Korrupsiyaya Qarşı Mübarizə Baş İdarəsinin əməkdaşı Emin Hüseynovun ölüm faktının araşdırılması ilə bağlı Səbail rayon prokurorluğunun hərəkətsizliyi yerli məhkəmə tərəfindən qanunsuz hesab edilsə də, prokurorluq məhkəmə qərarını icra etmir.



Prokurorluq qanunvericiliyin tələblərini pozaraq yerli məhkəmənin qərarına əhəmiyyət verməyib və şikayətçiyə absurd cavab verərək onun hüquqlarının müdafiəsini məhdudlaşdırıb.
Qeyd edim ki, mərhum prokurorluq əməkdaşının ölümü ilə əlaqədar Yeganə Nağıyeva və Elfira Mövsümlü baş vermiş cinayəti bildikləri halda hadisəni gizlətməsi və bu şəxslərin əməllərində cinayət tərkibinin əlamətləri olduğundan onların məsuliyyətə cəlb edilməsi barədə Səbail rayon prokurorluğuna şikayət edilib.



Lakin prokurorluq tərəfindən həmin ərizədə əksini tapan qabaqcadan vəd etmədən ağır cinayəti gizlətmə faktı araşdırılmayıb və qeyd edilən fakt üzrə cinayət işi açılmayıb. Ona görə cinayət təqibini həyata keçirən orqan olan Səbail rayon prokurorluğu ilə bağlı məhkəmə nəzarəti qaydasında şikayət edilib. Avqustun 27-də Səbail rayon Məhkəməsinin hakimi Azər Tağıyev qeyd edilən faktının araşdırılması ilə bağlı rayon prokurorluğunun hərəkətsizliyindən verilmiş şikayətə baxıb. Məhkəmənin qərarı ilə adı çəkilən prokurorluq tərəfindən ərizəçilərin şikayətinə baxılmaması qanunsuz hesab edilib və prokurorluğun üzərinə şikayətə baxıb vətəndaşlara cavab verilməsi vəzifəsi qoyulub.



Məhkəmə müəyyən edib ki, şikayətçilərin ərizəsi üzrə Səbail rayon Prokurorluğu tərəfindən hansısa araşdırma aparılaraq qərar qəbul edilib-edilməməsi, ərizənin aidiyyatı üzrə göndərilib-göndərilməməsi barədə məlumat yoxdur. Ona görə də, məhkəmə hesab edib ki, vətəndaşların prokurorluğa təqdim etdikləri şikayətə baxılıb, bunun nəticələri barədə onlara cavab verilməməsinə dair Səbail rayon Prokurorluğunun hərəkətsizliyi qanunsuz hesab edilsin. Lakin prokurorluğun yerli məhkəmənin qərarının icrası ilə əlaqədar şikayətçiyə ünvanladığı məktubda qeyd edir ki, Türkiyədə başlamış cinayət işi üzrə hökm çıxarıldıqdan sonra digər şəxslərin əməllərində Azərbaycan Respublikası CM-nin 307.2-ci maddəsinin tərkib əlamətlərinin olması müəyyənləşdiriləcəkdir.



Səbail rayon Prokurorluğu qanunvericiliyin tələblərini kobud şəkildə pozaraq yerli məhkəmənin qərarına əhəmiyyət verməyib və absurd cavab verərək şikayətçinin hüquqlarının müdafiəsini məhdudlaşdırıb. Cavab məktubundan da görünür ki, şikayətdə istinad olunan CM-nin müvafiq maddəsinin əlamətləri vardır, sadəcə təqsirləndirilən şəxslərin müəyyən edilməsi qardaş ölkədə cinayət işi üzrə hökm çıxarıldıqdan sonra baş verəcəkdir.



Prokurorluq bu işin araşdırılmasında qərəzlidir və onların belə hüquqazidd cavabı sadəcə vaxt oyalamaq, baş qatmaq, fikri əsas hədəfdən yayındırmaq məqsədi daşıyır. Məhkəmə qərarının icrası ilə əlaqədar Səbail rayon Prokurorluğu həmin şikayət üzrə ən azından mərhumun atası Bəybala Hüseynovun və şikayətdə adlarını göstərilən şəxslərin izahatlarının alınmasını təmin etməli idi.






Elçin Məmməd