Şəmkir idman nailiyyətləri ilə seçilən rayonlarımızdandır. Bu rayonun yetirmələri olan idmançılarımız beynəlxalq turnurlərdə dəfələrlə Azərbaycanın bayrağını ən yüksək zirvələrə qaldırıblar. Rayonun Gənclər və İdman İdarəsinin nəzdində fəaliyyət göstərən Uşaq Gənclər İdman Məktəbinin yetirmələrinin qazandığı nailiyyətlərin ümumi siyahısı da şəmkirlilərin idmana bəslədikləri məhəbbətdən xəbər verir.

2011-ci ildən 2017-cı ilə qədər Şəmkir güləşçiləri rayona respublika və beynəlxalq yarışlardan 35 medal gətiriblər. Onlardan 21-i sərbəst, 14-ü isə yunan-Roma güləşçilərinin payına düşüb. 2011-ci ildən 2017-ci ilə qədər şəmkirli boksçular respublika əhəmiyyətli və beynəlxalq turnirlərdə 6 dəfə fərqləniblər. Əliyev Coşqun Ceyhun oğlunun 2011-ci ildə İrlandiyada keçirilən Avropa Birinciliyində III yeri tutması təkcə şəmkirliləri deyil, bütün Azərbaycanı sevindirib. Şəmkirli uşaq taekvondoçularının Gürcüstanda keçirilən beynəlxalq yarışlardan hər il xeyli sayda medalla rayona qayıdırlar.

Bir zamanlar Şəmkir futbolçuları da Azərbaycanın ən öncül idmançılarından olub. Çempionlar Liqasında təsnifat mərhələsini adlayan ilk klub olan "Şəmkir” FK 2 dəfə Azərbaycan çempionu adını qazanıb. 2001/2002-ci il mövsümündə klubun 3-cü dəfə çempionluğa yüksəlmək şansı vardı. Di gəl ki, mövsümü yarımçıq dayandırmağa məcbur olan klub bu şansı əlindən qaçırır. Klubun fəaliyyətini dayandırması isə qeyri-adi səbəblə izah edilir. Dövri mətbuat bu tənəzzülün səbəbini maliyyə çatışmazlığı və klub stadionunun onların əlindən alması ilə əsaslandırırdı:

[center]

“Sakinlər deyir ki, stadionun 2000-ci illərdən bağlı qalıb. 15 il müddətində stadionun bağlı qalması da A.Aslanovun orada futbol və digər oyunların keçirilməsinə icazə verməməsi olub... Şəmkirdə danışırlar ki, komandanın stadiondan qovulması klubun prezidenti, "Saşa" kimi tanınan Şahbaz Süleymanovla Aslan Aslanovun münasibətlərinin korlanmasından sonraya təsadüf edib.

"Şəmkir" komandası növbəti qələbədən sonra yarım milyon mükafat qazanıb. Həmin vaxt A.Aslanov Ş.Süleymanovu yanına dəvət edib və ondan mükafatın 80 faizinin ona verilməsini istəyib. Bu zəmində yaranan mübahisə A.Aslanovun komandanı stadiondan qovdurması ilə nəticələnib”. (musavat.com)



Gözləmək olardı ki, Şəmkirin yeni rəhbəri Alimpaşa Məmmədov klubla sabiq başçı arasında yaranan və komandanın tənəzzülünə səbəb olan bu insidenti həll edəcək, stadionu əsl sahibinə qaytaracaq. Alimpaşa Məmmədovun çözümü isə fərqli olur: “Şəmkirdə yayılan söhbətlərə görə, bir müddət əvvəl (2015-ci ildə - H.O.) A.Aslanovu rayona dəvət edib stadionu dövlətə satmasını təklif ediblər. Sabiq nazir müavini ona təklif olunan məbləğlə razılaşmayıb. Sakinlər A.Aslanova 3 milyon manat təklif edildiyini, o isə daha artıq istədiyini deyiblər. A.Aslanovun tələb etdiyi məbləğ veriləndən 3-5 dəfə çox olub – 10-15 milyon manat. Bununla da A.Aslanovla sövdələşmə bitib” (Eyni qaynaq). Və bir zamanlar Azərbaycanın ən uğurlu futbol komandasını, müxtəlif idman növlərində çempionlarını yetişdirən stadionun sökülməsinə qərar verilib.

2015-ci ildə stadion söküləndə Şəkmir camaatı bu yerdə park salınacağına, mədəniyyət mərkəzinin tikiləcəyinə ümid edirdi. Stadionun xarabalıqları isə indiyədək şəmkirlilərə göz dağı verir.



Uzun illər rayonun ictimai həyatında mühüm rol oynayan, Şəmkir İcra Hakimiyyətində və Bələdiyyəsində rəhbər vəzifələrdə çalışan, aqrar elmlər üzrə fəlsəfə doktoru İbrahim İbrahimovun stadionun sökülməsi barədə başqa iddiaları da var. Onun sözlərinə görə, stadionun sökülməsinin əsl səbəbi regionların sosial-iqtisadi inkişafı çərçivəsində Şəmkirə ayrılan vəsaitin mənimsənilməsi və inşa olunan yeni iş yerlərini tikinti materialları ilə təmin edilməsi imiş. Başqa sözlə desək, stadionun sökülməsinə qərar verən Alimpaşa Məmmədov onun daşını-dəmirini başqa obyektlərin tikintisində istifadə edilməsi üçün iş adamlarına satıb. Sənədlərdə isə stadionun söküntüsü real qiymətindən xeyli baha qiymətə alımış yeni materiallar kimi göstərilib. Gəlin, çox şərhə girişmədən, müsahibimizin fikirlərini öz dilindən eşidək:

İbrahim müəllimin fikirlərindən də aydın olur ki, Şəmkirin mərkəzindəki stadionun sökülməsi rayonda idmanın inkişafına ciddi zərər vurub. Baxmayaraq ki, rayonda yeni tikilmiş İdman Olimpiya Kompleksi var, fəqət bu kompleks şəhərdən kənarda yerləşdiyindən uşaq və yeniyetmələr həmin idman mərkəzinə getməkdə çətinlik çəkirlər. Üstəlik, İdman Olimpiya Kompleksləri Azərbaycanın digər rayonları kimi Şəmkirdə də zəngin insanların əyləncə mərkəzinə çevrilib. Halbuki, rayon mərkəzində fəaliyyət göstərən stadion həm uşaqların daha rahat gedib-gəlməsi, həm də kasıb balalarının üzünə açıq olması baxımından gələcəyin idmançılarının yetişdirilməsinə daha yaxşı xidmət edə bilərdi. Şəmkirin bu idman perspektivi isə indi bayquş oylağına çevrilib. Lap Nizami Gəncəvinin məşhur rəvayətində deyildiyi kimi, belə görünür ki, Şəmkirə nə qədər Alimpaşa müəllim rəhbərlik edir, bayquşların öz ovladları üçün başlıq pulu verməsində heç bir problem yaşanmayacaqlar.



Şəmkiri gəzərkən Alimpaşa Məmmədovun bayquşlara hədiyyə etdiyi başqa məkanlarla da tanış olmaq fürsəti tapdıq. Bunlardan biri də rayonun mərkəzində tikilən çörək və şirniyyat zavodudur. İndi tikintisindən belə əsər-əlamət qalmayan bu müəssisə Şəmkirin “Azərişıq” ASC-nin yanında yerləşirmiş. Onun yox edilməsində rayonun çörək monopoliyasını ələ keçirmək məqsədi dayandığı bildirilir. Məlumata görə, Şəmkirdə “Nəfis” adlı çörək zavodu açan sabiq Vergilər naziri Fazil Məmmədov digər rəqiblərini tamamilə sıradan çıxarmaq eşqinə düşüb. Rayona başçı təyin etdirdiyi Alimpaşa Məmmədovun əliylə bəzi çörək zavodları zorla sökülüb, bəziləri isə rəqabətə dayanmayaraq bağlanıb. Beləcə, rayonda dövlət idarələrindən tutmuş yerli sakinlərə qədər hər kəsin çörək ehtiyacı bir müəssisə ilə ödənilib – “Nəfis” çörək zavodu ilə.



Hazırda “Nəfis”-in Fazil Məmmədovun sahibkarlığında qalıb-qalmadığı isə bilinmir. Rayon sakinlərinin bildirdiyinə görə, sabiq Vergilər naziri işdən qovulan kimi ilk zərbəni Alimpaşa müəllimdən alıb. A.Məmmədovun vaxtilə onu ucaldan, əvvəl Bakı şəhər Vergilər Departamentinin rəisi vəzifəsinə gətirən, sonra isə Şəmkirin icra başçısı qoyduran Fazil Məmmədovdan üz döndərməsi uzun sürməyib. Hətta işdən çıxarıldığı gün Fazil Məmmədovun rayondakı villasının qazı kəsilib. Görünür, sabiq nazirin qanında şəkərin kəllə çarxa çıxmasında da üzləşdiyi bu xəyanətlərin mühüm rolu var. Baxmayaraq, Fazil Məmmədov da öz himayədarına bənzər əməllərilə ad çıxarmışdı və onu da eyni aqibətin gözlədiyi İlahi Ədalətin təcəllisi idi.



Alimpaşanın normadan iri boruyla nəql olunan qazı belə keçmiş himayədarına çox görməsi səbəbindən, rayon sakinləri “Nəfis” çörək zavodunun Fazil Məmmədovda qalması ehtimalına inanmırlar. Yekdil qənaətə görə, həmin müəssisə Alimpaşa Məmmədov tərəfindən ələ keçirilib. İddianın nə dərəcədə səhih olub-olmadığını araşdırmağı dövlət yetkililərinə buraxaraq, biz “Nəfis”-in nəfsinin ilk qurbanı olan xarabalıqdan reportajımızı təqdim edirik:

Sözsüz ki, yerlə yeksan olunan bu müəssisələr bayquşlara hədiyyə edilmək üçün uçurulmayıb. İddialara görə, rayonda özünə aid olmayan bütün müəssisələri sökən Alimpaşa Məmmədov onların torpaq sahəsini başqalarına satmaqla məşğuldur. Bu ərazilərdən bəziləri artıq satılıb da. Aşağıda şəkilini təqdim etdiyimiz bu yerdə vaxtilə 2-mərtəbəli 2 buna yerləşirdi. Səməd Vurğun küçəsi 115 ünvanında yerləşən 20 sotluq ərazi rayonda dondurma alveri ilə məşğul olan Rüstəmov Vahid Allahyar oğlu adlı iş adamına satılıb. Deyilənə görə, 230 min manata xırıd edilən bu yerdə şadlıq sarayı və super market tikiləcək. Həmin məbləğin 150 min manatı torpaq puluna, 80 mini isə sənədləşməyə gedib.

Rayon sakinlərinin bildirdiyinə görə, vaxtilə konyak zavodunun yaşayış binaları da sökülüb hərraca çıxarılıb. Ən maraqlı hadisə isə rayonun bir zamanlar simvoluna çevrilən Şəmkir Rayon Sovetinin məşhur binasının başına gələnlərdir. Rayonun mərkəzində yerləşən bu binada vaxtilə 30-a yaxın hökümət və ictimai təşkilat yerləşirmiş. Həmin dövlət təşkilatları rayonun müxtəlif yerlərindəki licimindən cin ürkən bitli otaqlara köçürülərək bina sökülüb və Rusiyada işləyən bir iş adamına xeyli baha qiymətə - 1.2 milyon manata satılıb. İş adamının həmin ərazidə çox mərtəbəli bina tikmək sevdası isə baş tutmamışdır. Səbəb tikilməsi nəzərdə tutulan binanın yuxarı mərtəbələrindən Şəmkirdəki hərbi obyektlərdən birinin görünməsi ehtimalı imiş.

Qısası, Alimpaşa Məmmədovun yağlı təkliflərinə inanan iş adamı indi ondan pulunu tələb etsə də, ala bilmir. Rayon Sovetinin binası söhbəti xeyli uzun olduğundan bu barədə araşdırmalarımızı gələcək yazılarımıza saxlayırıq.



Hələlik isə milyonlarla oynayan icra başçısının və onun əlaltısı olan Şəmkir şəhər bələdiyyə sədri Vüqar Həsənovun iki uşaq atası Royal Əliyevin başına uçurduğu daxmadan danışmaq istəyirik. Şəhərə yaxın örüşlərdən birində tikilən bu dar daxmanın uçurulma səbəbi çox sadədir. Artıq daşları qalan ev sahibinin iddiasına görə, bələdiyyəyə rüşvət vermədiyi üçün bu acı tale ilə üzləşib. Qışın bu oğlan çağında iki azyaşlı uşağı ilə çöldə qalan Royalın körpə balasının qorxusundan qaçıb gizləndiyi çarpayının altından çıxarılaraq rayon polis idarəsinə aparılması isə əsl bədii film mövzusudur. Biz hələ 1 yaşlı digər körpənin də cinayətkar kimi polisə aparılmasından danışmırıq. Şəmkirli bir ailənin başına gətirilən müsibətləri, gəlin, ailə başçısının dilindən eşidək:

Şəmkirdə dağılan tifaqları seyr etdikcə, Yaponiyada cudo üzrə dünya çempionluğuna sponsorluq edən Azərbaycan dövlətinin (SOCAR – Azərbaycan Respublikasının Dövlət Neft Şirkəti) öz vətəndaşına bu cür düşmən münasibəti heyrət doğurmaya bilmir. Nə yazıq ki, bu heyrətamiz qənaətin formalaşmasında özlərini xan kimi aparan yerli rəhbərlərin müstəsna rolu var və bütün bu özbaşınalıqlar Prezident İlham Əliyevin məmurları vətəndaşlarla insan kimi davranmağa çağırmasına rəğmən törədilir.



Gundemxeber.Az