Aslan İsmayılov “Emre Piliç” firması ilə əməkdaşlıq etmiş Mürvət Həsənliyə nələr yazmayıb?! - Mətn

Haqqımda Mürvət Həsənlinin böhtanlarını yayan, bu işbazın heç kimə borcu olmadığını tirajlayan mətbuat orqanları əgər həqiqəti çatdırmaq istəyirsinizsə...

“Mürvət kimilərin 300-500 manatına haqqımda şər, böhtan, təhqir yaymaqla həbsimi reallaşdırmaq istəyən tulalara deyirəm.Sizi kimilər haqqımda heç nə edə bilməzlər, həbsim sizin kimi tulalardan asılı deyil. Bu məsələ başqa yerlərdə həll olunur”. “Gündəm Xəbər”in məlumatına görə, bu fikirlər hüquqşünas Aslan İsmayılovun leksikonuna aiddir.

“Mürvət kimilərin 300-500 manatına”

A.İsmayılov “Xəmsə” restoranının sahibi Mürvət Həsənli barəsində dediyi sözlərlə onu mediada səs-küy yaradıb.

Vəkilin M.Həsənli haqda statusundan biri: “Siz kimliyimi anlaya bilməzsiniz. Hər ehtimala qarşı bir söhbəti sizi kimi gədələrə də bildirim.

Azərbaycan Respublikası Prezidenti İlham Əliyevlə görüşdən sonra bir çox məmur-oliqarxlar mənimlə yaxın münasibətlər qurmaq üçün cürbəcür, sizin kimi gədələrin ağlına gəlməyən, gəlirli işlər təklif edirdilər. Onlardan biri, imtinası mümkün görünməyən təklifi qəbul etmədikdə, dedi: “Aslan, sən nə istəyirsən?” Sakitcə gülə-gülə dedim ki, bircə istəyim var, sizə Azərbaycanda pulla ala bilmədiyiniz bir azərbaycanlı kişisinin olduğunu göstərmək. Qeyri-etik ifadələrə görə izləyicilərdən üzr istəyirəm. Bütün əndazələri aşmışlar bəzən kim olduqlarını bilməlidirlər”. A.İsmayılov iş adamı ilə hüquqi müstəvidə mübarizə apara bilmədiyi üçün bu müddət ərzində Feysbukda fikirlərini yayıb. İş o yerə çatıb ki, A.İsmayılovun yazdıqlarını ayrı-ayrı adamlar skrin edib paylaşırlar. İctimaiyyət vəkil-iş adamı çəkişməsindən danışır. O, Türkiyədəki yarımerməni “Emre Piliç” şirkəti ilə davada onlara qahmar çıxmaqla M.Həsənlini ifşa etdiyini bildirib.

“Mürvət Həsənlinin böhtanlarını yayan”

“Gündəm Xəbər”in araşdırmasına görə, 2016-cı ildən Feysbukda M.Həsənliyə olmazın sözlər yazmış hüquqşünasın statuslarından birinə gəlin diqqət edək:
“Elə bilirdim ki, azpolitika.info saytı ancaq, türk iş adamının 1.5 milyon ABŞ dolları pulunu mənimsəmiş, M.Həsənlinin puluna xidmət edib uzun müddətdir ki haqqımda şər-böhtan, təhqir tirajlayır. Sən demə bu sayt həm də bəzi orqanlara qulluq edirmiş. Haqqımda qaldırılmış cinayət işi barədə özümün ancaq 16 oktyabrda bildiyim halda bu sayt cinayət işinin qaldırıldığı dəqiqədən, yəni 2 oktyabrdan həmin orqanlara xidmət göstərib haqqımda ictimai rəy formalaşdırmaq istəyirmiş. Barəmdə ölkədən çıxmağa qadağa qoyulduğunu da bu saytda oxuduqdan sonra müstəntiqdən soruşanda bildirdi ki, həqiqətən haqqımda ölkədən çıxışa qadağan qoyulub. Sovetlər dönəmində də orqanlar murdar əməllərində bəzi xüsusi seçilmişlərdən öz məqsədləri üçün istifadə edirdi. Haqqımda Mürvət Həsənlinin böhtanlarını yayan, bu işbazın heç kimə borcu olmadığını, türk şirkəti ilə işbirliyini təsisçilər sırasında erməni olduğuna görə dayandırdığını tirajlayan mətbuat orqanları əgər həqiqəti çatdırmaq istəyirsinizsə bu videonu da yayın. Ofisimdə, az qala diz çöküb yalvararaq, 1 mln 300 min ABŞ dolları borcun etirafını imzalayan, az sonra borcu qaytarmamaq üçün haqqımda böhtanlar yağdıran M.Həsənlini özünüz də görün”. A.İsmayılov əlavə edir ki, bu yolla məni qorxudacaqlarını zənn edən M.Həsənli və onun yüksək rütbəli havadarları istədiyinizi edin: “Bu günə qədər sizi kimiləri çox olub, ancaq gec də olsa cəzalarını alıblar. Bu dəfə də belə olacaq”.

“Bu dələduz öz murdar əməllərini”

Maraqlıdır ki, A.İsmayılovun M.Həsənli ilə məhkəmə mübahisəsi haqda nə vəsatətlər, nə hakim, nə dövlət ittihamçısı, nə hüquqi prosedurlar barədə bir fikrinə rast gəlmək olmur. Bir çox hallarda vəkillər qanundan, Cinayət və Mülki Məcəllədən, maddələrdən istinadlar gətirirlər, işin hüquqi tərəfini izah edirlər. A.İsmayılovun da vəzifəsi erməni “Emre Piliç” şirkətinin hüquqlarını qoruyarkən məhz hüquqi əsaslandırma ilə danışmaq olmalıydı. Məsələn, onun xeyli vaxt qabaq yazdığı statuslardan birinə baxaq: “Özbaşınalıqlarının cəzasızlığını görən səhiyyə əməkdaşları artıq hüquq-mühafizə orqanlarını da saymırlar. Məsuliyyətdən yaxa qurtarmaq istəyən “sıpa” kimi sağlamlar pulunu verib özlərinə səhiyyədən ən ağır diaqnoz da ala bilirlər. Guya ən ağır ürək xəstəliyindən əzab çəkən, təcili cərrahi əməliyyata ehtiyacı olan M.Həsənli elə həmin tibb müəssisəsində ola-ola sağa-sola müsahibələr verir, guya iş başında olduğunu, mənim yalan məlumatı paylaşdığımı deyir, məni təhqir etməyə davam edir. Ən böyük murdarlıq odur ki, bu dələduz bu gün müsahibə verib öz murdar əməllərini gizlətmək üçün rəhmətlik Heydər Əliyevin adından da istifadə edir. Hanı bu gün Heydər Əliyevin çörəyini yeyənlər, addımbaşı onun adını fəxrlə çəkənlər?! Onlar nəinki bu murdarlığa etiraz etmirlər, əksinə Azərbaycan xalqını, dövlətini dünyada biabır edən bir dələduzu himayə edirlər. Bir daha onlara deyirəm, mənim qorxacaq yerim yoxdur. Sizin kimi çirkabın içində deyiləm və səbrim də tükənməz deyil. Daha yaxşı olar ki, siz yumurta, cücə biznesi ilə deyil, öz vəzifənizi icra edin, bərbad vəziyyətdə olan səhiyyə və ondan geri qalmayan ədliyyə ilə məşğul olun”.

“Mürvət ölkədə mafiya qanunları olduğunu deyib”

Hüquqşünas leksikonundakı sözləri getdikcə gücləndirir. Onun yanvarda Feysbukda paylaşdığı müraciətlərdən birindən sitat: “Emre Piliç” Şirkəti “Siyəzən Broyler” ASC-yə damazlıq yumurta satmış, həmin yumurtaların pulları isə “Siyəzən Broyler” ASC tərəfindən Həsənli Mürvətə verilmişdir.
Mürvət Həsənli “Azərbaycanın mafiya qanunları ilə idarə olunduğunu, buraya gələcəyi təqdirdə, digər iş adamları kimi MTN tərəfindən tutulacağını” deyərək nümayəndəsi olduğum Şirkətin rəhbəri Ömür Oralın Azərbaycana səfər etməsinin qarşısını almış, “Siyəzən Broyler” ASC isə Mürvət Həsənlini “Emre Piliç” Şirkətinin səlahiyyətli nümayəndəsi bilib, bu Şirkətə borclu olduğu bütün vəsaiti ödəmişdir. Mürvət Həsənli bu vəsaitin bir hissəsini “Emre Piliç” Şirkətinə qaytarsa da, təxminən 1,5 milyon ABŞ dollarını qanunsuz şəkildə ələ keçirmişdir. M.Həsənlini kimlərin müdafiə etdiyi, onun kimlərə arxalanaraq özünü Azərbaycanda mafiya babası sayması mənə təxminən bəllidir.Onlar əmin olsunlar ki, araşdırdığım hallara tam əmin olan kimi onların da kimliyini ictimaiyyətə açıqlayacam. Mənim heç bir vəzifəli şəxsdən, mafiyadan qorxacağım yoxdur və söhbət Vətənimin nüfuzundan gedəndə isə məni heç nə dayandıra bilməz”.

Vəkilə niyə cinayət işi açılıb?

Qeyd edək ki, Bakı şəhəri Səbail Rayon Məhkəməsi Aslan İsmayılovu Mürvət Həsənliyə böhtan atdığına, onun işgüzar nüfuzuna xələl gətirən, şərəf və ləyaqətini alçaldan ifadələr işlətdiyinə görə cərimə edib və qarşı tərəfdən üzr istəməsi barədə qətnamə çıxarıb. M.Həsənlinin iddiası üzrə qərar iyulun 14-də hakim Elmar Rəhimovun sədrliyi ilə keçən prosesdə elan olunub. M.Həsənli hüquqşünası özünün Facebook səhifəsində paylaşdığı və “Musavat.com” saytında yayımlanmış “Tanınmış hüquqşünas erməni şirkəti ilə əməkdaşlıq iddiasını darmadağın etdi” adlı yazıda təhqir olunmasına, böhtana məruz qalmasına görə məhkəməyə vermişdi. Aylardır davam edən proses sonunda məhkəmə M.Həsənlini haqlı hesab edib. Vəkilə isə Cinayət Məcəlləsinin 221-ci maddəsinin (xuliqanlıq) 1-ci hissəsi ilə cinayət işi açılıb.

Vəkildən sahibkara sərt mesaj

Yada salaq ki, Azərbaycanın quşçuluq müəssisələrilə əməkdaşlıq edən Türkiyənin “Emre Piliç” şirkətinin erməni ortaqları olduğu üzə çıxıb.
Belə ki, bu şirkətin ortaqları arasında milliyətcə erməni Arto Sevan Oskayan və Antranik Raffi Bozaçıyan da var. Bu iki erməni “Emre Piliç” şirkətinin 30 faizinə sahiblik edir. Məlum olub ki, ötən il bəzi Azərbaycan saytlarında bu barədə ötəri məlumat getdikdən sonra bir çox quşçuluq müəssisələri “Emre Piliç”lə əməkdaşlığı dayandırıblar. Uzun müddətdir ki, bu işlə bağlı çəkişmə gedir. Məsələn, “Emre Piliç” şirkətinin 30 faiz səhminin Oskayan və Bozaçıyan adlı ermənilərə məxsus olduğu rəsmi sənədlərlə sübut olunub. Erməni şərikləri ilə birlikdə çalışan Ömər Oral, Onur Oral, Mert İbrahim Daştan və Seyhan Davutoğlu Daştanın da adı var. “Emrə Piliç”in türk və erməni ortaqları Azərbaycandan gələn külli miqdarda qazancdan məhrum olmamaq üçün, necə deyərlər, hiyləyə əl atıblar. “Emre Piliç”in ortaqları rəsmi səhmdarları arasında sözügedən 2 erməninin adının olmadığı yeni şirkətlər - “Orallar” və “Qaranti”ni təsis edərək, Azərbaycan istiqamətində biznesi bu şirkətlər üzərindən həyata keçirməyə başlayıblar. Bununla da, bir növ Azərbaycandan olan tərəfdaşlarının ermənilərlə işbirliyində olması faktını pərdələmiş olubla
Ancaq bu, ölkədən damazlıq yumurta və cücə almaq üçün çıxarılan milyonlardan “Orallar” və “Qaranti”nin faktiki sahibləri Arto Sevan Oskayanın və Andranik Raffi Bozaçıyanın da pay alması faktını dəyişmir. Bütün bu çəkişmələrlə bağlı A.İsmayılovla əlaqə saxlayıb mövqeyini öyrənmək istədik. Tanınmış hüquqşünas qəzetimizə qısa şəkildə bildirdi ki, Mürvət Həsənli kimi dələduz, saxtakar bir adam haqda danışmaq istəmir. Mövzunu davam etdirəcəyik.

Rahib
gundemxeber.az