Hər kəsə bəllidir ki, Azərbaycan Respublikası ikinci dəfə dövlət müstəqilliyini əldə etdikdən sonra, vətəndaşların Konstitusiya ilə qorunan hüquq və azadlıqlarının təmin olunması əsas prioritet məsələlərdən biri oldu.

Düzdür, illər keçdikcə hər bir Azərbaycan Respublikası vətəndaşının hüquq və azadlıqlarının müdafiə olunması yöndə aidiyyatı dövlət qurumları tərəfindən müəyyən addımlar atıldı, saysız-hesabsız qanun və qərarlar qəbul olundu. Amma onu da unutmaq olmaz ki, qəbul olunmuş qanun və qərarların bir çoxu kağız üzərində qaldı və buna da əsas səbəb, bəzi vəzifə sahiblərinin daşıdıqları vəzifələrindən sui-istifadə etmələri, məmur özbaşınalığı, qəbul olunmuş qanunların tapdaqlar altına atılması və s. kimi halların varlığı oldu. Belə bir səbəblər üzündən də, indiyə kimi neçə-neçə vətəndaşın Konstitusiya ilə qorunan hüquq və azadlıqlarının pozulması halları baş verməkdədir ki, onlardan biri də, Məmmədova Fairə Hüseyn qızıdır.

Belə ki, bu günlərdə redaksiyamza Bakı şəhəri, Xətai rayonu, general Şıxlıniski küçəsi-2942v, mən-138 ünvanda yaşayan Məmmədova Fairə Hüseyn qızı tərəfindən şikayət ərizəsi daxil olub və adı çəkilən xanım yazmış olduğu ərizəsində qeyd edir: “Mən 2009-cu ildə Bakı şəhəri, Yasamal rayonu, Yeni Yasamal massivi, Xiyabani küçəsi-18 ünvanda “Nur-Ay” MMC-i tərəfindən inşa olunmuş 16 mərtəbəli binadan ümumi sahəsi 138kvm olan mənzil aldım. Buna görə adı çəkilən cəmiyyətin səlahiyyətlisi Şəhriyar adlı şəxsə ilk əvvəl 11 min dollar pul ödədim. Üç ildən sonra mənə bəlli oldu ki, aldığım mənzil bir neçə nəfər şəxsə satılıb. Onu da bildirim ki, belə bir xoşagəlməz olayla tək mən yox, neçə-neçə şəxslər üz-üzə qaldığından, biz problemin həllinə köməklik göstərilməsi məqsədilə bir neçə dəfə PA-nın önündə qısa müddətli etiraz piketi keçirdik. Hətta, PA-nın rəsmi şəxslərinə baş verənlərlə bağlı şikayət məktublarımızı da təqdim etdik. O halın varlığını da qeyd edim ki, həmin illərdə “Nur-Ay” MMC-də sənədləşmə işlərinin çoxunu Məhəbbət Hüseynov adlı şəxs aparırdı və o, günlərin birində mənə “Sənin təqdim etdiyin sənədlərin əsası yoxdur” dedi. Halbuki mən həmin şəxsə lazım olan hər bir sənədin əsasını təqdim etmişdim”.
Düşündürücü hal odur ki, Fairə xanımın üz-üzə qaldığı problemlə bağlı Bakı Ağır Cinayətlər Məhkəməsi tərəfindən məhkəmə qətnaməsinin çıxarılmasına və həmin qətnamənin icra olunması Yasamal Rayon İcra və Probasiya şöbəsinə göndərilməsinə baxmayaraq, bu gün də hansısa səbəblər üzündən adı çəkilən qurumun əməkdaşları məhkəmə qətnaməsini icra etmirlər. Belə bir halın varlığı da, ortaya çoxsaylı sualların çıxmasına səbəb olmaqdadır. Çünki, qətnamənin icra olunması üçün ortada Bakı Ağır Cinayətlər Məhkəməsinin çıxarmış olduğu qərar var və sadəcə olaraq onu qanunun tələbləri əsasında icra etmək lazımdır. İndiyə kimi Yasamal Rayon İcra və Probasiya şöbəsinin əməkdaşları tərəfindən belə bir addım atılmadığından, bu gün də Fairə Məmmədova olmazın olaylarlarla üz-üzə qalmaqdadır. Ona görə də o, məcburiyyət qarşısında qaldığından, məhz belə bir problemin KİV-də ictimailəşdirilməsinə qərar verib.
Fairə Məmmədova yazmış olduğu ərizəsində onu da qeyd edir ki, “Mən qeyd olunan ünvandan mənzil almaq üçün üstüstə “Nur-Ay” MMC-nə 18 min dollar pul ödəsəm də, nədənsə Bakı Ağır Cinayətlər Məhkəməsi (İş № 2(004)-5336/2013) adı çəkilən MMC-dən 13650 manat məbləğində pulun alınıb mənə qaytarılması barədə qətnamə çıxarır. Bəli, həmin vaxtlarda belə bir problemlə, yəni mənə vurulmuş maddi və mənəvi ziyanın ödənilməsi tələbi ilə bağlı məhkəməyə müraciət etmişdim. Həmin vaxtdan indiyə kimi altı ildən çox vaxt keçsə də, hələ də çıxarılmış məhkəmə qətnaməsini Yasamal Rayon İcra və Probasiya şöbəsinin əməkdaşları yerinə yetirməyiblər. Belə bir halın varlığı da, ortaya çoxsaylı sualların çıxmasına səbəb olur”. Qarşı tərəfin də mövqeyini dinləyə bilərik.

Gundemxeber.Az