İcra özbaşınalığından təngə gələn şikayətçi yenidən ədliyyə naziri cənab Fikrət məmmədova şikayət edib.

Şikayətçi "Demokratik.Az"-a müraciət edərək probleminin ictimailəşdirilməsini, haqq səsinin yuxarı dövlət orqanlarına açıq məktubla da çatdırılmasını xahiş edib.
Şikayətçi son müraciətində aşağıdakıları yazır:

"Gəncə şəhər İcra idarəsinin icra məmuru İlkin Qədimov İcra idarəsinin rəis müavini Ələmdar İbrahimovun tapşırıqlarına və göstərişlərinə əsasən Gəncə şəhəri, Bakı küçəsi 70 saylı ünvana dair Gəncə şəhəri Nizami rayon Məhkəməsinin 17 oktyabr 2019-cu il tarixli qiyabi qətnamə və eyni məhkəmənin 12 fevral 2020-ci il tarixli qərardadını icra etmək istəmir və ya min bir bəhanələr gətirərək icra işini yerinə yetirməkdən boyun qaçırır.

İcra məmuru İlkin Qədimov qərəzli şəkildə bildirir ki, 12 fevral 2020-ci il tarixli qərardadı icra edə bilmərəm. DƏDRX-nin 3 saylı Gəncə Ərazi İdarəsindən mənə təzyiqlər göstərilir ki, “Gəncə şəhəri 70 saylı mülkə dair qəti həbs qərarını” yerinə yetirməyim.

Mübahisəli mülk üzərində həbs qərarının olmasına baxmayaraq, DƏDRX-nin 3 saylı Ərazi İdarəsinin öncəki rəislərinin edə bilmədiyi, özünün dediyi kimi “arxası möhkəm olan” məmur Abdulla Abdullayev “işin tamamlanmasını” öz üzərinə götürərək mübahisəli mülkün satılması üçün 5 saylı Notariat Kontora sənəd təqdim etmişdir.

DƏDRX-nin 3 saylı Gəncə Ərazi İdarəsinin korrupsioner rəisi Abdulla Abdullayev bilərəkdən qanunu qüvvəyə minmiş Məhkəmə qərarlarına nəinki tabe olmur, hətta öz vəzifəsindən sui-istifadə edərək, Gəncə şəhəri Bakı küçəsi 70 saylı mülklə bağlı Gəncə Nizami rayon Məhkəməsinin 12.02.2020-ci il tarixli qəti həbs qərarının olmasına,

Quliyeva Sayidə Tahir qızının Gəncə şəhəri Bakı küçəsi 70 saylı ünvanda qeydiyyatda olmasına, Gəncə şəhəri Bakı küçəsi 70 saylı mülkün Quliyeva Sayidə Tahir qızına məxsus olmasına baxmayaraq qanunsuz olaraq 09.07.2011-ci ildə Həsənova Qəribənin adına verilmiş çıxarışla mübahisəli mülk 27 iyul 2020-ci il tarixdə 5 saylı DNK-da bağlanılmış alqı-satqı müqaviləsinə əsasən Həsənova Qəribə Hümbət qızının Nağıyev İsrəfil Əli oğluna verilən etibarnaməsi ilə Məmmədova Sevda Hidayət qızına satılmışdır.

Dəfələrlə bildirmişəm Həsənova Qəribə Hümbət qızına verilmiş 09.07.2011-ci il tarixli (Reyestr nömrəsi:201013002666-10301) çıxarış Gəncə Apellyasiya Məhkəməsinin 22.01.2013-cü il tarixli, Gəncə İnzibati-İqtisadi Məhkəməsinin 11.09.2013-cü il tarixli, Gəncə Apellyasiya Məhkəməsinin İnzibati-İqtisadi Kollegiyasının 09.12.2013-cü il tarixli, Ali Məhkəmənin İnzibati-İqtisadi Kollegiyasının 12.03.2014-cü il tarixli qərardadlarına əsasən ləğv olunmuşdur.

02.08.2020-ci il tarixdə “icra məmuru tərəfindən uzun müddət tapıla bilinməyən Quliyeva Sayidə əlləri bağılı şəkildə iki nəfər polisin” müşayəti ilə Gəncə İcra Baş İdarəsinə gətirilərək ərizəsi alınmış, Qiyabi qətnamənin onun iştirakı olmadan baxıldığını əsas gətirərək qətnamənin ləğv olunmasını tələb edir. Əsas məqsəd mübahisəli mülk üzərinə qoyulmuş həbsin ləğv olunmasıdır.

Daha sonra Gəncə şəhəri üzrə İcra İdarəsinin icra məmuru İlkin Qədimov Gəncə Nizami rayon Məhkəməsinə Qiyabi qətnamənin ləğvi ilə bağlı Təqdimat vermiş, Məhkəmənin hakimi Kənan Hüseynov tərəfindən 17 oktyabr 2019-cu il tarixli qiyabi qətnamə ləğv edilmiş və yeni 02 oktyabr 2020-ci il tarixli “Əyani” qətnamə çıxarılmışdır.

Yeni çıxarılmış qətnamə əsasında icra məmuru İlkin Qədimov 24 noyabr 2020-ci il tarixdə Qərar qəbul edir və Quliyeva Sayidə Tahir qızının Gəncə şəhəri Bakı küçəsi 70 saylı ünvanda qeydiyyatda olmasına baxmayaraq, növbəti dəfə icra işini yerinə yetirmək əvəzinə icra məmuru İlkin Qədimov qanunsuz və əsassız şəkildə heç bir hüquqi və qanuni əsası olmadan icra sənədini ərazi aidiyyatı üzrə Bakı şəhəri Suraxanı rayonu İcra və Probasiya Şöbəsinə göndərir və bildirir ki, borclu Quliyeva Sayidə hazırda Bakı şəhəri Suraxanı rayonu Bülbülə qəsəbəsi, Bülbülə küçəsi 2 ünvanda yaşayır. Borclunun Bakıda daimi yaşamasına dair heç bir qurumdan hər hansı arayış və ya sənəd alınıb icra işinə əlavə edilməmiş, yalnız borclunun telefon zənginə əsaslanaraq, qanunsuz şəkildə icra işini başlarından etmək üçün bu cür qənaətə gəlinmişdir.

Borclu Quliyeva Sayidə Tahir qızının mənə ödəməli olduğu 29860 (iyirmi doqquz min səkkiz yüz altmış) manat pulun verilməsi üçün müxtəlif bəhanələr gətirərək qətnaməni icrasını yerinə yetirməkdə səhlənkarlıq edir.
Sizdən Qarabağ müharibəsi müharibəsi veteranının anası kimi xahiş edirəm, Gəncə şəhəri üzrə İcra idarəsinin icra məmuru İlkin Qədimov barəsində inzibati qaydada tədbir görülməsinə, Gəncə şəhəri üzrə İcra İdarəsində baş verən özbaşınalıqlara, qanunsuzluqlara son qoyulmasına, öz vəzifələrindən sui-istifadə edən məmurlar barəsində inzibati qaydada tədbir görülməsinə, haqq-ədalətin bərqərar olunmasına köməklik edəsiniz".

P.S - Müstəqil media orqanı olaraq şikayəti Azərbaycan Respublikasının Ədliyyə nazirliyinə ünvanlamaqla dövlət və dövlətçiliyimizin keşiyində dayanan, öz nazirlik missiyasını uzun illərdir şərəflə və vicdanla yerinə yetirən hörmətli nazirimiz cənab Fikrət Məmmədovdan xahiş edirik ki, yuxarıda qeyd olunanlara biganə qalmasın və özbaşınalıqla məşğul olan icra məmurlarının ciddi cəzalandırılmasını təmin etsin!
İnanırıq ki, şikayətçinin haqq savaşında ədalət gec də olsa nazirimizin diqqətilə zəfər şalacaq...

GundemXeber.Az