Prezident seçkiləriöncəsi nələr baş verir?

Iki il öncə Prezident İlham Əliyevin köməkçisi, o zaman ictimai-siyasi şöbənin müdiri olan Əli Həsənov açıqlama ilə çıxış etdi. Açıqlamada deyilirdi:” Biz milli serialların inkişafı haqqında düşünürük və bu səbəbdən Türkiyə seriallarıda daxil olmaqla əcnəbi serialların yayımı özəl televiziyalarımızda qadağan edilir. Cənab prezident büdcədən vəsait ayırıb və yerli serilların maliyyələşməsi nəzarətə götürülür”. Həqiqətən də belə oldu. Büdcədən vəsait ayrıldı və milli serialların inkişafı hiss olunmağa başladı. AMMA...
Prezidentin köməkçisi Əli Həsənovun oğluna məxsus” Xəzər Media Center”in tərkibində fəaliyyətə başlayacaq Dalğa TV-nin proqramlar departamentinin rəhbəri Kənan Bayramov məlumat verir:
“Dalğa TV dünya bestsellerlərini Azərbaycana gətirir. Telekanalda Azərbaycan dilinə tərcümə olunmuş lisenziyalı məhsullar nümayiş olunacaq.
Kanal, peyk, kabel və digər platformalar üzərindən yayımlanacaq. Hazırda test prosesindədir və dekabr ayından tam yayıma keçid edəcəyik”.K.Bayramov Dalğa TV-də yayımlanacaq film və seriallardan da söz açıb:
“Azərbaycanda yetəri qədər sevilən, lakin heç vaxt nümayiş olunmayan serialları nümayiş etdirəcəyik. Bunlar Braziliya, Meksika, Hindistan, Kolumbiya, Amerika və Türkiyə istehsalıdır.
Serial və filmlərin ana dilimizə dublyaj olunmasına səbəb odur ki, biz bir başa şirkətlə danışıb filmlərin yayımı üçün icazə alırıq. Yəni, internet versiya yayımlamaq fikrimiz yoxdur.
Filmin başqa dildə efirə verilməsi qeyri-qanuni sayılacaq. Əgər kino və ya serial rus dilində yayımlansa, deməli, Rusiya bazarına girmiş oluruq. Biz piratçılıq yolu ilə film izlətmək istəmirik”.
ZƏRURİ QEYD: ANS TV Türkiyənin məlum şirkəti ilə danışıqlar apararaq “Kurdlar Vadisi” filminin nümayişini azərbaycan dilində yayımlamağa başladı. Eyni zamanda ATV “Sultan Süleyman ” serialının yayımına başladı. Amma serialların yayımına Əli Həsənovun bəyanatı ilə yasaq qoyuldu. Bu gün isə serialların yayımı üçün Əli Həsənovun oğlu ayrıca kanal belə açdı. Açdımı?. Sözsüz ki, Əli Həsənovun gücü ilə. Mövzuya qayıdacağıq. Hələlik son məlumatlara baxaq.

Nüşrəvan Məhərrəmli “mərhəməti”

MTRŞ-in sədri Nüşrəvan Məhərrəmli “Gündəm Xəbər” qəzetinə açıqlamasında Dalğa TV-in tək peyk vasitəsiylə yox, həm də kabel televiziyaları vasitəsiylə yayımlanacağını təsdiqlədi. Bu isə o deməkdir ki, ölkədə fəaliyyət göstərən digər televiziyalar tam iflasa uğrayacaq. Xatırladaq ki, “Dalğa TV” adıyla fəaliyyətə başlayacaq yeni kanal sırf xarici serialların yayımı ilə məşğul olacaq. Bu məqsədlə artıq dublyaj redaksiyası yaradılıb və bir neçə xarici serial artıq azərbaycan dilinə tərcümə edilib. Çox maraqlıdır ki, bir neçə il öncə prezidentin tapşırığı ilə ölkədə xarici serialların yayımına qadağa qoyulmuşdu və dövlət büdcəsindən televiziyalara pul ayrıldı ki, yerli serialların çəkilişi gücləndirilsin. Amma bu gün yenidən xarici serialların yayımlanması həm prezidentin əmrinə ziddir, həm də yerli seriallara ağır zərbə olacaq. Bundan başqa xarici seriallara olan marağa görə reklam bazarındakı tarazlıqda pozulacaq. Yəni reklamçılar digər televiziyalarla əməkdaşlığa son verib “Dalğa TV” ilə əməkdaşlığa üstünlük verəcəklər. Maraqlıdır, bəs MTRŞ hansı əsaslarla Dalğa TV-in kabel televiziyalarındada yayımlanmasına icazə verir? Nüşrəvan Məhərrəmli bildirir ki, bu tərəflərin bir-biri ilə razılaşması əsasında baş tutacaq. Onda belə çıxır ki, peyk vasitəsiylə yayımlanan istənilən kanal kabel televiziyalarına çıxmaqla Azərbaycanın daxili proseslərinə müdaxilə edə bilər. Bundan başqa belə bir addım atmaqla prezidentin tapşırığı pozulmuş olacaq.

BİRİNCİ SUAL
Maraqlıdır, nədən bütün telekanallardan əcnəbi seriallar yığışdırıldı və bu gün “Dalğa TV”-də serialların nümayişinə icazə verildi?

İKİNCİ SUAL
Serialların nümayişinə şəxsən Prezident icazə veribmi?

İKİ SUALA BİR CAVAB

“Gündəm Xəbər”in apardığı araşdırmalar sübut edir ki, burada maraqlı oyunlar gedib və hüquqi baxımdan hər şey qaydasındadır. Belə ki, yeni telekanal peyk vasitəsiylə yayımlanacaq. Deməli problem yoxdur. Amma problem odur ki, kanal kabel televiziyalarına çıxış əldə edir və MTRŞ buna müdaxilə etmək fikrində deyil. Deməli, sağ əllə sol qulağı qaşıma prinsipi işə düşüb və yeni kanal o biri kanallardan daha çox tamaşaçıya sahib olacaq. Buna Prezidentin icazə verməsi isə inandırıcı deyil. Çünki şəxsən Əli Həsənov bəyan etmişdi ki, Prezident yerli serialların inkişafında maraqlıdır. Deməli bu gün həyata keçirilən oyunlardan Prezidentin xəbəri yoxdur.

İZAHAT

Kabel televiziyaların imkanı bu gün kifayət qədər artıb. Adi fakt: AİLƏ TV və KATV-nin birlikdə auditoriyası istənilən müstəqil kanalın imkanları daxilindədir. Bu halda “Dalğa TV” hər iki kabel televiziyasında, həmçinin digər kabel televiziyalarında yayımlanacaqsa deməli bu kanal müstəqil kanallardan daha çox auditoriyaya sahiblənəcək. Belə olan halda qazanan kim olacaq?

“Dalğa TV”-nin “Xəzər” bucağı

Maraqlıdır, soruşa bilərsiniz ki, maraqlı şahmat kombinasiyası quraraq Prezidentdən xəbərsiz bu prosesi kim həyata keçirə bilər?. Cavab aydındır, yeni kanal Xəzər TV-nin demək olar ki, nəzarətindədir və buna bir başa məsul şəxs Əli Həsənovun oğlu Şamxal Həsənovdur. Amma yenə inanmaq istəməzdik ki, kombinasiyalar qurmaqla Prezidentin tapşırığına qarşı öz köməkçisi belə bir iş görsün. Amma reallıq ortadadır. Reallıq isə budur ki, Prezident əcnəbi seriallara qadağa qoymuşdu və büdcədən vəsait ayırmaqla yerli serialların inkişafına meydan açmışdı. Bu gün isə meydan əldən gedir.

MARAQ NƏDİR?

Sözsüz ki, ağıla ilk gələn sual budur ki, nədən belə addım atılır və özəl kanalların faktiki sıradan çıxmasına fitva verilib?. Çox da ciddi, ali məqamlar haqqında düşünməyə dəyməz. Söhbət yalnız və yalnız maddi maraqlardan gedir. Bu gün TV məkanında liderlik ATV-də idi və sözün həqiqi mənasında reklam bazarına ATV təsir edə bilirdi. Amma son bir ayda ATV dimdiyindən tələyə düşdü və hazırda bu kanalın reklam bazarına Xəzər TV sahiblənmək istəyir. Buna görə “ATV+”-unda mövqeyini “Dalğa TV” ələ keçirtmək istəyir. Çox təssüflər ki, bu proses çox qatışıq və aldatma sistemi ilə reallaşdırılır. Yəqin buna görə də Xəzər TV rəhbərliyi nə zamansa ATV rəhbərliyi kimi cavab verməli olacaq. Hazırda isə Xəzər TV maraqlarını reallaşdıra bilir.

NƏTİCƏ?

Nəticə aydındır ki, televiziyaların tam iflası ilə tamamlanacaq. Bu günün özündə də kadr bazası şübhəli olan Xəzər TV teleməkanın lideri olacaq. Olsun... rəqabətdə imkanlardan istifadə edərək irəli çıxan və qalib gələni ittiham etmək mümkün deyil. Amma... unutmayaq.

NƏYİ UNUTMAYAQ?

Xəzər TV-nin yaranışını. Bu kanalı Fətullah Gülən tərəfdarları yaratdı və uzun illərdə tam olaraq FETO sisteminin nəzarəti ilə fəaliyyət göstərdi. “Saman Yolu”nun Xəzər TV-yə çevrilməsi isə göz qabağında baş verdi. Kommersiya maraqlarına görə FETO-çular arasında savaş yaşandı. Kanal yeni adla fəaliyyətə başladı. Amma bu günün özündə Xəzər TV-nin kadr bazasını saf-çürük etsək nələrlə rastlaşacağıq, bax bu başqa bir mövzudur. Belə olan halda ölkənin teleməkanını FETO-çuların bir zaman yaratdığı (indi forma dəyişibmi?) telekanala qurban verməyə dəyərmi?

SONLUQ

Qarşıdan prezident seçkiləri gəlir. Bu gün dünyada baş verən siyasi proseslər sübut edir ki, istənilən ölkədə keçirilən seçkilər çox gərgin və proqnozlaşdırılması mümkün olmayan şəkildə reallaşır. Belə bir məqamda ölkənin yazılı və elektron mediasının nəticəsi məlum olmayan manapoliyaya alınması bizi haralara aparıb çıxaracaq? Ümumiyyətlə bu gün reallaşdırılan informasiya siyasətinin özü belə qorxuncdur. Xatırlayırsınızsa il öncə Eldar Mahmudov MTN-nin rəhbəri olan zaman medianın böyük bir hissəsini nəzarətə almışdı. Bir il sonra aydın oldu ki, 10 ildən çox mediadan yararlanan Mahmudovçular əslində ölkənin informasiya siyasətini öz ciblərinə və geyimlərinə uyğunlaşdırıblarmış. Bəs sabah növbəti Mahmudovçuluq xəstəliyi ortaya çıxarsa nə edəcəyik?

Səfər
gundemxeber.az