Deputatlığa namizəd, Hövsandakı kimi, Zığda da rüsvay oldu - ona nələr deyilmədi?!

YAP-ın 30 saylı Suraxanı birinci Seçki Dairəsindən deputatlığa namizədliyini təkrar irəli sürdüyü Sevinc Fətəliyeva növbəti dəfə seçici etirazları ilə qarşılaşıb və şok yaşayıb. YAP-ın Suraxanı rayon təşkilatının sədri Vüqar Seyidovun dəstəyi ilə, Zığ mədəniyyət klubunda sakinlərlə görüş keçirmək istəyən deputatlığa namizəd sakinlər tərəfindən baykot edilib. Demək olar ki, dərd-sərləri və problemləri həddən ziyadə çox olan yerli sakinlərdən heç kəs bu görüşə çıxmayıb. Konkret desək, vətəndaşlarla görüşə gələn Sevinc Fətəliyeva kənd sakinləri tərəfindən baykot edilib.



Lakin Vüqar Seyidovun göstərişi ilə tədbirdə iştirak etməyə məcbur olan 40 nəfərə yaxın məktəb və idarə işçiləri belə ona öz ürək sözlərini deməkdən çəkinməyiblər. Bir sözlə, namizəd onların qarşısında çıxış edərkən, onun sözünü kəsərək, sərt şəkildə etiraz ediblər. Rüsvay olan deputatlığa namizədə nələr deyilməyib?!
O, seçicilərin ona verdikləri: “İndiyədək bir dəfə də olsun, bura gəlib, əliqabarlı camaatın içinə girməmisən, dükan-mağazalara girib, camaatın dərd-sərini öyrənərək, şüara çevirməmisən. Yenidən hansı üzlə camaatın vəkili olmaq istəyirsən?!" -- sualını da cavabsız qoyub.



YAP funksioneri isə onu müdafiə etməyə cəhd edib. Lakin yaşadıqları rayondakı problemləri qabardan seçicilərin onun sərt və kobud reaksiyası ilə üzləşmələrinin, eləcə də onun müdafiə məqsədilə ağlına gələn təhdid xarakterli sözlər deməsinin belə bir faydası olmayıb.
Onu da qeyd edək ki, indiyədək bir dəfə də olsun seçicilərlə müntəzəm surətdə kollektiv və fərdi görüşlər keçirməyən, onların qayğı və problemləri ilə yaxından maraqlanıb, müvafiq icra hakimiyyəti orqanları ilə əməkdaşlıq şəraitində bu çatışmazlıqların həllinə nail olmaq yadına belə düşməyən deputat, eyni aqibəti bir neçə gün öncə Hövsanda da yaşayıb.



REDAKSİYADAN: Aldığımız son xəbərə görə, Sevinc Fətəliyeva srağagün də, Hövsanda açıq havada seçicilərlə görüşmək istəyib. Bu dəfə, o, daha sərt şəkildə seçici etirazları ilə qarşılaşıb.
Əlimizdə olan bu video-materiallar da, deyilənlərin təsdiqidir. Oxucularımız, ümumiyyətlə, bütün seçicilər üçün maraqlı olar deyə, həmin çəkilişləri oxuculara təqdim edirik:

GundemXeber.Az