“Yəni, Vəkillər Kollegiyasında vəkil Fəxrəddin Mehdiyevin vəkillik fəaliyyətinə bir il müddətinə xitam verildi”

“Gündəm Xəbər”ə daxil olan məlumatlara görə Gədəbəy rayon İcra Hakimiyyətinin başçısı Ramiz Yediyarov Vəkillər Kollegiyasına şikayət ünvanlayıb. Məqsədi vəkil Elçin Sadıqovun cəzalandırılmasına nail olmaqdır. Yaşanan olay haqda məlumatı redaksiyamıza vəkilin özü çatdırıb. O, qeyd edir ki, “icra başçısı əslən Gədəbəydən olan iş adamlarını “gözümçıxdıya salır”, mən də onların pozulmuş hüquqlarını məhkəmələrdə müdafiə etdiyimdən, icra başçısı belə bir addımını atıb”.
E.Sadıqovun bildirdiyinə görə, “Hüquqları tapdalanmış sahibkarlar iddia etdikləri pozuntularla bağlı, hətta aidiyyəti qurumlara müraciətlərini də ünvanlayıblar. Mən də sahibkarların üzləşdikləri haqsızlıqlarla bağlı bir çox dövlət qurumlarının rəhbərlərinə, o cümlədən ölkə başçısı cənab İlham Əliyevə də şikayətlər ünvanlamışam. Yazıb gərəkli addımların atılmasını da xahiş etmişəm. Belə bir addımların atılması, bir vəkil olaraq mənim konstitusion hüququmdur. Ona görə də Gədəbəy rayon İcra Hakimiyyətinin başçısı Ramiz Yediyarov, mənimlə bağlı Vəkillər Kollegiyasının Rəyasət Heyyətinə şikayət yazıb. İcra başçısının yazmış olduğu şikayətlə bağlı artıq Kollegiyada intizam icraatına başlanıb” deyə vəkil bildirib.
“Faciə odur ki, bu günə kimi bir neçə vəkil, xüsusilə də siyasi əhəmiyyət daşıyan məsələlərlə bağlı məhkəmə proseslərinə çıxan elə vəkillər olub ki, onlar müxtəlif qurumların şikayətləri əsasında Vəkillər Kollegiyasından uzaqlaşdırılıblar. Sonuncu belə bir addım yaxın vaxtlarda atıldı. Yəni, Vəkillər Kollegiyasında vəkil Fəxrəddin Mehdiyevin vəkillik fəaliyyətinə bir il müddətinə xitam verildi. Adı çəkilən qurumun Rəyasət Heyyəti, hətta ötən ilin noyabrın 20-də vəkil Yalçın İmanovun Vəkillər Kollegiyasından xaric olunması ilə bağlı məhkəməyə müraciət etmək haqda qərar da qəbul etmişdi. Məhkəmə qərar çıxarana qədər İmanovun vəkillik fəaliyyəti dayandırılmışdı.
F.Mehdiyev barəsində qərar Baş Prokurorluğun, Y.İmanov barədə qərar isə Penitensiar Xidmətin rəhbərliyinin vermiş olduqları şikayət əsasında çıxarılmışdı. Baş Prokurorluq vəkilin istintaq sirrini yaydığını iddia edirdi, Penitensiar Xidmət isə, vəkilin hüquqlarını müdafiə etdiyi şəxslərdən birinin həbsxanada işgəncəyə məruz qalması haqda açıqlamasına etiraz etmişdi.
Bu günə kimi bir neçə vəkil–Xalid Bağırov, Əlayif Həsənov və digərləri Kollegiyadan uzaqlaşdırılıblar. Vəkillər bunu siyasi işlərə çıxmaları, yerli və beynəlxalq hüquq müdafiəçilərinin “siyasi məhbus” kimi tanıdığı şəxslərin hüquqlarını müdafiə etmələri ilə izah ediblər. Kollegiyada isə irəli sürülən iddiaları inkar edirlər və hər bir vəkilin adı çəkilən qurumdan uzaqlaşdırılmasını fərqli səbəblərlə izah etməyə çalışırlar. Bu gün Vəkillər Kollegiyası vəkillik fəaliyyəti dayandırılmış şəxslərin iddialarını rədd edərək, onların bu sahə ilə bağlı qanunlara əməl etmədiklərinə görə, kollegiyadan kənarlaşdırıldığını isbat etməyə çalışırlar”

Rahib Bəxtiyarov