İndi o qalib görünür, amma özü də fərqindədir ki, bu aldaddıcı görüntüdür, əslində isə…

Yaxın zamanlara qədər aparıcı media orqanlarında Əmlak Məsələləri Dövlət Komitəsinin (ƏMDK) sədri Kərəm Həsənovun “günəşinin batması”na dair silsilə məqalələr yer alırdı. Xüsusilə də məlum “MTN olayları”ndan dərhal sonra “əmlak kralı”nın da məşhər ayağına çəkiləcəyi ən populyar versiyalar arasında yer almaqdaydı.

“Gündəm Xəbər” xatırladır ki, bu qəbildən olan informasiyalar heç də təsadüfi deyildi və Kərəm Həsənov doğrudan da “MTN olayları” zamanı, eləcə də ondan sonra bir müddət “qara zolaq”da taleyinə necə qərar veriləcəyini gözləməkdəydi. Hətta iş ora qədər ciddiləşmişdi ki, “əmlak kralı” başqa vaxt önəm belə vermədiyi mediayla işləmək yönündə tərpənişlər göstərməyə başladı. Kərəm Həsənovun azacıq “diqqəti” yetərli oldu ki, saytlarda “əmlak şefi” haqda tənqidi yazılar bir neçə aylıq da olsa görünməz oldu. Elə bu bir neçə aylıq fasilə Kərəm Həsənova da bəs etdi ki, düşdüyü “qara zolaq”dan çıxa bilsin. Bu isə onun ilk xilası deyildi, Kərəm Həsənov həyatın dibindən gəldiyindən dəfələrlə bu kimi situasiyalarla üzləşib, hələlik hər dəfəsində xilas olmağı bacarıb. Elə onun yüksəlişi də maraqlı epizodlarla zəngindir, tanış olaq....

Rafiq Əliyevə gileylənib: “Kirayədə qalıram, rayondan pay gəlməsə…”

Beləliklə, Kərəm Həsənovun şəxsi dosyesindən başlayırıq… (“Gündəm Xəbər” xatırladır ki, bu material Kərəm Həsənovu çox yaxından tanıyan birinin dilindən nəql olunub və bir sıra media orqanlarında dərc olunub…)
Kərəm Həsənov 1992-ci ildən Anti-inhisar Komitəsində sıradan bir məsləhətçi işləyirdi. 90-cı illərin sonlarında o, sabiq iqtisadi inkişaf nazri Fərhad Əliyevin qardaşı, "Azpetrol” Şirkətinin rəhbəri Rafiq Əliyevlə tanış olur. Kərəm Həsənovun odlu-alovlu çıxışları Rafiq Əliyevin xoşuna gəlir.
K.Həsənov vaxtaşırı uzun illərdir işlədiyi Komitədəki əməkhaqqının azlığından, Yasamalda kirayədə yaşamasından, rayondan yardım olmasa dolanışığının çətinliyindən R.Əliyevə gileylənərək, əlverişli variant olsa həmyerli kimi onun da nəzərə alınmasını xahiş edirdi. Fərhad Əliyev Dövlət Əmlak naziri təyin olunduqdan sonra R.Əliyev qardaşından K.Həsənovu məsul bir vəzifəyə təyin etməyi xahiş edir.
Qardaşının sözünü eşidən F.Əliyev K.Həsənovu qəbul edir. Onu başdan–ayağa süzdükdən sonra ilk tapşırığını verir: "Əynindəki nimdaş pal-paltarını dəyiş, məmura yaraşan tərzdə geyin…”

Fərhad Əliyevlə tanışlıq təkcə kostyumunu yox, bütün həyatını dəyişir...

Fərhad Əliyev bu görüşdən sonra Kərəm Həsənovu sınaq müddətinə departament direktorunun müavini təyin etdi. Həmin müddətdə "barmaq gətirmək” üçün göndərdiyi yerdən Kərəm Həsənovun "qol gətirdiyini” müşahidə edən Fərhad Əliyev qardaşının zamin durduğu bu gəncdə qeyri–adi "istedad” olduğunu görür. Kərəm Həsənovla bağlı qardaşının səhv etmədiyini, onun karyera xatirinə istənilən addımı atmağa hazır bir şəxs olduğunu başa düşür. Lakin Kərəm Həsənovdakı bu "keyfiyyətin” sonradan onun özünə qarşı da çevrilə biləcəyini nəzərə almır…

Sınaq müddəti başa çatdıqdan sonra Fərhad Əliyev Kərəm Həsənovu Orta və İri Müəssisələrin Özəlləşdirilməsinin Təşkili Departamentinin direktoru təyin edir. Respublikada ən məsuliyyətli sahələrdən birinin etibar edildiyi vaxtda belə bir şəxs F.Əliyev üçün çox lazım idi. O, F.Əliyevin ona olan inamından, etimadından istifadə edib digər həmyerliləri – Anti-inhisar Komitəsində işləyən Rüstəm Şahbazovu özünə müavin təyin etdirir və beləliklə "Cəlilabad triosu” yaranır…

K.Həsənovun canfəşanlığı və fədakarlığı Fərhad Əliyev tərəfindən qiymətləndirildi. Onun təqdimatı ilə 2000-ci ildə K.Həsənov Dövlət Əmlakı Nazirinin müavini vəzifəsinə təyin olundu.
2001-ci ildə Azərbaycan Respublikası Prezidentinin Fərmanı ilə İqtisadi İnkişaf Nazirliyi yaradıldı. Yeni strukturda Dövlət Əmlakının Özəlləşdirilməsi Departamenti ayrıca bir komitə səlahiyyətli qurum oldu. F.Əliyevin təqdimatı ilə onun etibarlı adamı hesab etdiyi K.Həsənov da bu departamentin direktoru təyin olundu.

Fərhad Əliyevi həbsə göndərdi, müəssisələrini əlindən aldı

Prosesin sonrakı gedişatı hər kəsə bəlli olduğundan bu məqamlar üzərində xüsusi dayanmağa ehtiyac duymuruq. Hər kəsə bəllidir ki, sonralar yüksəlişində müstəsna rolu olmuş Fərhad Əliyev məhz Kərəm Həsənovun xəyanəti nəticəsində çökdürülür. Fərhad Əliyev həbs olunduqdan sonra Kərəm Həsənov onun nəzarətində olan obyektləri əlindən almağa başladı. Təbii ki, “yuxarıların” tapşırığı ilə… Ancaq öz payını da götürməyi unutmadı.
Fərhad Əliyev aid “Mingəçevir Regenerat” ASC, “Mingəçevir Texniki Rezin” ASC, “Bakı Elektroavtomat” ASC, “Siyəzən Broyler” ASC, “Azərbaycan Aliminiumu” ASC, “Daşkəsən Filizsaflaşdırma” ASC, “Azərelektroterm” ASC, “Azərboru “ASC, “Bakıelektrikşəbəkə” ASC, “Sumqayıtelektrikşəbəkə” ASC ilə bağlanmış müqavilələr guya investorlar tərəfindən müqavilə şərtlərinin yerinə yetirilməməsi adı ilə ləğv olundu.
Həmin müəssisələrin fəaliyyətinə Kərəm Həsənov birbaşa özü nəzarət edir. Hazırda bu müəssisələrin gəliri komitənin “katyoluna” ödənilir.
Bundan başqa Fərhad Əliyevin respublikanın müxtəlif yerlərində, Bakı şəhərində yaxınlarının adına özəlləşdirdiyi qeyri-yaşayış sahələri əlindən alındı. Onların bir hissəsini Kərəm Həsənov öz yaxınlarının adına keçirdi.
Fərhad Əliyev tərəfindən açılan, onun yaxınlarının nəzarət etdiyi bəzi müəssisələrin fəaliyyəti isə dayandırıldı.

Həsənovun əmlak siyahısında nələr var?

İndi isə qısa da olsa Həsənovun sahib olduğu əmlak barədə məlumat verək. Maraqlıdır, görəsən K.Həsənov aldığı saysız –hesabsız mənzilləri, torpaq sahələrini, obyektləri hansı vəsaitlə əldə edib?
K.Həsənov həmyerlisi, ona karyerada qalxmağa kömək etmiş F.Əliyevdən fərqli olaraq, Bakı şəhərinin mərkəzindən uzaq, şəhər ətrafında yerləşən, gözə çarpmayan müəssisə və obyektləri ələ keçirməyə daha çox üstünlük verir. Ona birbaşa və dolayısı ilə məxsus olan torpaq və qeyri yaşayış sahələrinin tam olmayan siyahısını oxuculara təqdim edirik:
1. Xəzər rayonu Şüvalan qəsəbəsi, A.İldırım küçəsi 39 ünvanındakı rayon maliyyə şöbəsinin köhnə 2 mərtəbəli binası. Tikilialtı sahəsi 600 kv.m, torpaq sahəsi 1156 kv.m.
2.Xəzər rayonu Şüvalan qəsəbəsi, Şimal DRES-in uşaq bağçası. Tikilialtı sahə 800 kv.m, torpaq sahəsi 3000 kv.m.
3.Suraxanı rayonu Hövsan qəsəbəsi, Yardımçı təsərrüfat. Tikilialtı sahə 1300 kv.m, torpaq sahəsi 47000 kv.m.
4.Xəzər rayonu Mərdəkan qəsəbəsi, Dəniz yolu. Məmmədov Umudəli Ramazan oğlunun adına rəsmiləşdirilib .Tikilialtı sahə 220 kv.m, torpaq sahəsi 8400 kv.m.
5.Suraxanı rayonu Əmircan qəsəbəsi, E.Həsənov küçəsi 42 ünvandakı qeyri-yaşayış sahəsi. Tikilialtı sahə 150 kv.m, torpaq sahəsi 1300 kv.m. Binnətov Zəbullanın adına rəsmiləşdirilib.
6. Xəzər rayonu Şüvalan qəsəbəsinin cənub–şərq hissəsində Maşınqayırma Pansionatının yarımçıq tikilisi. Tikilialtı sahə 600 kv.m, torpaq sahəsi 127022 kv.m. Rəsmiləşdirilib Davudov Yusif Abdulhəmid oğlunun adına.
7.Xəzər rayonu Mərdəkan qəsəbəsi, H.Z.Tağıyev küçəsində yerləşən Rabitə və Yüksək Texnologiyalar Nazirliyinin balansında olan qeyri –yaşayış sahəsi. Tikilialtı sahə 120 kv.m, torpaq sahəsi 9000 kv.m. Bayramova Xalidə Nuru qızının adına rəsmiləşdirilib.
8.Sabunçu rayonu Sabunçu qəsəbəsi, İ.Aslanov küçəsi, 3 ünvanda qeyri-yaşayış sahəsi. Tikilialtı sahə 1200 kv.m, torpaq sahəsi 23500 kv.m. Mustafayev Azad Niyazi oğlunun adına rəsmiləşdirilib.
9.Xəzər rayonu Gürqan qəsəbəsi, Dənizkənarı tikili. Tikilialtı sahə 550 kv.m, torpaq sahəsi 50000 kv.m.
10.Xəzər rayonu Şüvalan qəsəbəsi, A.İldırım küçəsi “Aqro” kooperativinin və Su doldurma məntəqəsinin yanında. Tikilialtı sahə 2000 kv.m, torpaq sahəsi 58000 kv.m.
11. Xəzər rayonu Buzovna yolu, Mərdəkandan Buzovnaya gedəndə sol tərəfdə SMD-26-nın əmlakı və torpaq sahəsi.
12. Vişnevka dəmir yolunun yanı, Yardımçı təsərrüfat, idman sağlamlıq mərkəzi.
13.Sabunçu rayonu Bakıxanov qəsəbəsi, Sülh küçəsi 1 a keçmiş Keyfiyyət Evi. Tikilialtı 960 kv.m, torpaq sahəsi 3000 kv.m. İsmayılov Ramazan İslam oğlunun adına rəsmiləşdirilib.
14. Xəzər rayonu Şüvalan qəsəbəsi, bağlara gedən təzə yolun üstündə. Tikilialtı sahə və torpaq sahəsi 5000 kv.m. Donuzçuluq və heyvandarlıq yardımçı təsərrüfatı.
15.Xətai Mexanizasiya ASC-nin nəzarət səhm zərfi.
16.Bəhrəmtəpə Qum-Çınqıl ASC-nin nəzarət səhm zərfi.
17.Nəsimi rayonu, S.Vurğun küçəsində yerləşən Bakı şəhər yol polisinin keçmiş ərazisi.
18.H.Zərdabi küçəsində Ticarət Nazirliyinin keçmiş qarajının yerində hündür mərtəbəli binaya şərikliyi (Papanin körpüsünün yanı.)
19.H.Ələskərov küçəsi 6-12 ünvanında hündür mərtəbəli binaya şərikliyi.
20. Nizami rayonu 8-ci km bazarı.
21.Kənar şəxslərin adına rəsmiləşdirilən Nərimanov və Səbail rayonundakı villa və mənzillər. H.Hacıyev küçəsindəki 2 mənzili, Qubada, Şamaxıda, Qəbələdəki villaları, Bigəhdəki bağ evi və s.

Son əvəzi: bu dəfə də xilas oldu, amma...

Görünən isə odur ki, istər “MTN olaylarından”, istərsə də ətrafında cərayan edən son qorxulu ssenarilərdən sıyrılmağı bacaran Kərəm Həsənov bu “bacarığı” sona qədər davam etdirə bilməyəcək. “Gündəm Xəbər”in əldə etdiyi səhih məlumatlara görə hakimiyyət daxilindəki böyük güclər Kərəm Həsənovun “yıxılması” üçün səfərbər lolublar və onların belə asanlıqla təslim olacağını düşünmək sadəlöhvlük olardı. Düzdür, indiki halda “əmlak kralı” bütün çətinlikləri arxada qoymuş kimi görünür, əksinə mövqelərini bir qədər də möhkəmləndirməyi bacarıb. Amma bunun sona qədər davam edəcəyi xeyli şübhəlidir. Növbədənkənar prezident seçkilərindən sonra – payıza doğru ciddi kadr islahatlarına gediləcyi ən üst səviyyədə belə etiraf olunub. Həmin islahatlar dalğasının ilk olaraq vuracağı məmur isə məhz K. Həsənov olacaq. Təcrübə isə göstərib ki, “vurulduqdan” sonra onun yığdıqları da son qəpiyinə kimi əlindən alınır. Odur ki, bizə prosesin sonunu gözləmək qalır.

Akif