Ötən ayın sonunda Yeni Azərbaycan Partiyasının Siyasi Şurası parlamentdə təmsil olunan üzvlərinə, məhz parlamentin buraxılması təşəbbüsü ilə çıxış etməyi tövsiyyə edən qərar qəbul etdi və bununla bağlı ictimaiyyətə də hakim siyasi partiyanın sədr müavini-icra katibi Əli Əhmədov tərəfindən geniş açıqlama verildi.

Partiya funksioneri isə verdiyi açıqlamasında​ ​ bildirdi ki, “YAP-ı təmsil edən millət vəkilləri parlamentə müraciət ünvanlamağa qərar veriblər və onların​ müraciətləri Milli Məclisə daxil olacaq. Hesab edirəm ki, rəhbərlik ünvanlanan müraciətin yaxın zamanlarda Milli Məclisdə müzakirəyə çıxarılmasına nail olacaq”.​ Bəli, belə bir müraciət parlamentdə müzakirəyə çıxarıldı. Daha sonra isə millət vəkillərinin tam əksəriyyəti ali qanunverici orqanın buraxılmasına səs verdilər. Beləliklə,​ beşinci çağırışda Milli Məclis tam tərkibdə buraxıldı və 2020-ci ilin 09 fevral tarixdə növbədənkənar parlament seçkilərinin keçirilməsi üçün vaxt da təyin olundu. Artıq parlament seçkilərinin hazırlanıb keçirilməsi ilə bağlı Mərkəzi Seçki Komissiyası tərəfindən bütün zəruri tədbirlər də görülüb. Yəni, növbədənkənar seçkilərin seçki üzrə hazırlanıb keçirilməsi əsas hərəkət və tədbirlərin “Təqvim planı” da qəbul olunub. “Təqvim planı”na uyğun olaraq seçkilərin keçirilməsinə dair tədbirlərin, yəni namizədlərin qeydiyyatı, təbliğat-təşviqat kampaniyasının aparılma müddəti, müşahidəçilərin qeydiyyatı prosesi yekunlaşıb və digər məsələlərə dair vaxt da müəyyən olunub. Büdcədən ayrılan vəsaitlər hesabına, məhz ölkəboyu belə bir prosesin keçirilməsinə ciddi hazırlıq işləri də görülüb. Hətta yuxarıda qeyd etdiyimiz məsələlərlə bağlı Azərbaycan Respublikasının prezidenti İlham Əliyev ölkə boyu fəaliyyət göstərən məmurlara ciddi tapşırıqlar verməsinə baxmayaraq icra və digər strukturlarda təmsil olunan məmurlar bu tapşırıqları eşitməməzlikdən gələrək özfəaliyyətləri ilə məşğul olmaqda davam edirlər.
Belə ki, Bakı şəhərinin əksər rayonlarından redaksiyamıza müəyyən məlumatlar daxil olmaqdadır. Əldə etdiyimiz məlumata görə, böyük şirkətlərdə və xüsusilə də qida sektorunda fəaliyyət göstərən iri şirkətlərdə, eləcə də məktəblərdə və eyni zamanda müəyyən büdcə təşkilatlarında çalışan işçilərin şəxsiyyət vəsiqələri yığılaraq, sabah ölkədə keçiriləcək parlamet seçkilərinə səs vermə üçün saxta imzaların bəribaşdan toplanmasına tədarük görülür.
Qeyd edək ki, 9 fevral 2020-ci il tarixinə təyin edilən növbədənkənar parlament seçkilərinin əvvəlki illərdə keçirilən seçkilərdən heç də fərqlənməyəcəyi bəllidir. Büdcə təşkilatlarında və şirkətlərdə çalışan vətəndaşlarımız tərəfindən redaksiyamıza daxil olan məlumatlar bunu deməyə əsas verir.
Ümumi daxil olan məlumatları araşdırakən, aydın oldu ki, Bakı rayonlarında vəziyyət heç də yaxşı deyil. İdarə və müəssisələrdə də vətəndaşların şəxsiyyət vəsiqələrini yığmaqla, insanların müstəqil səs vermə hüquqlarını məmurlar mənimsəməyə çalışırlar. Hesab edirik ki, fədakar seçicilər öz bülletenlərinə sahib çıxacaq və bu saxtakarlığın baş verməsində belə "əlverişli" şəraitə əl atanlara imkan verməyəcəklər.

GundemXeber.Az