, 1992-ci ildən ölkəmizdə tətbiq edilən test üsulu ləğv ediləcək, onu yeni qəbul modeli əvəzləyəcək. Yeni metodda rüşvətlə ali məktəblərə daxil olmaq mexanizminin hansı səviyyədə olacağı haqda indidən konkret söz demək doğru olmazdı, ancaq bu qətiyyən istisna edilə bilməz!

Bir çox mütəxəssislər əslində Azərbaycanda test üsulunun ləğvini ciddi geriləmə kimi qiymətləndirir. Əlbəttə, test üsulunun tətbiqində müəyyən yeniliklərə getmək, bəzi yanaşmaları dəyişmək olar. Ancaq ümumilikdə bu sistemin ləğv edilməsi təhsil sisteminə ciddi zərbə olacaq.

Niyə?

1992-ci ildə hakimiyyətə gələn mərhum prezident Əbülfəz Elçibəy hər zaman deyirdi ki, onun bu xalq qarşısında iki xidməti var. Birincisi, 70 ildən sonra rus ordusunu Azərbaycandan çıxartmağı, ikincisi, Azərbaycanda layiqli olan hər kəsin ali məktəblərdə oxumasını təmin etmək məqsədilə ali məktəblərə daxil olmaq üçün qurduğu test sistemi.

Elçibəyin test sisteminə bu qədər üstünlük verməsi, ona qarşı olan müqavimətləri qıraraq testin tətbiqinə nail olmasına adi hadisə kimi baxmaq olmaz. Çünki əslində Elçibəy prezidentliyə və siyasətə elm və təhsildən gəlmişdi. O, uzun illər Bakı Dövlət Universitetində, Azərbaycan Milli Elmlər Akademisyasında işləyən bir mütəxəssis olaraq ali məktəblərə qəbul imtahanlarının necə aparıldığını, bu imtahanlardan kimlərin qazandığını, kimlərinsə istedadının məhv edildiyini gözəl bilirdi. Məhz bunu bildiyi üçün də 25 il əvvəl Azərbaycanda professorların, elmlər akademiklərinin, elmlər doktorlarının və elmlər namizədlərinin ciddi müqavimətinə baxmayaraq ali məktəblərə qəbulda yeni metod ortaya qoydu-TEST ÜSULU.

Ona qədər çoxsaylı abituriyentlər olub ki, hüquq fakultəsinə 7, Tibbi Universitetinə isə 6 dəfə imtahan verdikdən sonra qəbul olublar. Bunlar kasıb uşaqları, yetim balaları olub. Məhz ona görə də, test üsulu Azərbaycan təhsil sistemində inqilab hesab olunurdu.

İndisə bəlli olur ki, ali məktəblərə yeni qəbul metodu zamanı abituriyentlərə konkret suallar veriləcək və onlar da bu suala cavab verməli olacaq. Daha qarşılarına qoyulan 4 cavab variantından birini seçməli olmayacaq. Beləcə ölkəmizdə yenidən 25 il əvvəlkinə bənzər qəbul metodu işə düşəcək. Kimlərsə qaz vurub qazan dolduracaq, zəngin təbəqə çevriləcək. Yüzlərlə məzun və abituriyentlər isə layiq olduqlarına rəğmən universitetlərə qəbul ola bilməyəcək və istedadları ortaya çıxarılmayacaq.

Bir sözlə, talehsiz bir Azərbaycan qəbul modeli.