Elxan Süleymanov: “Altı villamın dəyəri 50 milyon manatdan çoxdur, amma həmin ərazidə olan yaşayış evlərinin ümumi dəyəri, heç bir milyon manat da etmir. Buna görə də, həmin evlər sökülməli və Göyçay çayının məcrası dəyişdirilməlidir”

Bir-iki gün bundan öncə Göyçay şəhəri, H.Hacıyev küçəsi ev-31 ünvanda yaşayan Həsənov Seyran Əmiraslan oğlu, ölkə rəhbəri cənab İlham Əliyevə və digər vəzifə sahiblərinə yazmış olduğu şikayət ərizəsinin bir surətini də, “Gündəm Xəbər”in redaksiyasına göndərib. Seyran Həsənov Prezidentə yazmış olduğu ərizəsində qeyd edir:
“Möhtərəm Prezident! Azərbaycan xalqı Sizin ədalətli olmağınıza tam şəkildə inanır. Əgər Sizdən bəzi harın, qudurğan, vəzifəli, imkanlı şəxslər ehtiyat etməsələr, o halda inanın ki, onlar sıravi vətəndaşları tapdaqlar altında tapdalayarlar. Belə əqidə və düşüncə sahiblərindən biri də, əslən Göyçay rayonundan olan və Şamaxı rayonundan deputat seçilmiş Elxan Süleymanovdur. Bu şəxs bir neçə il bundan əvvəl Göyçay çayının düz ortasında altı ədəd möhtəşəm villa inşa etdirib. Hansı ki, həmin villalar Göyçay çayının axın istiqamətini müəyyən qədər dəyişdirir və belə bir səbəb üzündən də, çayın suyu həyatyanı sahələri yuyub aparır. Buna səbəb olan amillərdən ən əsası, Elxan Süleymanovun inşa etdirdiyi villaların çayın hövzəsini daraltmasıdır.

Hər kəsə o da bəlli oldu ki, bir müddət bundan əvvəl Göyçay körpüsü uçdu və nəticədə böyük bir fəlakət baş verdi. Bu gün həmin villalar uçmasın deyə, Elxan Süleymanov əl-ayağa düşüb və Göyçay çayının məcrasını dəyişdirmək istəyir. Yəni, bu şəxs istəyir ki, çayın məcrasını dəyişdirsin və çay bizim yaşadığımız əraziyə yaxın yerdən axsın. Belə bir plana görə də, təqribən 50-dən çox sakinə məxsus yaşayış evlərinin sökülməsi gözlənilir. Çünki, Elxan Süleymanov bildirib ki, “Altı villamın dəyəri 50 milyon manatdan çoxdur, amma həmin ərazid”ə olan yaşayış evlərinin ümumi dəyəri, heç bir milyon manat da etmir.

Buna görə də, həmin evlər sökülməli və Göyçay çayının məcrası dəyişdirilməlidir” deyir. Əslində bu cür yanaşma harınlıq və qudurğanlıqdır. Çünki yaşadığımız bu evləri ata-babalarımız halal zəhmətlə, alın təri ilə qazandıqları pulların hesabına tikdiriblər. Yaşadığımız evlər bizim ata yurdumuzdur. Burada 50-dən çox yaşayış evi var və bu evlərdə 300 nəfərdən çox sakin yaşayır.

Buna baxmayaraq, Elxan Süleymanov qeyri-qanuni yollarla əldə etdiyi haram pullar hesabına, Göyçay çayının kənarında altı ədəd möhtəşəm villa inşa etdirib və bu gün də belə bir xəyala düşüb. Adı çəkilən bu şəxsin Azərbaycanın çox yerlərində möhtəşəm villaları var. O, bura bəlkə də ildə bir dəfə gəlir. Biz kasıb sakinlərik və halal zəhmətimiz hesabına qazandığımız qəpik-quruş pulla ailələrimizi birtəhər dolandırırıq. Elxan Süleymanovun kasıb insanlara yuxarıdan aşağı baxması, artıq onun harınlaşmasından xəbər verir.

Deputat yaxın günlərdə evlərimizin sökülməsi məsələsini gündəmə gətirmək istəyir. Onu da bildirək ki, Göyçay çayının hövzəsində əmələ gələn problemin kökünü, məhz bu şəxsin qanunsuz yollarla inşa etdirdiyi altı ədəd villanın varlığında axtarmaq lazımdır. Çünki, Elxan Süleymanov həmin villaları inşa etdirməsi səbəbindən, Göyçay çayının hövzəsi daralıb. Bunu müəyyən etmək üçün hansısa ekspert və yaxud da hansısa istintaq orqanı lazım deyil, adi gözlə baxmaqla da müəyyən etmək olar. Elxan Süleymanovun haram yollarla inşa etdirdiyi altı ədəd villası, bu gün biz göyçaylılar üçün böyük bir dərddir.

Ona görə də biz sakinlər ölkə rəhbəri cənab İlham Əliyevdən və digər vəzifə sahiblərindən xahiş edirik ki, bizi Elxan Süleymanovun zülmündən xilas etsinlər. Əgər biz bu möhtəkirin zülmündən, hədələrindən xilas ola bilməsək, o halda gələcəkdə seldən, daşqından qurtarmaq bizim üçün çox çətin olacaq. Ona görə də istərdik ki, bu şəxsə məxsus villalar sökülsün. Belə bir addım atılarsa, gələcəkdə baş verə biləcək təhlükənin qarşısı da alınar. Biz sakinlər möhtərəm İlham Əliyevdən bir daha xahiş edirik ki, Elxan Süleymanovun çirkin niyyətinin qarşısını almaq məqsədilə, ona məxsus villaların sökülməsi üçün aidiyyəti üzrə lazımi tapşırlarını versin. Yəqin ki, o halda biz sakinlərin narahatçılığına son qoyular”.
Mövzu diqqətimizdədir.

GundemXeber.Az