Xəbər verildiyi kimi bir neçə gün öncə ölkədə dəmiryolcuların peşə bayramı təntənəli şəkildə qeyd olunub.

"Azərbaycan Dəmir Yolları” QSC-nin sədri Cavid Qurbanov tədbir iştirakçılarını 13 oktyabr - dəmir yolu işçilərinin peşə bayramı günü münasibətilə ürəkdən təbrik edib. Sonra "Azərbaycan Dəmir Yolları”nın bir qrup əməkdaşının ali dövlət mükafatları ilə təltif edilməsi haqqında, Azərbaycan prezidenti İlham Əliyevin 12 oktyabr 2017-ci ildə imzaladığı sərəncamlar oxunub.
Qeyd edək ki, 7 oktyabr 2005-ci ildə "Dəmir yolu işçilərinin peşə bayramının təsis edilməsi haqqında" sərəncam imzalanıb. Həmin sərəncama əsasən hər il oktyabrın 13-ü müstəqil Azərbaycan dəmir yolunun yarandığı gün - Azərbaycan dəmir yolu işçilərinin peşə bayramı günü kimi qeyd olunur, ölkə başçısı dəmiryolçuları ali dövlət mükafatları ilə təltif edir. 137 illik tarixə malik olan Azərbaycan polad magistralı çox əzəmətli fəaliyyət yolu keçib. Azərbaycan Dövlət Dəmir Yolunun inkişafının ən sürətli və parlaq dövrü, məhz ulu öndər Heydər Əliyevin Azərbaycana rəhbərlik etdiyi 1969-2003-cü illəri əhatə edir. Daha sonra bu münasibətlə "ADY" QSC-nin sədri Cavid Qurbanov çıxışında dəmiryolculardan 30 nəfərini yeni mənzillərllə sevindirib.
Belə bir vaxtda "ADY" QSC-nin Gəncə istiqamətində isə, başqa bir ab-hava ilə lokomotiv deposunun işçiləri "təbrik" olunub. Belə ki, Gəncə Lokomotiv Deposunda çalışan dəmiryolcuların peşə bayramı ərəfəsində, onlara deponun rəisi İslam Əsgərovun imzası ilə təbrik deyil, məhz bədxəbərdarlıq məktubu çatdırılıb. Məktubun məzmununda deyilir, “məktub sahibi ixtisara düşdüyündən iki aydan sonra özünə yeni iş yeri axtarmalı olacaq”. Yəni, ölkə başçısının yeni iş yerlərinin açılacağı haqda fikirlərini dinləyənlər, dəmiryolçuya "ADY" QSC-dən işsiz qalacaqları xəbəri peşə bayramı ərəfəsində verilir. İxtisarla bağlı əldə olunan məlumatda daha bir ilginc faktla da üzə çıxıb. 2010-cu ildə sabiq nəqliyyat naziri Ziya Məmmədov ixtisarla dəmir yolunda aparılacaq ixtisarlarla bağlı fikir söylədikdən sonra, təkcə Gəncə lokomotiv deposuna 300-ə yaxın yeni işçi işə götürülüb.
Əgər idarələrdə, müəssisələrdə ixtisarlaşma aparılırsa o halda təcrübəli işçi deyil, sonuncuların ixtisara düşməsi nəzərdə tutulduğu halda, Gəncə Lokomotiv Deposunda isə, uzun illər iş təcrübəsi olanlar dəmir yolundan uzaqlaşdırılırlar. Səbəbsə hələlik məlum deyil. Özünü Cavid Qurbanovun yaxını kimi qələmə verən idarə rəhbərinin "bayram" təbrikindən xoşlanmayan dəmiryolçuların builki bayram əhval-rühiyyəsindən, görəsən Cavid Qurbanovun xəbəri varmı? Deyəsən hazırda Gəncə Lokomotiv Deposunun rəis vəzifəsini daşıyan İslam Əsgərov, Ziya Məmmədovun atasına rəhmət oxutdurur.

P.S. Dəmiryolcuların bəzilərinin dediyinə görə, iki il öncə də belə bir maxinasiyanı onlara sabiq kadrlar şöbəsinin rəisi etmişdi. Elə ki, ixtisarla bağlı ünvanlanan məktubdan sonra gözlənilən təmənnanın nədən ibarət olduğu bəlli oldu, o halda hər şey hər kəsə aydınlaşdı.

Mehriban Əzizqızı
gundemxeber.az