Müvafiq həkim-tibb komissiyalarının törətdiyi cinayətlə bağlı ölkənin tanınmış partiya sədri Əli Kərimli sərt reaksiya verib. AXCP sədri bildirib ki, "Bu igid qazimizin sonrakı taleyindən xəbəriniz oldu, yoxsa onun etiraz çıxışını paylaşmaqla hamımız işimizi bitmiş saydıq? Bu igid qazimiz - Sahil Həsənli ölkədə yaxşı tanınır. Savaşda qolunu və gözünü itirmiş bu igidimizin Şuşanın azad edildiyi gün hospitalın pəncərəsindən boylanan xoşbəxt çöhrəsi hərbi zəfərimizin simvollarından biri olmuşdu. Sahil bəy o qədər vətənpərvər oğuldur ki, 3 körpəsini kirayədə qaldığı evdə qoyub, Vətənin müdafiəsinə yollanmışdı. Sahil bəy o qədər vətənpərvərdir ki, Şuşanın azad edilməsi xəbəri ona qolunu və gözünü itirməsini, çoxsaylı başqa xəsarətlərini də unutdurmuşdu. Dünyanın ən xoşbəxt insanı kimi Vətənin uğuruna sevinirdi. "Vətən sənə canım fəda!" təfəkkürü ilə özünü və dərdlərini unutmuşdu.
Aradan aylar keçdi. Məlum oldu ki, Vətəni idarə edənlərin pula ehtiyacı var. Lukaşenkolara yardım üçün, "Formula1"lər üçün, ofşorlara daşımaq üçün pul lazımdır. Ona görə də vətənpərvərlik simvolu olan bu igidimizə yalnız 2-ci qrup əlillik təyin ediblər ki, az müavinət verilsin.
Biz bu ədalətsizliyə susmamalıyıq. Hökumətə sual verməliyik ki, bədənində salamat yeri olmayan, gözünü və qolunu itirmiş qazi 2-ci qrup hesab olunursa, bəs 1-ci qrup əlillik kimə verilir?
Biz bundan əvvəl də çoxsaylı qazilərimizin əlillik dərəcəsi almasında üzləşdiyi dəhşətli haqsızlıqların şahidi olmuşuq. Hamımızın tanıdığımız, vətənpərvərlik simvolu olan Sahil bəyin başına gələn haqsızlıq bir SOS siqnalı olmalı, hamımızı qəflət quxusundan ayıltmalıdır. Ortada bir cinayət var. Rejimin tapşırığı ilə müvafiq həkim-tibb komissiyaları qazilərimizin haqqına girməklə cinayət törədir. Bu haqsızlıqlara imkan verən əlillik normativləri də dəyişməlidir.
Məsələnin unudulmasına, gündəmdən çıxmasına imkan verməməliyik. Qazilərimiz haqq etdikləri əlillik dərəcəsini almalıdır. Şəhid ailələrinin, qazilərin, veteranların müavinəti isə artırılmalıdır."

GundemXeber.Az