Bu ay Tərtər qətliamının törədilməsinə başlanmasının 4 ili tamam olur. Xatırladım ki, həmin qanlı cinayət (həm də xəyanət) haqda bütün bu müddətdə yüzlərlə yazı, müsahibə, hesabatlar və s. dərc olunub.

Odur ki, mövzunun guya Qarabağ Savaşından sonra gündəmə gətirilməsi iddiaları ağ yalandır, böhtandır, manipulyasıyadır və məqsədi də insanları çaşdırmaq, mövzunu gündəmdən çıxarmaqdır. Bütün bu çirkli işdə iştirak edənlər də həmin qanlı cinayətə şərik çıxanlardır, çünki cinayəti gizlətməyin özü də cinayətdir.

Dediyimə sübut kimi şərhdə Azadlıq radiosunun 2017-ci il mayın 9-da yaydığı videomaterialı diqqətinizə çatdırıram.

Bundan başqa, Oqtay Gülalıyev və bir neçə digər hüquq müdafiəçisi bu məsələni daim gündəmdə saxlayıblar ki, buna görə də Oqtay bəy dəfələrlə xəbərdarlıqlar alıb, təhdid olunub. Nəticəsi də bəllidir.

Bu yerdə haşiyə çıxım ki, Oqtay bəyə qarşı törədilən də Tərtər qətliamını gündəmdən çıxarmağa hesablanmış cinayət əməlidir və o da əsaslı şəkildə araşdırılmalıdır. O cümlədən də Oqtay bəyin ətrafına xüsusi məqsədlə yerləşdirilmiş şəxslərin hər biri ciddi araşdırılmalıdır. Belələri də olub...

İstənilən cinayətin araşdırılması onun səbəb və motivlərindən başlamalıdır. Tərtər qətliamına start verən ilk addım 2017-ci il mayın 7-də Azərbaycan Respublikası Baş Prokurorluğunun, Müdafiə Nazirliyinin, Daxili İşlər Nazirliyinin və Dövlət Təhlükəsizliyi Xidmətinin cəbhənin Tərtər istiqamətində baş verən təxribatlarla bağlı yaydığı bəyanat olub. (link şərhdə)

Həmin bəyanatda bu da bildirilir ki, toplanmış materiallar əsasında dövlətə xəyanət və digər faktlar üzrə 2017-ci il 3 may tarixdə Azərbaycan Respublikası Hərbi Prokurorluğunda Cinayət Məcəlləsinin 274-cü maddəsi ilə cinayət işi başlanaraq, Azərbaycan Respublikası Prokurorluğu, MN, DİN və DTX əməkdaşlarından ibarət birgə istintaq-əməliyyat qrupu yaradılıb və ibtidai istintaq aparılır.

Tarixlərlə zərərçəkmişlərin ifadələrində göstərdiyi tarixlər arasında mühüm bir fərq var: kütləvi işgəncələr artıq 2017-ci ilin aprelində başlamışdı və bu bəyanata qədər azı 3 nəfər də qətlə yetirilmişdi. Odur ki, Tərtər qətliamı ilə bağlı yeni istintaq bütün bu qurumların o dövrdəki rəhbərlərinin sorğulanmasından başlanmalıdır.

Belə bir bəyanatın yayılması üçün əldə ciddi əməliyyat məlumatları omalı idi ki, onlar da məlumat mənbələrinin, qeydiyyat tarixlərinin, nömrələrinin, onları tərtib etmiş şəxslərin imzaları əks olunmuş sənədlər şəklində istintaqa təqdim olmalıdır.

Aydınlaşdırılmalı digər bir məqam isə həmin bəyanatın imzalanması və ictimaiyyətin diqqətinə təqdim olunması təklifinin və ya tapşırığın kimin tərəfindən gəlməsidir, çünki məhz bu şeylər cinayətin motivlərinin və səbəblərinin üzə çıxarılmasına xidmət edə bilər.

Məsələ burasındadır ki, mayın 7-də məlum bəyanatı imzalayan prokurorluq, DİN, MN və DTX rəhbərləri artıq törədilmiş cinayətlər haqda məlumatlı olmalı idilər və əgər belədirsə, demək, bəyanatın da məqsədi Azərbaycan Ordusunun hərbçilərinə qarşı törədilmiş həmin qanlı cinayətə bəraət qazandırmaq olub. Bu isə cinayətdir.

Görünür, elə bu səbəbdən də hakimiyyət Tərtər qətliamının araşdırılmasına tələsmir, çünki bu cinayətdə xeyli dövlət və hakimiyyət orqanlarının rəhbərləri birbaşa və ya dolayısı ilə təqsirlidilər. Hətta həmin bəynatadək törədilmiş qətllər və yüzlərlə işgəncə faktı barədə məlumatlı olmamaq məsuliyyətdən azad etmir.

Görünür, elə bu səbəbdən də bizdə olan məlumata görə, həmin bəyanatı yaymış qurumlardan ikisinin rəhbəri yox, onların müavinləri imzalayıblar. Bu faktın özü və onun təsdiqlənəcəyi halda səbəbi də istintaqın predmeti olmalıdır.

Deməli, Tərtər qətliamı da yalnız ciddi ictimai təpki olduğu halda araşdırılacaq. Belə istək hakimiyyət tərəfdən hələ görünmür. Əks halda həm zərərçəkmişlərin, həm də mövzunu gündəmdə saxlayanların ünvanına böhtan yazdırmağa ehtiyac olmazdı. Amma bunun da öz xeyri var. Ən azı kimin kim olduğu üzə çıxacaq və artıq çıxır da.

Mən də öz növbəmdə mövzunu davam etdirəcəyəm, çünki:
1. Xalq onun dövlətinə, ordusuna xəyanət edən düşmənləri tanımalıdır;
2. Cinayətkarların yeri yüksək dövlət kabinetləri yox, həbsxana kameraları olmalıdır.

Ərəstun Oruclu
Hüquq Müdafiəçisi