Ünvanlanan məktublara cavab verilməməsinin kökündə, PA-da Humanitar məsələlər üzrə şöbə müdiri vəzifəsini daşımış Fatma Abdullazadənin bəslədiyi ögey münasibət olub

İnsan dünyanın ən ali varlığıdır və onu aliləşdirən amillərdən ən əsası da, məhz əməkdir. Qədim zamanlardan müasir dövrümüzə qədər ötən minilliklərə, əsrlərə, onilliklərə və s. nəzər saldıqda görürük ki, insanlar öz zəhmətləri müqabilində daha uca zirvələr fəth ediblər, sayı-hesabı bilinməyən naliyyətlərə imza atıblar. Bir sözlə, əmək insanı həm ucaldır, həm də formalaşmasına olduqca təsir edir. İşlə məşğul olan insan heç kimə möhtac olmadığından, belə insanlara ətrafındakılar həmişə hörmət və pərəstiş etmişlər.

Hələ sövet dönəmində “insan əməklə ucalır” şüarı, sanki hər kəsin dilinin əzbərinə çevrilmişdi. Adicə onu vurğulamaq yerinə düşər ki, həmin illərdə nümunəvi əmək fəaliyyəti nümayiş etdirənlərin bəzilərinin əməyi, nəinki müxtəlif fəxri adlarla, pul mükafatları ilə və s. mükafatlandırılırdı, hətta həmin şəxslərdən elələri olurdu ki, onlar yuxarı seçkili orqanlara deputat da seçilirdilər. Elə ki, 1991-ci ilin 18 oktyabrında dövlət müstəqilliyimiz elan olundu, həmin vaxtlardan başlayaraq insan əməyi və onun qiymətləndirilməsi ilə bağlı müəyyən Qanun lahiyələri işlənib hazırlandı. İllər keçdikcə qeyd olunan lahiyənin təkmilləşməsi yöndə müxtəlif addımlar atıldı ki, bu da tam əksəriyyət tərəfindən lazımınca qiymətləndirildi. Atılan addımlardan biri də, Azərbaycan Respublikası vətəndaşlarına fəxri adların verilməsi haqqında Əsasnamənin qəbul edilməsi oldu. Belə ki, həmin Əsasnamədə insan əməyinin qiymətləndirilməsi və hansı şərtlər daxilində həmin şəxslərin fəxri adlara layiq görülməsi, tam aydınlığı ilə qeyd olunub. Məsələn, mühəndis fəxri adlarının verilməsi haqqında Əsasnamənin 4-cü bəndində qeyd olunub ki, “Əməkdar mühəndis” fəxri adı sənaye, tikinti, nəqliyyat, rabitə, meliorasiya, aqrar sahə müəssisələrində, elmi-tədqiqat və digər təşkilatlarda xüsusi xidmətlər göstərmiş və ixtisası üzrə ən azı 15 il işləmiş mühəndislərə verilir. Əsasnamənin 5-ci və 6-cı maddələrində isə qeyd olunur ki, fəxri adlar yalnız Azərbaycan Respublikası Prezidentinin şəxsi təşəbbüsü ilə, Azərbaycan Respublikası Milli Məclisinin və Nazirlər Kabinetinin təqdimatı əsasında verilir. Fəxri adların verilməsi ilə bağlı yuxarı orqanlar qarşısında vəsadət, bir qayda olaraq fəxri ada təqdim edilənin işlədiyi əmək kollektivində qaldırılır.

Belə bir Əsasnamənin qəbul edilməsinə baxmayaraq, bir neçə gün bundan əvvəl Bakı şəhəri, Qaradağ rayonu Sahil qəsəbəsi Ş.Əsgərov küçəsi ev-16, mən-52 ünvanda yaşayan Əbdülrəhmanov Süleyman Kərim oğlu, “Gündəm Xəbər”in redaksiyasına ünvanladığı müraciətində hansısa probleminin varlığını deyil, məhz ona “Əməkdar mühəndis” fəxri adının verilməməsini ifadə edir. O, müraciətində yazır ki, “mənim belə bir fəxri ada layiq görülməyim üçün tam əsaslar olsa da, amma nədənsə hələ ki, haqqıma qovuşa bilməmişəm. Çünki, mən 40 il istehsalat təcrübəsinə, operativ təşkilatçılığa və düzgün qərar qəbul etmək bacarığına malik peşəkar mütəxəssis olmuşam. Odur ki, ötən illər ərzindəki fəaliyyətim haqda müəyyən məlumatları hər kəsin diqqətinə çatdırmaq istəyirəm ki, bu gün haqqımı tələb etməkdə haqlıyam, yoxsa buna haqqım şatmır?
Əvvəla onu qeyd edim ki, mən Bakı şəhərinin Qaradağ rayonu ərazisində fəaliyyət göstərən “STR” MMC-də 2008-ci ilin avqust ayından 2016-cı ilin may ayınadək baş mühəndis vəzifəsində çalışmışam. 2013-cü ildə yaş həddi ilə əlaqədar (63 yaş) təqaüdə çıxsam da, peşəkar mütəxəssis olduğumdan cəmiyyətin rəhbərliyi məni daha dörd il daşıdığım vəzifədə saxladı. 2014-cü ildə cəmiyyətin rəhbərliyi çalışdığım sahəyə münasibətimi və bu vəzifə təyinatıma qədər, yəni 1986-1994-cü illər ərzində Azərbaycan Respublikası Dövlət Neft Şirkətinin (ARDNŞ) nəzdində fəaliyyət göstərən Bakı Dərin Özüllər Zavodunda əldə etdiyim istehsalat uğurlarımı əsas tutaraq, (təsdiq olunmuş sənədlər əsasında) mənə “Əməkdar mühəndis” fəxri adının verilməsi məqsədilə, ölkə rəhbərliyi qarşısında vəsadətin qaldırılması üçün, eyni gündə (03 sentyabr 2014-cü il tarixdə) Milli Məclisə (cavablı № 55102824671AZ) və Nazirlər Kabinetinə (cavablı № 55102824671AZ) “STR” MMC-ə məxsus məktubla təqdimat göndərdi. Təəssüflər olsun ki, ötən müddət ərzində nə Milli Məclisdən, nə də Nazirlər Kabinetindən göndərilmiş təqdimata hər hansı cavab verilmədi.

2013-cü ildə yaş həddi ilə əlaqədar təqaüdə çıxsam da, 2014-cü, 2015-ci və 2016-cı illərdə “STR” MMC-nin rəhbərliyi eyni məzmunlu təqdimatı cənab Prezidentə də ünvanladı. Yenə də qarşı tərəfdən ünvanlanan təqdimata hər hansı cavab verilmədi. Belə olan təqdirdə ötən üç il ərzində öz adımdan Prezident Administrasiyasına 5 ədəd, ölkə rəhbərinə 13 ədəd (həmin məktublardan 7-si cavablı, 6-sı isə Prezidentə məxsus elektron poçta göndərilib), Mehriban xanım Əliyevaya 3 ədəd məktub (cavablı) ünvanlasam da, üstüstə göndərdiyim 21 ədəd məktubdan heç birinə cavab verilmədi. Ünvanlanan məktublara cavab verilməməsinin kökündə, birbaşa PA-da Humanitar məsələlər üzrə şöbə müdiri vəzifəsini daşımış Fatma Abdullazadənin bəslədiyi ögey münasibətin varlığı oldu. Yəni, o, ünvanlanan məktubları ya itbata saldırdı, ya da arxivdə saxlatdırdı. Sanki elə bil mənimlə bərabər, “STR” MMC-nin rəhbərliyi də heç bir müraciət ünvanlamayıb.
Hal-hazırda 68 yaşım var və ömrüm boyu heç vaxt belə bir sayğısızlıq görməmişəm. İşlədiyim illər ərzində həmişə peşəkar mühəndis olmuşam və nümunəvi əmək fəaliyyəti də nümayiş etdirmişəm. Adicə onu vurğulayım ki, Bakı Dərin Özüllər Zavodunda işlədiyim 10 il ərzində mənə iki dəfə mənzil verilib. 1986-cı, 1987-ci, 1988-ci və 1989-cu illərin yekun nəticələrinə görə, dörd dəfə “İlin Ən Yaxşı Səmərələşdirici” mühəndisi adına layiq görülmüşəm. Dörd dəfə fəxri fərmanla təltif olunmuşam və dörd dəfə yüksək məbləğdə pul mükafatı da almışam. Ötən illər ərzində 88 texniki səmərələşdirici təklifin müəllifi olmuşam və həmin təkliflərimdən 62-si istehsalatda tətbiq olunub. Mənim irəli sürdüyüm təkliflərdən, ötən illər ərzində təkcə ARDNŞ onmin manatlarla iqtisadi gəlir əldə edib. Hətta yaxşı əmək qabiliyyəti nümayiş etdirdiyimə görə, 1992-1994-cü illər ərzində ARDNŞ-nin nəzdində olan zavodların birində direktor vəzifəsini də daşımışam. DQ müharibəsinin qızğın çağlarında cəbhə zonalarına, o cümlədən Gədəbəy rayonu ərazisində və Murovdağ ətrafında olan hərbçilərimizə, rəhbərlik etdiyim zavodun gəlirləri hesabından təmənnasız olaraq 3,128 milyon manat (həmin illərdə manatın dəyərinə uyğun) metal körpü gövdələri, su çənləri və s. vermişəm. Bundan əlavə, zavod direktoru vəzifəsini daşıyarkən şəxsən ulu öndər Heydər Əliyevin birbaşa nəzarətində olan və Azərbaycanla İran İslam Respublikası arasında inşa olunan, eyni zamanda olduqca dövlət əhəmiyyətli Xudafərin körpüsünün vaxtında və yüksək keyfiyyətlə inşa olunmasında da yaxından iştirak etmişəm. Əlişir Ləmbəraniskinin bizim istehsalat birliyinə göndərdiyi müsbət rəyə görə, yüksək pul mükafatına layiq görülmüşəm və bununla bağlı rəsmi sənədlər də var.

Zavod direktoru olduğum illər ərzində müəssisənin aylıq şablon planını 6,5 milyon manatdan 13 milyon manata qaldırmaqla bərabər, (rekonstruksiya və işlərin daha yaxşı təşkilinə görə) illik satışdan gəlir planını 78 milyon manat artırmağa da nail olmuşam. Hər kəs Azərbaycanın dövlət statistikasına diqqət yetirsin və görsün müəyyən edə bilirmi ki, hansısa zavodun rəhbəri dövlət planını bir ildə iki dəfə artırmağa nail olub və ölkəsinə 78 milyon manat gəlir verib. Bütün bunlarla bağlı da, lazımi sənədlər var.
Bakı Dərin Özüllər Zavodunda baş mexanikin müavini olarkən, zavod Texniki Yaradıcılıq Klubunun sədri (işdən sonra həftədə iki dəfə ödənişli ikinci vəzifəm olub), zavod əmək kollektivi şurasının üzvü seçilmişəm. Zavod direktoru vəzifəsini daşıyarkən Qaradağ rayon İcra Hakimiyyəti Aparatının xahişi ilə, şəhid Quliyev Ruslan Cəfər oğluna məxsus məzarın ətrafına zavodun gəliri hesabına dəmir hasar hazırlanaraq quraşdırılmışdır. Qanlı-qadalı döyüşlərdə hər iki ayağını itirmiş Arif Tahirova isə, zavodun gəlirləri hesabına dəmir qapı hazırlanmış və ona məxsus mənzilə quraşdırılmışdır. Gədəbəy rayon İcra Hakimiyyətinin köməyi hesabına üç ton kartof, hər kəsə 25 kq olmaqla zavodun işçilərinə təmənnasız verilmişdir. Həmin vaxt iki nəfər qaçqını zavodda işlə təmin etmişdik. Sadaladıqlarımla bağlı rəsmi sənədlər var.
Bütün bunlardan sonra belə bir qənaətə gəlirəm ki, bu günə kimi “Əməkdar mühəndis” fəxri adını ala bilməməyimin əsas səbəbi, sabiq şöbə müdiri Fatma Abdullazadənin ünvanlanan məktublara sayğısızlıq etməsi oldu. Adı çəkilən xanım “STR” MMC-nin (sahibkarın) Ədliyyə Nazirliyindən, Vergilər Nazirliyindən, Dövlət Gömrük Komitəsindən və Fövqəladə Hallar Nazirliyindən qeydiyyatdan keçməsinə, dövlətin təsdiq etmiş olduğu nizamnamə və sertifikatı əldə etməsinə baxmayaraq, sabiq şöbə müdiri üzərinə düşən vəzifə borcunu yerinə yetirməmiş və belə bir addımı ilə sahibkarı açıq-aydın şəkildə saya salmamışdır. Ən pis hal isə, Fatma Abdullazadənin Prezidentin qarşısında sahibkarın təqdimatlarını ölkə rəhbərinə təqdim etməməsi olmuşdur. Necə olur ki, vaxtilə SSRİ-nin rəhbərliyində olanlar Kalaşnikovu bütün dünyaya tanıtdırdılar, amma qanuni əsaslarla fəaliyyət göstərən sahibkarın Fatma Abdullazadəyə ünvanladığı təqdimatları o, cənab Prezidentə çatdırmırdı. Yəni, mənim “Əməkdar mühəndis” fəxri adını ala bilməməyil üçün o, lazımi addımlarını atmadı.
O hala da diqqət yetirmək lazımdır ki, “STR” MMC özəl cəmiyyət olsa da, istehsalatda əldə etdiyim uğurlara ARDNŞ-nin nəzdində olan müəssisələrdə nail olmuşam və bütün sənədlər də, məhz həmin müəssisələrin həmkarlar təşkilatlarına məxsus möhürlərlə təsdiq olunub. Zamanında ali təhsil aldığım üçün, bu gün də dövlətimizə borcluyam və xalqımı, Vətənimi sevən, yürüdülən dövlət siyasətini dəstəkləyən şəxslərdən biriyəm. Son olaraq onu da vurğulayım ki, mən ötən illər ərzində müxtəlif vəzifələrdə çalışmışam, strateji əhəmiyyət kəsb edən Xudafərin körpüsünün tikintisində aktiv rol oynayan rəhbər şəxs olmuşam, istehsalat sahələrində nümunəvi əmək fəaliyyəti nümayiş etdirdiyimə görə, bir neçə dəfə yüksək məbləğdə pul mükafatı da almışam, DQ müharibəsinin qızğın çağlarında könüllü milli orduya təmənnasız 3.128 milyon (1992-ci ildə manatın məzənnəsinə uyğyun) köməkdarlıq etmişəm, direktoru olduğum zavodun işçilərinə pulsuz kartof paylatdırmışam, dörd dəfə fəxri fərmanla təltif olunmuşam, bir sözlə 40 il istehsalat sahələrində çalışmışam. Bütün bunların qarşılığında isə, hələ də mənə “Əməkdar mühəndis” fəxri adını vermirlər. Baxmayaraq ki, “Azərbaycan Respublikasının fəxri adları haqqında” Əsasnamənin 4-cü bəndinin tələblərini əsas tutaraq, “STR” MMC-nin direktoru Mirzə Həmidov öz imzası ilə təsdiq etdiyi təqdimatı 11 mart 2014-cü il tarixdə həm Baş Naziri cənab Artur Rasizadəyə, həm Milli Məclisin sədri cənab Oqtay Əsədova, 05 noyabr 2014-cü il tarixdə isə Prezident Administrasiyasına, hətta Azərbaycan Respublikası Dövlət Neft Şirkətinin prezidenti cənab Rövnəq Abdullayevə də ünvanlamışdı. Təqdimatın məzmununda qeyd olunurdu ki, “STR” MMC-nin baş mühəndisi Abdulrəhmanov Suleyman Kərim oğlu bizim müəssisədə 2008-ci ilin avqust ayından çalışır. İxtisasca mühəndis-mexanikdir. 1974-cü ildə Azərbaycan Politexnik İnstitutunu bitirib. Hal-hazırda baş mühəndis işlədiyi “STR” MMC-də öz vəzifəsinin öhdəsindən bacarıqla gəlir. İşçi heyyət və mühəndis texniki işçilərlə işləməyi bacarır, rəhbərliyin bütün göstəriş və tapşırıqlarını vaxtında və dəqiq yerinə yetirir.
Suleyman Abdulrəhmanov “STR” MMC-yə qəbul olunarkən onun təqdim etdiyi sənədlərdən görünür ki, o, 1983-1989 və 1992-1994-cü illərdə indiki Heydər Əliyev adına Bakı Dərin Özüllər zavodunda (BDÖZ) baş mexanikin müavimi, sonra isə Mexaniki Təmir Zavodunun direktoru vəzifələrində çalışmışdır. Bu müddətdə o ilin nəticələrinə görə 4 dəfə “Ən yaxşı səmərələşdirici” mühəndis adına layiq görülmüş, 4 dəfə fəxri Fərmana və yüksək pul mükafatına da layiq görülmüşdür. 88 texniki səmərələşdirici təklifin müəliifidir, bunlardan 62-si istehsalata tətbiq olunmuş və zavod 100 minlərlə manat iqtisadi gəlir götürmüşdür. 1992-1994-cü illərdə Mexaniki Təmir Zavodunda direktor vəzifəsində çalışarkən, ulu öndər Heydər ƏIiyevin şəxsi nəzarətində olan və olduqca strateji əhəmiyyət kəsb edən Xudafərin körpüsünün inşaasında aktiv rəhbər roluna görə, xüsusi mükafata da layiq görülmüşdür. 40 il istehsalat təcrübəsinə, operativ təşkilatçılığa və düzgün qərar qəbul etmək xüsusiyyətlərinə malik mütəxəssisdir. Baş mühəndis Abdurrəhmanov Süleyman Kərim oğlunun “Əməkdar mühəndis” fəxri ada layiq görülməsi üçün, Azərbaycan Respublikası Prezidenti qarşısında vəsadət qaldırmağınızı Sizdən xahiş edirik”.
Bəli, bütün bunlar bir daha onu təsdiq edir ki, uzun illər ərzində istehsalat sahəsində çalışan və peşəkar mühəndis olaraq xüsusi ad-san çıxaran Süleyman Abdulrəhmanovun, xalqımızın və dövlətimizin gələcəyi naminə sərf etdiyi əmək lazımınca qiymətləndirilməli və ona da “Əməkdar mühəndis” fəxri adının verilməsi təmin olunmalıdır. Çünki sadalananları əsas tutaraq onu vurğulaya bilərik ki, bu şəxsin belə bir fəxri ada layiq görülməsi üçün, onun həm mənəvi, həm də hüquqi ixtiyarı var.

Mirzə
gundemxeber.az