Azərbaycan Respublikasının Daxili İşlər Naziri cənab Vilayət Eyvazova ünvanlanmış açıq məktubun bir surəti də Qazax rayon sakini İsmayıl Qaçayev tərəfindən GundemXeber.Az-ın redaksiyasına daxil olub. Qazax RPŞ-nin rəis müavini Şakir Rüstəmov barəsində daxil olan məktubda irəli sürülən iddiaları olduğu kimi çoxsaylı oxucularımızın diqqətinə təqdim edirik:

"Hörmətli cənab nazir! Yüzlərlə Qazax rayon sakinlərinin adından, sahibkarların adından, Sizdən xahiş edirik ki, Qazax Polis rəisinin müavini Şakir Rüstəmovun iş yerini başqa bir rayona dəyişdirəsiniz. Çünki, Qazaxda ictimai narazılıq get-gedə artır. Vəziyyət olduqca acınacaqlıdır. Əhalidə kütləvi işsizlik. Aclıq və səfalət pik həddindədir. Onsuzda əhalinin dolanışığı məlum səbəblərdən çox aşağıdır. Bir tərəfdən də Şakir Rüstəmovun sahibkarlara və sıravi vətəndaşlara açıq aşkar süni maneələr yaratması, bu naraqzılığı pik həddə çatdırmışdır. Sahibkarlardan açıq-aşkar "haqq" tələb olunur. Obyektlərə "daskı" qoyulur. Cənab Prezident İlham Əliyevin Korrupsiya ilə kəskin mübarizə elan etməsinə baxmayaraq, Şakir Rüstəmov Qazax Polis idarəsinin kamera olmayan yerlərində açıq-aşkar "alver edir". Bizim hamımız çox çətin şəraitdə dolandığımız bir məqamda, kredit, bahaçılıq, və s. belə bir rəis müavinin rayonda istədiyi kimi hərəkət etməsi ictimai narazılıq yaradır. Şakir Rüstəmov heç rayonun İcra Hakimiyyətini də vecinə almır. İstədiyi kimi hərərkət edir. Rayonda söz söhbət gedir ki, Şakir Rüstəmov Naxçıvanlı olduğu üçün, həm də Vilayət Eyvazov cənablarının yaxın silahdaşlarından olduğu üçün heçkimdən çəkinəcəyi yoxdur. Cənab nazir, dolana bilmirik. Vallah çətindir. Kabinetdə oturub zəhmətlə zülmlə pul qazananlara "daskı" qoymağa nə var ki? Bizi Şakir Rüstəmovun əlindən xilas edin! Təcili xilas edin! Canımız boğaza yığılıb. Ya intihar etməliyik, yada ki, qan töküb cinayət törətməliyik.

Nə edək, dərdimizi kimə deyək? Şakir Rüstəmovun ailəsi uşağı olduğu kimi bizim də evdə çörək yemək istəyən gözləyənlərimiz var. Nəylə dolandıraq uşaqları? Necə yaşayaq? Cənab nazir, biz çörəyi nəylə almalıyıq? Bizə bir yol göstərməyinizi xahiş edirik. Hal hazırda 70 nəfərdən imza toplamışıq. İmza toplamağı davam edəcəyik. Bizi Şakir Rüstəmovdan təcili xilas edin. Qazax gənclərini narkomaniya məhv edir. Yaxşı olar ki, Şakir Rüstəmov narkotik maddələrin yığışdırılması işləri ilə məşğul olsun. Hər kəs tanıyır həmin o narkotik satılan qapıları. Əhali müharibədən çıxıb şəhid verib. Belə bir məqamda milli həmrəylik nümayiş etdirmək əvəzinə, əhalinin vəziyyətini nəzərə almaq əvəzinə Şakir müəllim ətrafına qoçulardan ibarət bir qrup yaradıb, gündə bir obyekt basır, fırtına yaradır. Adam tutur. Pul alır. Cənab Nazir Qazaxda ictimai narazılıq artır. Bunun qarşısını yalnız Siz ala bilərsiniz. Növbəti dəfə konkret olaraq, sahibkarların Şakir Rüstəmov barəsində şikayətlərini ünvanlayacağıq. Çox istərdik ki, korrupsiya ocağı olan Qazax polisində əməliyyat keçirəsiniz. Əlimizdə video faktlar var. Şakir Rüstəmova verdiyimiz pullar barəsində. Onların hamısı təqdim olunacaq ictimayyətə.

Hörmətli cənab nazir! Yüzlərlə Qazax rayon sakinlərinin adından Sizdən xahiş edirik, Qazax Polis rəisinin müavini Şakir Rüstəmovun iş yerini başqa bir rayona dəyişdirəsiniz. Biz müraciətlərimizi davam etdirəcəyik. Qazaxda problem həddindən artıq çoxdur. Şikayətimizə baxılmasa fikrimiz var ki, 22 aprel 2021-ci il tarixində saat 12.00 radələrində Təzə Körpü adlanan körpünün üzərində Qazax Gürcüstan magistral yolunu kəsib etraz aksiyası edək. Bizim fikrimiz özümüzü körpüdən atıb intihar etməkdir. Belə yaşamaqdansa, ölmək məsləhətdir."
GundemXeber.Az redaksiyası olaraq, yazıda ittiham olunan rəis müavini Şakir Rüstəmovun da cavab haqqını tanıyırıq.

Gundemxeber.az