Korrupsiyaya Qarşı Baş Mübarizə İdarəsinin mərhum əməkdaşı Emin Hüseynovun məzarının açılması və ekshumasiya işlərinin obyektiv aparılmasına süni maneələr yaradılır. Gundemxeber.Az bildirir ki, bu barədə hüquq müdafiəçisi Elçin Məmməd açıqlama verib. Xatırladaq ki, Emin Hüseynov 2017-ci il avqustunda Türkiyənin Antalya şəhərində istirahətdə olarkən qəfil halı pisləşib və xəstəxanada vəfat edib. Ekspertiza rəyləri və qan analizləri Emin Hüseynovun kənardan verilən zəhərli maddə qəbul etməsi nəticəsində dünyasını dəyişdiyini müəyyən edib.

Türkiyə Respublikası Antalya Prokurorluğu mərhum Emin Hüseynovun məzarının açılması və meyitin ekshumasiya olunması ilə bağlı vəsatət qaldırıb. Azərbaycan Respublikası Baş Prokurorluğuna göndərilən vəsatətdə qeyd edilir ki, Emin Hüseynovun ölümünün səbəbinin yalnız meyitin nümunələri üzərində ekspertiza keçirilərək müəyyən etməyin mümkün olduğunu nəzərə alaraq ekskumasiyanın keçirilməsi zəruridir. Vəsatətdə Emin Hüseyovun zəhərlənmə əlamətlərinin olub-olmamasını müəyyən etmək üçün meyitdən götürülən yumşaq toxuma və saç nümunələrinin toksikoloji müayinəsini keçirərək rəyin alınmasını və Türkiyə tərəfinə göndərilməsini xahiş edilib.

Elçin Məmmədin sözlərinə görə, Azərbaycanın Baş Prokurorluğu Türkiyə tərəfinin hüquqi iddiasını nəzərə almaqdan yayınıb. Belə ki, məzarın açılması və meyitin ekshumasiyası prosesində Türkiyədən olan mütəxəssislərin iştirakına icazə verməyib. Bu isə Emin Hüseynovun öldürülməsi ilə bağlı cinayət işinin qanunauyğun aparılacağına şübhə yaradır. Halbuki, sözügedən məsələ ilə əlaqədar sentyabrın 12-də Baş prokurorun birinci müavini Rüstəm Usubov Emin Hüseynovun atası Bəybala Hüseynovu və zərərçəkmiş tərəfin hüquqi nümayəndəsi Elçin Məmmədi qəbul edib. Görüşdə B.Hüseynov ekshumasiya işlərinin Azərbaycan tərəfi ilə yanaşı, xaricdən dəvət edilmiş məhkəmə tibbi ekspertiza qrupu ilə birgə keçirilməsini vacib şərt kimi təklif edib.



Lakin Baş Prokurorluğun Beynəlxalq Əlaqələr İdarəsinin rəisi Erkin Əlixanovun Bəybala Hüseynova göndərdiyi sonuncu məktubda qeyd edilir ki, Azərbaycan Respublikasının səlahiyyətli orqanları Türkiyə Respublikasından daxil olmuş vəsatəti sorğunun həcmi çərçivəsində icra edir. “Ekshumasiya haqqında vəsatətdə isə digər ölkədən ekspertlərin iştirakı ilə ekspertizanın keçirilməsi qeyd olunmamış, Azərbaycan Respublikasının səlahiyyətli tibb orqanı tərəfindən keçirilməsi xahiş olunub. Həmçinin, Azərbaycan Respublikası CPM-nin 237-ci maddəsinə əsasən, meyitin qəbirdən çıxarılması zamanı digər ölkədən ekspertlərin iştirakı nəzərdə tutulmamışdır.” – deyə Baş Prokurorluğun rəsmisi Erkin Əlixanov məktubunda belə göstərir.

Hüquq müdafiəçisi Elçin Məmməd hesab edir ki, məhz elə Azərbaycanın Baş prokurorluğu bu məsələdə maraqlı olmalı və ölüm faktının ədalətli araşdırılmasına şərait yaratmalıdır. Ancaq Erkin Əlixanovun meyitin qəbirdən çıxarılması zamanı xaricdən mütəxəssislərin dəvət olunması məsələsinə bu cür yanaşması fikri əsas hədəfdən yayındırmaq məqsədi daşıyır:

“Xatırladım ki, qanunvericilikdə nəzərdə tutulmayan hallar onun qadağan olunması anlamına gəlmir. Elə prokurorluq rəsmisinin də söykəndiyi cinayət-prosessual məcəlləsinin 96.1 və 97.1-ci maddələrində qeyd edilir ki, mütəxəssis və ekspert cinayət prosesi iştirakçılarının təklif etdikləri şəxslər sırasından təyin edilə və ya müdafiə tərəfindən dəvət oluna bilər. Həmçinin, demək yerinə düşərdi ki, həmin məcəllənin 2.3 və 3.3-cü maddələrinə görə Azərbaycan Respublikasının tərəfdar çıxdığı beynəlxalq müqavilələrdə cinayət-prosessual qanunvericiliyindən fərqli digər qaydalar müəyyən olunduqda, beynəlxalq müqavilənin qaydaları tətbiq edilir və ölkəmizin tərəfdar çıxdığı beynəlxalq müqavilələrlə Azərbaycan Respublikası cinayət-prosessual qanunvericiliyinin məkana görə qüvvəsinin digər qaydalarının tətbiqi halları müəyyən edilə bilər.”



Elçin Məmməd onu da bildirdi ki, ölkə Konstitusiyasının 148 və 151-ci maddələrinə əsasən Azərbaycanın tərəfdar çıxdığı beynəlxalq müqavilələr Azərbaycan Respublikasının qanunvericilik sisteminin ayrılmaz tərkib hissəsidir və Azərbaycanın qanunvericilik sisteminə daxil olan normativ hüquqi aktlar ilə ölkəmizin tərəfdar çıxdığı dövlətlərarası müqavilələr arasında ziddiyyət yaranarsa, həmin beynəlxalq müqavilələr tətbiq edilir. Hüquq müdafiəçisi həmçinin qeyd edib ki, Avropa İnsan Haqları Konvensiyasının 13-cü maddəsinə görə səmərəli hüquqi müdafiə vasitələri hüququ Avropa İnsan Hüquqları Konvensiyasınnda təsbit olunmuş hüquq və azadlıqları pozulan hər kəs, hətta bu pozulma rəsmi fəaliyyət göstərən şəxslər tərəfindən törədildikdə belə, dövlət orqanları qarşısında səmərəli hüquqi müdafiə vasitələrinə malikdir. Ona görə də Baş prokurorluq özü mərhum əməkdaşının öldürülməsi faktınının ədalətli araşdırılması, şübhələrə yer qoymamaq üçün ekshumasiya məsələsində xaricdən mütəxəssislərin dəvət edilməsində maraqlı olmalıdır.

GundemXeber.Az