“Gündəm Xəbər”in sosial şəbəkələr üzərindən apardığı araşdırmalar nəticəsində məlum olub ki, Araz çayının sağ və sol hissəsində yerləşən və bənzəri olmayan “qətliam”lara məruz qalan Tuqay meşələrində, bu gün də "yaşıl soyqırım" davam etməkdədir. Yəni İllərin, əsrlərin yadigarı olan, hətta "Qırmızı kitab"a düşən elə ağaclar, elə nadir bitki növləri var ki, onlar amansızcasına məhv olunur. Analoqu olmayan “soyqırımı” həyata keçirənlər və onlara havadarlıq edənlər, deyəsən yaxşı bəhanə də tapıblar. Sən demə dövlət başçısının "pambıq əkmək" kampaniyasına dəstək vermək istəyində olan həmin şəxslər, meşələri bu ad altında məhv edib yerində pambıq və digər bitki növləri əkmək qərarına gəliblər.

“Gündəm Xəbər”in əldə etdiyi başqa bir məlumatda o da vurğulanır ki, Ekologiya və Təbii Sərvətlər Nazirliyi, Beyləqan (Regional) Meşə Mühafizəsi və Bərpa Müəssisəsinin Arazboyu meşəbəyliyinin, İmişli rayonunun Qaraqaşlı, Mürsəlli, Murğuzallı, Xoşçobanlı, Otuziki, Xubyarlı və s. kəndlərinə aid olan hissələrində, son vaxtlar üç min hektar meşə torpaqları yaşıllıqlardan təmizlənərək əkin sahəsinə çevrilib. Onu da qeyd edək ki, adı çəkilən müəssisənin rəhbərliyi torpaq icarədarları ilə işbirliyinə girərək, həmin ərazilərdə çoxillik ağacları, nadir bitki növlərini amansızcasına məhv edib, həmin ərazilərdə pambıq, taxıl, arpa, yonca və s. bitki növləri əkib təsərrüfatla məşğul olurlar. Açıq-aydın şəkildə vurğulayaq ki, belə bir addımlar atıldığından Tuqay meşələri əməlli-başlıca “qan ağlayır”.



Vaxtilə Tuqay meşələrinin əsasını təşkil edən qovaq ağacları, artıq tamamilə məhv olmaq üzrədir. "Yaşıl soyqırım"ı həyata keçirənlər, hətta üçyüz il ömrü olan qovaq ağaclarını, "Qırımızı kitab"a düşən yulğun bitkilərini və s. məhv edirlər. Təkcə ötən il rayonun Qaraqaşlı kəndi ərazisində təxminən 40 hektar meşə zolağı sahəsi məhv edilmiş və hər hektarını təqribən 300 manata icarəyə götürən icarədarlar, həmin ərazilərdə bostan bitkiləri yetişdirməklə məşğul olurlar.



Bütün bunlar onu söyləməyə əsas verir ki, Tuqay meşələrinin qəsdinə girənlər, onu məqsədli şəkildə məhv edənlər, bu gün atdıqları addımlari ilə böyük bir cinayətə imza atmış olurlar. Onu da unutmaq olmaz ki, gec-tez hər kəs atdığı addımına görə lazımi cəzasını alacaq. Odur ki, həm düşünməyin, həm də götür-qoy etməyin zamanı çatıb. Yoxsa...

Mirzə
gundemxeber.az