Fədayə Baris qızı Məmmədova qızı 1977-ci il 3 iyun tarixində Laçın şəhərində dünyaya göz açıb. Uşaq olarkən atası onları atıb Rusiyaya gedib. Fədayə ilə bacısı İlahəyə ana nənəsi baxıb. Müğənni 12 yaşında Laçını tərk etməli olub və ailəsi ilə Buzovnaya köçüb. İfaçı uşaq yaşlarında həkim, satıcı, pilot və avtobus sürücüsü olmaq istəyib.

Həyatı haqqında danışan müğənni Laçında olarkən çətin günlər yaşamadığını, atasızlığı hiss etmədiyini deyib. Onun çətin həyatı Bakıya köçəndən sonra başlayıb. Gənc yaşında ailə quran müğənninin ailə həyatı da uzun çəkməyib. Onun həyat yoldaşı övladının bir yaşı olmamış müğənnini tərk edərək Rusiyaya gedib. Müğənni müsahibəsinin birində atasından da, həyat yoldaşından da yarımadığını, həyatının ayrılıqlarla keçdiyini deyib.

Həyat yoldaşı tərk edən və çarəsiz qalan Fədayə müğənni olmağa oxumağa qərar verib. İlk dəfə dövlət radiosunda Ramiz Mirişlinin qonağı olub. F. Laçına bu yolda mərhum muğam ustası İslam Rzayev dəstək olub. O, İ. Rzayevin tələbəsi olub və ifaçılığın sirlərini ondan öyrənib. Müğənniyə “Laçın” təxəllüsünü Məhəbbət Kazımov verib. Kazımov konsertində səhnəyə çıxmağa hazırlaşan Fədayəni “Fədayə Laçın” kimi təqdim olunmasını istəyib.

Xalq və bəstəkar mahnıları oxuyan müğənni şəxsi həyatı ilə tez-tez gündəmə gəlib. O, 4 illik duet ortağı Tacir Şahmalıoğlu ilə böyük eşq yaşayıb. Bu münasibət ikili arasında qalmaqal da yaradıb. Şahmalıoğlu bu münasibəti qəbul etməsə də, Fədayə daim sevgisini etiraf edib. O, həmkarı ilə 6 il eşq yaşadığını, bu münasibətdən Tacirin ailəsinin xəbərdar olduğunu bildirib.



Fədayə Laçın oğlu ilə yanaşı bir uşağa da analıq edib. O, anasını erkən itirən, oğlu Əlhəmin uşaqlıq dostuna analıq edib. Lakin bu haqda ilk dəfə milli.az saytına müsahibəsi zamanı danışıb. O, başqa uşağa analıq etməsi haqda danışmaqdan qaçdığını deyib.

Son günlər isə müğənni həbs olunması ilə bağlı gündəmdədir. Belə ki, müğənni oktyabrın 23-də Bakı-Astara-Bakı planlı dəmir yolu qarovulu ilə xüsusi təyinatlı vaqonda Bakı şəhərinə müşayiət olunan 1980-ci il təvəllüdlü, əvvəllər məhkum edilmiş Etibar Ələkbər oğlu Məmmədov və 1989-cu il təvəllüdlü, əvvəllər məhkum olunmamış, CM-nin müxtəlif maddələri ilə təqsirləndirilən Əli Rasim oğlu Ağaminin həbsdən qaçmasına kömək etməkdə təqsirləndirilərək həbs olunub. O, 304. 2.1 maddəsi (Qabaqcadan əlbir olaraq həbs yerindən və ya mühafizə altında olanlara qaçmağa kömək etmə) ilə ittiham olunur.



Müğənni ilə “Qoca”nın eşq hekayəsi isə gündəmin əsas mövzusudur. gundemxeber.az-ın Qafqazinfo.az-a istinadən əldə etdiyi məluata görə,Fədayə ilə “Qoca” evlərindəki qonaqlıqda tanış olublar. Həmin qonaqlıqda xanımı Fədayəyə üzük bağışlayıb və yoldaşının nömrəsini özü ona verib.

İfaçı ilk dəfə 2015-ci ildə Mikayıl Güləddinoğlunun verilişində “Qoca” ilə bağlı etraflar edib: “ Bizi dəmir barmaqlıqlar ayırdı. Biz heç qovuşmadıq. O bir dəfə xəstəxanaya düşdü, yanına gedib-gəlirdim. Onun yanında qalmağa icazə verdi. Ən xoşbəxt günləri xəstəxanada yaşadıq”.

Müğənni bu eşq haqqında sosial şəbəkədə də sətiraltı paylaşımlar edib. Laçın oktyabrın 26-da paylaşdığı “Səni zindanda görən ağlasın”, "Allahım, uzaq və müşgül səfərdə olanların yolunu özün aç, Ya Rəbbim. Sənin məsləhətinə şükürlər olsun", "Allahım, özün kömək ol, Ya Rəbbim" sözləri diqqət çəkib.