Cümə gününə olan məlumatlara əsasən, dünyada koronavirusa yoluxduqları təsdiq olunmuş insanların sayı 542788 nəfərə çatıb, onlardan 124351 nəfəri sağalıb, 24361 nəfər isə ölüb.

Ayrı-ayrı ölkələrdə koronavirusla bağlı vəziyyət necədir və hansı tədbirlər həyata keçirilir?

ABŞ

ABŞ-da koronavirusa yoluxanların sayı dünyada hər hansı ölkədə olduğundan çoxdur - 85 500 insan Covid19 virusuna yoluxub.

Beləliklə, ABŞ koronavirusa yoluxanların sayına görə Çin (3291) və İtaliyanı (8215) keçib.

Prezident Donald Trump bundan öncə amerikalıların "tez bir zamanda" işə qayıdacağını bildirmişdi.

İtaliya

Hazırda ən çox ölüm sayı (8215) İtaliyadadır.

Burada COVID-19 koronavirusuna yoluxan insanların sayı 80589 nəfər təşkil edib.

İspaniya

İspaniyada ölənlərin sayı bir gündə 769-a çatıb. Ölkə boyunca ölənlərin ümumi sayı 4858-i keçib.

Bundan öncə isə ölənlərin sayı 655 idi. Ölkədə koronavirusa yoluxanların sayı ümumilikdə 64059-dur.

İspaniya aşkar edilmiş koronavirus hallarının sayına görə dünyada dördüncü yerdədir.

Almaniya

Dünya üzrə ən çox yoluxanların sayına görə Almaniya beşinci ölkədir. Almaniyada koronavirusa yoluxanların sayı 47278 nəfər, ölənlərin sayı isə 281 nəfər təşkil edib.

Almaniya hökuməti ölkədə iki nəfərdən artıq qruplara toplaşmağı qadağan edib.

Almaniya kansleri Angela Merkel bazar günündən karantin rejiminə keçməli olub, çünki məlum olub ki, cümə günü ona profilaktik peyvənd vuran həkim də koronavirusa yoluxub.

Rusiya

Rusiyada koronavirusa yoluxmuş insanların sayı 1036-a çatıb, virus səbəbindən 3 nəfər ölüb.

Moskva Times qəzetinin yazdığına görə, zəngin ruslar koronavirusdan xilas olmaq üçün süni nəfəs aparatları almağa çalışırlar.Nəşrin həmsöhbətlərindən birinin bildirdiyinə görə, 1,8 milyon rubl (təxminən 38 min manat) qiyməti olan bu aparatlar üçün yaranmış növbədə gözləmə vaxtı səkkiz ay çəkə bilər.

Bu cür aparatlar əsasən Çin, İtaliya və Almaniyada istehsal olunur.

Britaniya

Britaniyada koronavirusa yoluxanların sayı 11 mini keçib, ölənlərin sayı isə 578 nəfərdir.

Burada bazar ertəsi günündən başlayaraq əhalidən üç həftə evdə qalmaq istənilib.

Onlar yalnız "tamamilə zəruri" işə gedib-gələ, nadir hallarda "əsas ehtiyaclar" üçün bazarlıq edə və tibbi səbəb olduğu zaman küçəyə çıxa bilərlər.

Ölkədə iki nəfərdən artıq və ailə üzvü olmayan şəxslərin toplaşması qadağandır.

Türkiyə

Türkiyədə koronavirusa yoluxanların sayı 3629 olub, ölənlərin sayı isə 75 nəfər təşkil edib.

Ermənistan

Ermənistanda 39 yeni koronavirusa yoluxma halı qeyd olunub. Ermənistan Səhiyyə Nazirliyi Xəstəliklərə Nəzarət və Profilaktika Milli Mərkəzinin məlumatına əsasən, beləliklə Ermənistanda kronavirusa yoluxma hallarının təsdiqlənmiş ümumi sayı 329-a çatıb. Ötən gün bir nəfər ölüb.

Koronavirusun yayılmasının qarşısını almaq məqsədilə martın 16-dan aprelin 14-dək tətbiq edilən fövqəladə vəziyyət rejimi bir həftə müddətinə daha da sərtləşdirilib.

Martın 25-nə keçən gecədən Ermənistan ərazisində vətəndaşların azad hərəkət etmə hüquqları məhdudlaşdırılıb, fövqəladə vəziyyət qaydalarının pozulması üçün inzibati və cinayət cəza tədbirləri nəzərdə tutulub.