Bu günlərdə redaksiyamıza müraciət edən Rüstəmova Ulduza Fərman qızı bildirir ki, Göyçay rayonunda bir qrup dəstə tərəfindən oğlunu döyərək ölümcül hala salıblar.

Vətəndaşın məlumatına görə, baş verən hadisə ilə bağlı DIN-nin 102 saylı qaynar xəttinə və Göyçay rayon Polis bölməsinə rəsmi şikayət etsələr də, Polis bölməsi məsələyə əhəmiyyət verməyib. Sabiq Daxili Işlər Naziri Ramin Usubovun dönəmində belə hadisələrə dərhal reaksiya verilirdisə, hazırki Nazir Vilayət Eyvazovun dönəmində vətəndaşların hüquqları heç bir halda qorunmur. DIN-də nə baş verdiyi və müraciətlərə Polis Idarəsi tərəfindən baxılmaması vətəndaşlar arasında böyük şübhələrə səbəb olub. Hansı ki, asayışı qorumalı olan polislər kriminal dəstələrin inkişaf etməsinə göz yumurlar. Heç bir əsas olmadan ölümünə vurulan vətəndaşın anası dövlətin müvafiq qurumlarına müraciət etsə də buna qaneedici cavab ala bilməyən Ulduza Rüstəmova gundemxeber.az-ın redaksiyasına üz tutmalı olub. Fəryad edən ananın redaksiyamıza ünvanladığı müraciəti oxucularımıza təqdim edirik:
''Hörmətli redaksiya, 04.08.2019-cu il tarixində təxminən gecə saat 01:00 radələrində özlərini kriminal aləmin adamları kimi qələmə verən və Bakı Ağır Cinayətlərə Dair Məhkəməsinin hökmü ilə hədə-qorxu, tələbetmə, insan oğurluğu maddələri ilə dəfələrlə məhkum olunmuş Babayev Rövşən, Əhmədov Saday və dəstənin təzə üzvlərindən olan Orxan ve Aqil adlı şəxslər oğlum Rüstəmov Nofəli maşına mindirərək Göyçay rayon Qarabaqqal kəndinin ərazisinə aparıblar. Insanların qorxu və narahatçılığına məhəl qoymadan ölümcül döyüblər.



Oğlum Nofəlin üstündə olan 200 manat pulunu və mobil telefonunu götürüblər. Sonra ayaqlarını yıxılmış vəziyyətdə bağlayıb başına təhqirəramiz hərəkətlər edib şəkilini çəkərək bu vəziyyətə çatdırılmasına görə, sifariş verənə göndəriblər. Bundan sonra Nofəlii yolun hərəkət hissəsindəki Kamaz markalı avtomobilin altına atıb qaçıblar. Xoşbəxtlikdən sürücü ayıq tərpənib üstündən keçməyib. Halhazırda oğlum ağır vəziyyətdə xəstəxanaya yerləşdirilib. Kəllə-beyin travması almaqla, beyin silkələnməsi də qeydə alınıb. Bir sözlə bədənində çoxsaylı qırıq və qançarlarla da diaqnozu ilə həkim nəzarətindədir. Bununla bağlı həmin gecə mən xəstəxanadan yeddi dəfə 102 xidmətinə zəng etdim. Dəfələrlə zəng etməyimə baxmayaraq, yaralı oğlumla polislər maraqlanmadılar. Sadəcə mənə sabah gəlib maraqlanacaqlar deyə cavab verdilər. Sonra mən özüm Plis idarəsinə gedərək yardım etmələrini təkid edəndən sonra, səhərə yaxın gəlib baxıb getdilər.



Bundan sonra mən Daxili Işlər Naziri cənab Vilayət Eyvazova həm elektron, həm də yazılı şəkildə müraciət etdim. Müraciət etməyimə baxmayaraq həmin dəstə barəsində heç bir tədbir görülmədi. Əksinə, oğlumu öldürməyə cəhd edən cinayətkar dəstə sərbəst gəzməyə davam edirlər. Bu gün Göyçayı dövlət qanunları ilə deyil, bir qrup kriminal dəstənin qanunları idarə edir. Mənim oğlumun başına gətirilən hadisədən öncə də, onlar Qarabaqqal kəndinin başında Tariyel adlı şəxsi döyüb və heç bir yerə şikayət etməməsi ilə hədəqorxu da gəlmişdilər. Sizdən xahiş edirəm ki, mənim ailəmin təhlükəsizliyini təmin edib və oğlumu bu hala salan quldur dəstəsini zərərsizləşdirəsiniz!''
Redaksiya olaraq qeyd edək ki, baş verən hadisənin araşdırılmaması dövlət adına heç də xox münasibət bağışlamır.
Mövzu diqqətimizdədir.

Gundemxeber.Az