Bərdə Dövlət İdarəetmə və Texnologiya Kollecinin direktoru Xaləddin Ələkbərovun qızına elədiyi bahalı toy, oliqarxlara xas təşkil etdiyi məclis, tanınmış müğənnilərə fantastik məbləğ ödəyərək onların övladının şənliyinə çağırması sosial şəbəkələrdə hələ də müzakirə edilir.

Xüsusən də facebook-dak bərdəlilər, Bərdəyə aid səhifələr kollec direktorunun oliqarx-nazir kimi bir dəbdəbəli toy keçirməsindən yazırlar.

Bərdə Dövlət İdarəetmə və Texnologiya Kolleci nə supermarketdir, nə də bazardır, o halda direktor da aldığı maaşla qızına hamı kimi, yəni “yorğanını ayağına görə uzadıb” adi bir toy məclisi təşkil edə bilərdi.

Üstəlik, prezident də məmurlara, vəzifəlilərə bahalı toy, ad günü məclisləri təşkil etməməyi tövsiyə eləmişdi. Amma belə çıxır ki, X.Ələkbərov aldığı maaşla dolanmır, direktorun əlavə qazanc yerləri var, ona görə qızına bahalı bir toy edib.

Toyda baha qiymətə oxuyan Nüşabə Ələsgərli, Gülyaz və Gülyanaq Məmmədova bacıları, xanəndə Ehtiram və başqa məşhurlar iştirak ediblər.

Bir kollec direktorunun nə qədər pulu var ki, onlara ödəniş etməyə imkanı çatıb? Məntiqlə toy Bərdədə ortabab şadlıq saraylarının birində keçirilməli, yerli sənətçilərdən biri məclisi idarə etməliydi.

Amma X.Ələkbərov Bərdəni bəyənməyib, öz rayonunda toy etməyib, Bakıda bahalı şadlıq saraylarından birini bağladıb.

Belə xəbərlər yayılır ki, kollec direktorunun semestrlərdə qazandığı pullardan özünə qurduğu biznes işinə yarayıb.

Onun obyektləri olduğu iddia edilir. Lakin bu söhbətlər səngimək bilmir, sosial mediada müzakirə edilir, saytlarda dolaşır. Nədənsə, X.Ələkbərov iddialara münasibət bildirmir.

Onun kollec tələbələrini aylığa buraxması, semestr imtahanlarını rüşvətlə yazması, qarşıdan gələn yanvar imtahanlarının yığımına indidən başlaması ittihamları var.

Xaləddin müəllim tələbələrdən hər semestrin sonunda imtahan və məqbulları "həll etmək” üçün rüşvət yığdırdığı deyilir. Pul verməyən tələbələri qəsdən sıxışdırır.

Bundan əlavə, direktor bəzi tələbələrlə sövlələşərək, onları dərslərdən və imtahanlardan azad edir. Odur ki, Bərdənin sözügedən kollecində açıq bazar iqtisadiyyatı hökm sürür.

Təhsil ocağından adına uyğun olaraq, X.Ələkbərov pul yığma kampaniyasının idarəetməsini və texnologiyasını gözəl bilir. Deyilənə görə, kollecdə yanvar yığımı başlayıb və semestr imtahanları ilə bağlı şıdırğı alver gedir.

Mətbuatda yazılanlara görə, tələbələr dərslərə gəlmir və nələrinsə müqabilində qayıb məsələlərini həll edirlər. Onsuz da imtahan zamanı həll edəcəyik” prinsipi ilə tələbələrə dərslər də keçirilmir.

Müəllim və tələbələrin əksəriyyətinin adı jurnalda yazılsa da, özləri aylarla dərslərə gəlmirlər. Deyilənlərə görə, hətta bəzi tələbələrin təqaüd kartı da Xaləddin Ələkbərovdadır. Əgər belə fakt varsa, onu Ağstafanın həbs edilən icra başçısının aqibəti gözləməsi istisna hal deyil.

Təhsil ocağında hansı ixtisasların tədris edildiyinə nəzər saldıqda görərik ki, kollecdə kifayət qədər ixtisaslar var. Lakin həmin dərslərin əksəriyyətinin boş keçdiyi söylənir.

Kollecdə təhsilin aşağı səviyyədə olmasına rəğmən, əksər vaxtlarda müəllim kollektivinin maaşından nələrsə bəhanə gətirilərək çıxılır ki, bu da müəllimlərin etirazı ilə nəticələnir.

Lakin çox da, etiraz edə bilməyən müəllimlər məcbur olub susmalı olur. Çünki direktor Xaləddin müəllim əvvəlcədən bildirib ki, kimə xoş deyilsə, ərizəsini yazıb gedə bilər.//xalqXeber.az