Möhtərəm Prezident!

​Yazıb Sizə onu bildirmək istəyirik ki, bu günlərdə redaksiyamza “Gündəm Xəbər” qəzetinin Gəncəbasar bölgəsi üzrə müxbiri Mehriban Əzizqızı və bölgədə fəaliyyət göstərən bir qrup media nümayəndələri tərəfindən açıq müraciət daxil olub. Müraciət müəllifləri yazırlar ki, “2011-ci ildə media mənsublarının iştirakı ilə Gəncə şəhərində inşa olunacaq “Mətbuat Evi”nin təməlqoyma mərasimi keçirildi. Bir il ərzində inşa olunması nəzərdə tutulan dördmərtəbəli binanın ümumi sahəsi 2600 kvadratmetr olur və həmin binanın birinci mərtəbəsində konfrans keçirmək üçün zal, ikinci və üçüncü mərtəbələrində jurnalistlərin fəaliyyət göstərmələri üçün otaqlar, dördüncü mərtəbəsində isə, Gəncəyə ezam olunan media nümayəndələrinin gecələmələri üçün xüsusi otaqlar yaradılır.

​ ​Dövlət büdcəsindən ayrılan vəsaitlər hesabına ərsəyə gətirilən “Mətbuat Evi”nin açılışı həyata keçirildikdən sonra, tam əksəriyyət o haqda düşündü ki, atılan belə bir addım milli mətbuatımızın inkişafına xidmət edəcək. Amma çox keçmədi ki, bütün gözləntilər puça çıxdı. Buna da əsas səbəb, büdcədən ayrılan vəsaitlər hesabına inşaası həyata keçirilən “Mətbuat Evi” Əli Həsənov tərəfindən ələ keçirildi. Yəni, uzun illərdir ki, həmin binadan mətbuatın inkişaf etdirilməsi məqsədilə deyil, məhz Həsənovlar ailəsinin biznes mərkəzinə çevrilmiş “Kaspi-Tədris Mərkəzi”nin fəaliyyət göstərməsi üçün istifadə olunur. Belə bir halın varlığı da, heç cür yolverilməz haldır. Ona görə də ölkə rəhbərimiz cənab İlham Əliyevdən xahiş edərik ki, Gəncədəki “Mətbuat Evi”nin KİV nümayəndələrinin istifadəsinə qaytarılması üçün, aidiyyatı üzrə lazımi tapşırığını versin. Çünki, cənab Prezident hər zaman jurnalistlərin dostu olduğunu bəyan etmiş və media sahəsində əmələ gələn problemlərin həllinə də çalışıb”.

Gundemxeber.Az