Eldar Yunusovun fəaliyyəti Hesablama Palatası tərəfindən araşdırılması nədənsə yubadılır

Təhsil sisteminin özülünü məktəbəqədər təhsil mərhələsi təşkil edir. Söhbət məktəb təhsilinə qədərki təlim-tərbiyyənin təşkilindən gedir. Uşaqlar bu müəssisələrdə iradi möhkəmlik keçməli, təbiətdə baş verən hadisələri dərk etməlidirlər. Bağçalarda uşaqlara müstəqillik, azadlıq verilməli, rəqabət mühiti yaradılmalı və nəticədə hələ erkən yaşlardan şəxsiyyət formalaşmalıdır.

Göründüyü kimi məktəbəqədər təhsil mərhələsi hər bir uşağın formalaşması prosesində çox mühüm rol oynayır. Gələcəyin şagirdi, tələbəsi, əsgəri məhz bu dövrdə formalaşmağa başlayır. Odur ki, təhsilin təməl pilləsinin düzgün qurulması vacib məsələdir. Prezident İlham Əliyev bu vacib məsələyə hər zaman diqqət ayırıb. Çıxışlarının birində dövlət başçısı bu sahədə əsas istiqamətləri aydın şəkildə göstərib :

“Uşaq bağçalarının problemlərinin həlli üçün biz əlavə tədbirlər görməliyik. Burada həm bağçaların vəziyyəti, təmiri, eyni zamanda, yemək məsələləri nəzərdə tutulmalıdır. Çünki məktəbdən fərqli olaraq uşaq bağçalarında körpələr hələ öz hüquqlarını müdafiə edə bilmirlər. Uşaq bağçalarının hamısı təmirli olmalıdır. Hamısında da keyfiyyətli yemək verilməlidir ki, uşaqlarımız sağlam böyüsünlər . Mən çox narahatam ki, uşaqlara heç o aşağı səviyyəli normativlər də verilmir. Uşaqlar ya ac qalır, ya da ki, evlərindən özü ilə yemək gətirirlər. Bu, dözülməz haldır”.

Təəssüf ki, paytaxtın uşaq baxçalarında mövcud duruma nəzər salsaq tamamilə başqa mənzərə ilə üzləşərik. Bu sahəyə rəhbərlik edən “əmilərin”, “xalaların” sayəsində körpə balalarımızın haqqı tapdalanır, hətta onların yemək qazanına belə əl uzadılır. Uşaq baxçalarında hökm sürən korrupsiya, rüşvətxorluq nağıl deyil, günümüzün acı reallığıdır. Körpələrin baxçalara qəbulundan başlayan rüşvət mexanizmi sona qədər davam etdirilir.

Bakı şəhər Məktəbəqədər Təhsil Müəssisələri və Uşaq Evləri İdarəsinin müdiri Eldar Yunusov bu sahəni monopoliyaya alaraq bütün qanunları heçə sayır, sadəcə şəxsi maraqlarını təmin edir. Məhz onun yarıtmaz rəhbərliyi nəticəsində paytaxtın məktəbəqədər təlim müəssisələrində acınacaqlı vəziyyət hökm sürür.

Paytaxt baxçalarının əksəriyyətində baş alıb gedən qanunsuzluqlar, rüşvət, özbaşınalıq, baxça müdirlərinin baxçanı şəxsi obyekti kimi istifadə etməsi ilə bağlı dəfələrlə məlumat vermişik. Uşaq baxçalarında baş verən qanunsuzluqların, rüşvət olaylarının arxasında isə Eldar Yunusovun adı hallanır.

Bu gün hər kəsə yaxşı məlumdur ki, Bakı şəhərində fəaliyyət göstərən xeyli sayda baxçalara uşaq qəbulu müşkül bir işə çevrilib. Baxça müdirləri uşaqların valideyinlərindən rüşvət almaqla bərabər həmdə xeyli sayda uşağa baxılması üçün əlavə “rüsum” belə istəyirlər. Valideynlərdən hər uşağa görə alınan təxminən 300-500 manat pulun bir hissəsi Eldar Yunusova, qalanı isə, bağça müdirlərinə çatır. Bundan başqa, hər ay körpənin
valideynlərindən 20 manat, bəzən 30-40 manat pul alınır.

Eldar Yunusovun "doğma kadrları" və yaxud ailə podratı

Uşaq baxçalarının ərzaq və digər zəruri mallarla təminatı məsələsi isə tamamilə Eldar Yunusovun nəzarətindədir. Verilən məlumatlara görə, bu sahədə dəhşətli korrupsiya mexanizmi formalaşdırılıb. Hesablama Palatasının kiçik bir araşdırma aparması kifayətdir ki, bu korrupsiya piramidasının dəhşətli əməlləri üzə çıxarılsın. Körpələrin yemək payına əl uzadan böyüklərin əmməlləri tezliklə ifşa olunmalıdır.

Əgər araşdırmalar aparılarsa, baş verən maliyyə fırıldaqlarının, korrupsiya əməllərinin arxasından Eldar Yunusovun “doğma kadrları” çıxar. Rəhbərlik etdiyi sahədə “ailə podratı” yaradan Eldar Yunusov yaxın qohumu olan Fuad adlı şəxsi Məktəbəqədər Təhsil Müəssisələri və Uşaq Evləri İdarəsində baş mühasib təyin etməklə bütün maliyyə məsələlərini nəzarətə götürüb . Məhz yaxın qohumunu idarənin maliyyə məsələlərinə rəhbər təyin etməklə E. Yunusov baş verən bütün qanunsuzluqları, şübhəli maliyyə əməliyyatlarını ört-basdır edə bilir. E. Yunusovun yaxın qohumu idarədə təkcə mühasibat işləri ilə məşğul olmur. Baxça müdirlərinə nəzarəti və onlardan alınan "haqq" məsələsini də Fuad həyata keçirir. “Gündəm Xəbər” bildirir ki, qanunlara görə dövlət müəssisəsində bir şöbəyə rəislik edən şəxsin yaxın qohumu həmin şöbədə baş mühasib olmamalıdır. Bunun nə qədər qanuni olub-olmamasının hüquq-mühafizə orqanlarının araşdırması vacibdir.

Eldar Yunusovun “xeyir-duası” ilə bu gün uşaq baxçalarında kifayət qədər qeyri-ixtisas sahibləri, bu sahyə qətiyyən aidiyatı olmayan kadrlar çalışırlar. Uşaqların formalaşmasının çox mühüm bir mərhələsində qeyri-peşəkarların iştirakı təhsilin sonrakı mərhələlərində öz mənfi nəticələrini göstərir. Bu gün kifayət qədər ixtisaslı kadrlar baxçalarda işlə təmin olunmur, onlara yer tapılmır. Amma, “haqq-hesabını” verəndən sonra istənilən qeyri-ixtisaslı kadra yer tapılır. Bu bir daha göstərir ki, E. Yunusov üçün uşaq baxçaları sadəcə gəlirli bir sahədir, körpələrin gələcək taleyi ikinci, üçüncü dərəcəli məsələdir.

Məktəbəqədər təhsil sahəsində baş verən qanunsuzluqlar son həddə çatıb. Ölkə başçsının, birinci vitse prezident Mehriban xanım Əliyevanın bu sahəyə göstərdiyi diqqət və qayğıya bu qədər məsuliyyətsiz yanaşmaq, dövlət siyasətini heçə saymaq bir məmurun fəaliyyətinin ciddi təftiş olunması zərurətini gündəmə gətirir. Hesablama Palatası, digər aidiyyatlı qurumlar Eldar Yunusovun bu sahədəki monopoliyasını araşdırmalıdırlar. Ancaq nədənsə yubadılır.

Məktətəqədər təhsildəki rüşvətin, özbaşınalığın, qanunsuzluğun qarşısını almasaq bunun acı fəsadlarını gələcəkdə çox çəkəcəyik. Məgər aidiyyatlı qurumlar hələ də dərk etmirlərmi ki, bu gedişlə gələcəyimizi təhlükə qarşısında qoyuruq. Baş verənlərə bu qədər soyuqqanlı münasibət haradan qaynaqlanır görəsən ? Yoxsa Eldar Yunusovun “ baxça nağıllarının “ sonunda göydən həqiqətən də almalar düşür ?
Mövzunu diqqətdə saxlayacağıq.

Cəfər
gundemxeber.az