Elektron poçtumuza Göyçay sakinlərindən daxil olan məlumatda vurğulanır ki, hazırda Saatlı rayon icra başçısı vəzifəsini daşıyan Nazim İsmayılovun oğlu Anar İsmayılov yenidən sosial şəbəkələrdə dəbdəbəli yaşam tərzini paylaşmaqla bir növ atasının dövlətin pullarını necə oğurlamasını reklam edir.



Qeyd edək ki, apardığımız araşdırmada məlum oldu ki, həqiqətən də Facebook sosial şəbəkəsində icra başçısı Nazim İsmayılovun oğlu Anar İsmayılova məxsus (Anar Ismayılov) profil fəaliyyət göstərir. Göyçay sakinləri iddia edirlər ki, Anar İsmayılovun digər sosial şəbəkə Instaqramda da profili mövcuddur və burada özünün dəbdəbəli həyat tərzinin fotolarını daha geniş yayıb. Ancaq apardığımız axtarışlarda Instaqram sosial şəbəkəsində Anar İsmayılovun şəxsi profilini tapa bilmədik. (Araşdırmamız davam edir-Red)



Saatlı icra başçısı oğlunun Facebook sosial şəbəkəsindəki profilinə göz gəzdirdikdə Anar İsmayılovun bahalı avtomobili və müxtəlif ölkələrdə istirahət fotoları nəzərə çarpır. Elektron poçtumuza yazan Göyçay sakinləri iddia edirlər ki, əslində Facebook sosial şəbəkəsində Anar İsmayılovun paylaşdığı fotolar onun dəbdəbəli yaşam tərzinin heç 1 faizi deyil. Yəni başçı oğlu hər 3 (üç) aydan bir Türkiyə, Rusiya, Ukrayna və digər ölkələri gəzərək "pleyboy" həyatı yaşayır.



Xatırladaq ki, bir neçə il öncə Anar İsmayılovun sosial şəbəkədə bahalı avtomobil alması ilə bağlı paylaşdığı foto mətbuatda dərc edildikdən sonra başçı oğlu profilini bağlamışdı. Ancaq gördüyümüz kimi bir müddət keçdikdən sonra Anar İsmayılov yenidən sosial şəbəkədi profilini aktiv edərək dəbdəbəli həyat tərzinin kiçik bir hissəsinə aid fotoları paylaşmağa başlayıb.



Göyçay sakinlərinin verdiyi məlumata və Anar İsmayılovun Facebook sosial şəbəkəsindəki profilinə istinad edərək deyə bilərik icra başçısı oğlunun 90-OL-500 dövlət seriyal "Toyota Land Cruiser" avtomobili var. Bundan başqa Anar İsmayılovun profilindəki şəkillərdə onun Rusiyaya, Ukraynaya, Türkiyəyə və digər ölkələrə getdiyi açıq-aşkar görsənir.

Rayon sakinləri qeyd edirlər ki, başçı oğlunun Göyçay şəhərinin mərkəzində yerləşən dəbdəbəli oteli idarə etməklə bərabər bir neçə gəlirli obyektdə də nəzarət edir.



Məlumatda bildirilir ki, Göyçayda hər kəs yaxşı bilir ki, Anar İsmayılovun sosial şəbəkədə reklam etdiyi avtomobili və gedib gəzdiyi ölkələrə xərclədiyi pullar uzun müddətdir müxtəlif rayonlarda icra başçısı işləyən atası Nazim İsmayılovun "qazanc"ıdır./pia