Arxiv sənədlərinə müdaxilələri və arayışların hazırlanmasını bələdiyyədə çalışan Humay adlı xanım həyata keçirir ki, o da, bu yöndə rəhbərliyin ona vermis olduğu tapşırıqlar əsasında addımlarını atır
Bakı şəhəri, Səbail rayonunun Bayıl yamacı ərazisindəki sürüşmə prosesinin daha çox Badamdar yaşayış massivi ərazisində yaşayan sakinlərə ciddi problemlər yaratması, artıq hər kəsə bəlli olan həqiqətdir. “GündəmXəbər”ə daxil olan məlumatlara görə, bu gün problemin aradan qaldırılması istiqamətində atılan addımlarla bərabər, belə bir problemin əmələ gəlməsində rolu olan hər bir vəzifə sahibinin məsələsi də, artıq gündəmə gəlib. O da hər kəsə bəlli olan həqiqətdir ki, Səbail rayonunun istənilən ərazisində torpağın qiyməti fantastik dərəcədə bahadır və illər öncə həmin torpaq sahələrinin bir çoxu, bələdiyyələr və icra hakimiyyətinin məsul şəxsləri tərəfindən qanunsuz olaraq başqa-başqa şəxslərə satılıb. Bəli, rayonun ərazisində elə torpaq sahələri var ki, həmin torpaq sahələri ayrı-ayrı imkanlı şəxslər tərəfindən zəbt olunub və müəyyən tikinti işləri də aparılıb. Amma inşası başa çatdırılmış elə tikililər də var ki, onların heç bir sənəd-sübutları yoxdur. Tərəfimizdən apardığımız apardığımız araşdırmalar zamanı o da bəlli oldu ki, Səbail rayonu ərazilərində torpaqların zəbt olunması prosesi, daha çox 2007-ci ildən sonra geniş vüsət alıb. Onu da bildirək ki, 2009-cu ildən 2015-ci ilə kimi Səbael rayon İcra Hakimiyyətinin başçısı vəzifəsini, bu gün Nəsimi rayonuna rəhbrlik edən Asif Əsgərov daşıyıb. Onu da unutmaq olmaz ki, həmin illərdə nə Səbail bələdiyyəsinin, nə də ki, Batamdar bələdiyyəsinin rəhbərliyi, RİH-i başçısının icazəsi olmadan hansısa addımlarını ata bilməyiblər. Belə bir halların baş verməsinə baxmayaraq, bu gün sürüşmə prosesi ilə bağlı araşdırmalar aparılarkən, Asif Əsgərov özünü “sudan quru” çıxartmağa çalışır və öz təsir imkanlarından yararlanaraq, bütün günahları hər iki bələdiyyə rəhbərliyinin boynuna qoymaq istəyir. Amma, bu heç də o demək deyil ki, belə bir problemin əmələ gəlməsində Səbail bələdiyyəsinin sədri Firdovsi Cəbrayılov və Badamdar bələdiyyəsinin sədri Həbib Əsədov “Aydan arı, sudan duru”durlar. Hal-hazırda hər iki bələdiyyə sədrlərinin ciddi nəzarətə götürüldükləri və fəaliyyətlərinin təftiş olunduğu da bildirilir. Əslinə baxsan, belə bir problemlərin əmələ gəlməsində bələdiyyələr ciddi məsuliyyət daşımasalar da, bu gün durumun fərqli olduğu da iddia olunur.
Belə təlatümlü bir vaxtda başı üzərində dolaşan “kabus”dan Badamdar bələdiyyəsinin sədrinin özünü qorumağa çalışması, daha çox diqqəti cəlb etməkdədir. “Gündəm Xəbər”in əldə etdiyi səhih məlumatlara görə, 8 noyabr 2018-ci il tarixdə Səbail rayon İcra Hakimiyyəti başçısı cənab Vüqar Zeynalovla, Batamdar bələdiyyəsinin şura üzvləri arasında görüş keçiriləcək və həmin görüşdə Həbib Əsədovun “sınaq imtahanı” verəcəyi də bildirilir. Çatdırılan məlumatlara görə, adı çəkilən bələdiyyənin sədri bu görüşə ciddi hazırlıq işləri görməkdədir. Belə ki, həmin görüşdə Həbib Əsədova yaxın bir neçə şəxsin “odlu-alovlu” çıxış edəcəyi, hətta Badamdar bələdiyyəsi sədrinin “əvəzolunmaz şəxs” olacağı, Səbailin yeni icra başçısının diqqətinə də çatdırılacaq. Belə bir addımların atılması yöndə Həbib Əsədova yaxınlığı ilə seçilən şəxslərin, bir neçə gün bundan öncədən başlayaraq bu yöndə səfərbər olunmaları haqda məlumatlar əldə etmişik.
Əgər həmin görüşdə bir kimsə RİH-nin yeni başçısına çatdırsa ki, təkcə 2011-ci ildən bu günə kimi Badamdar bələdiyyəsi sədrinin “xeyr-duası” ilə satılmış torpaqlarla bağlı araşdırmalar aparılsın, o halda yəqin ki, bir çox “qaranlıq məsələlərə” aydınlıq da gətirilər. Daxil olan məlumatlara görə, təkcə son iki ay ərzində adı çəkilən bələdiyyədə vergi şöbəsinin rəisi vəzifəsini daşıyan Ramil Mustafanın vasitəsilə, qəsəbənin 3-cü massiv adlanan ərazisində 30 sot torpaq sahəsinin satıldığı bildirilir. (Verilən məlumatlara görə 1 sotu 30 min manatdan satılıb) Bu bələdiyyəyə ildə orta hesabla 30-35 min manat məbləğində dotasiya verilsə də, həmin dotasiya təyinatı üzrə xərclənmir və bunun da araşdırılmasına ciddi ehtiyac duyulur. Batamdar ərazisində Ramil Mustafanın qardaşına məxsus villaların sayı-hesabının bilinmədiyi də iddia olunur. “GündəmXəbər”in əldə etdiyi məlumatlara görə, 2007-ci ildən bələdiyyələrin torpaq sahələrini açıq-aşkar şəkildə satmaları qadağan olunsa da, Həbib Əsədov satışa çıxartdığı torpaq sahələrinə köhnə tarixə sənəd verir və o, belə bir yolla da atdığı qanunsuz addımlarını qanuniləşdirir. Bu yöndə araşdırmalar aparılarsa, o halda da bəzi mətləblərə aydınlıq gətirilə bilər. Çünki, bələdiyyə rəhbərliyinin göstərişi ilə arxiv sənədlərinə müdaxilələr olunur və yaxın vaxtlarda torpaq sahəsi satılmış şəxslərə arayışlar verilir ki, guya həmin şəxslər 2005-ci ildə, yaxud da 2006-cı ildə torpaq sahələri alıblar. Arxiv sənədlərinə müdaxilələri və arayışların hazırlanmasını bələdiyyədə çalışan Humay adlı xanım komputerdə həyata keçirir ki, o da, bu yöndə rəhbərliyin ona vermiş olduğu tapşırıqlar əsasında addımlarını atır. Ayrı-ayrı vaxtlarda keçirilən və məzmun etibarı ilə bir-birindən fərqlənən tədbirlər zamanı da, bələdiyyə büdcəsinə məxsus vəsaitlər mənimsənilir. Tutaq ki, Novruz-Bahar bayramı ilə bağlı hansısa konsert proqramı keçiriləcək, o halda həmin tədbirə xərclənəcək vəsaitlər şişirdilmiş rəqəmlər əsasında sənədləşdirilir. Tədbirin keçirilməsinə az məbləğdə vəsait xərclənsə də, rəsmi sənədlərdə şişirdilmiş rəqəmlər qeyd olunur və belə bir yolla da, həmin vəsaitlər ələ keçirilərək mənimsənilir. Həbib Əsədovun gəlir mənbələri təkcə bunlarla yekunlaşmır, o, hətta bələdiyyədə “ölü canlar” saxlamaqla da, hər ay xeyli məbləğdə “irəli düşə bilir”. Həmin “ölü canlar” Batamdar bələdiyyəsinin ştat cədvəlində bələdiyyə qulluqçuları hesab olunurlar. Onlardan Səfərov Samir Knyaz oğlu nəzarətçi, Mayılova Qiymət Cümşüd qızı xadimə, Bağırov Taleh Eldar oğlu sürücü, Xoşbəxt Məmmədovanın isə bağban olduğu bildirilir. Bütün bunlar da onu sübut edir ki, Batamdar bələdiyyəsinin sədri Həbib Əsədov rəhbərlik etdiyi sahəyə özünün dədə mülkü kimi yanaşır və hər cür qanunsuzluqlara da imza atmaqda davam edir.
Araşdırmamız davam edəcək.

GundemXeber.Az