Şəhid atasından “hüquqmüəyyənedici” sənəd tələb edilir

Şuşa şəhidi Roman Pənahovun atası Sərkər Pənahovun marağına toxunan Şəki İnzibati Məhkəməsinin hakimi İlqar Cabbarovun 24.02.2021-ci il tarixli 2-1 (116)-103/2021 saylı qərarı üzrə 3-cü şəxs qismində işə cəlb edilməsi barədə vəsatətinə hələ də baxılmayıb. Ərizəçini 59 ildir yaşadığı Gürcüvan (indiki Xanbulaq) bələdiyyəsinin Yenilik kəndi ərazisində yerləşən və 15 ildən çoxdur iş ortağı Firuz Maarif oğlu ilə birlikdə kənd təsərrüfatı məqsədilə yararlandığı torpaq sahəsindən Xanbulaq bələdiyyəsinin sədrinin “teleqramı əsasında” məhrum edən Şəki İnzibati Məhkəməsi ondan imza və hüquqmüəyyənedici sənəd tələb edir. Bu isə açıq şəkildə məhkəmənin tərəflərin hüquq bərabərliyini pozmasını, ayrı-seçkilik etməsini ortaya qoyur. Bəyəm teleqramda imza olur ki, “teleqram əsasında” fermer torpağından məhrum edilib? Eyni zamanda, şəhid atası həm elektron qaydada, həm də imzaladığı məktubla 3-cü şəxs qismində işə cəlb edilməsi üçün vəsatətlə məhkəməyə müraciət edib.



O ki qaldı, torpaqdan istifadəyə dair hüquqmüəyyənedici sənədə , əvvəla, bələdiyyə yeni icarə müqaviləsi bağlasaydı, daha məhkəməyə müraciət etməyə nə ehtiyac olardı? İkincisi, şəhid atasının 59 ildir sözügedən bələdiyyənin ərazisində yaşamasını məhkəməyə təqdim etdiyi şəxsiyyət vəsiqəsi sübut edir ki, bu da ən əsas hüquqmüəyyənedici sənəd sayılır. Konstitusiyaya görə, istənilən şəxsin icarəsinə, mülkiyyətinə torpaq sahəsi götürmək hüququ var. Onda qala bələdiyyə ərazisində yaşayan ŞƏHİD ATASI OLA! Yəni, Şəki İnzibati Məhkəməsinin şəhid atasından qeyri-müəyyən hüquqmüəyyənedici sənəd tələb etməsinin özü qanunsuzdur. İddiası torpaq sahəsiniın örüş olması haqqında cavabdehin saxta teleqramı əsasında təmin edilməyən Firuz Maarif oğlu ilə Sərkər Pənahovun birlikdə arı, mal-qara saxlamalarının da sübuta ehtiyacı yoxdur. Yəni, ortaq mal-heyvan saxlayan kəndlilər bir-birinə hüquqmüəyyənedici sənəd verməlidir?



Xatırladaq ki, Sərkər Pənahovun oğlu Roman Qarabağ Vətən Müharibəsində 4 noyabr 2020-ci ildə Şuşa uğrunda Daşaltıda şəhid olub. Firuz Bədəlov onun arxasınca yollanıb və Daşaltıda(n) tapıb . İgidi Ağsuda torpağa tapşıranda şəhid atasına verilən Azərbaycan Bayrağını Sərkər Pənahov iş-döyüş dostu Firuz Bədəlova verilməsini istəyib və belə də edilib. Bunu şəhidin torpağa tapşırılması mərasimində iştirak edən Ağsu RİH-in, bələdiyyənin nümayəndələri də təsdiqləyə bilər. Başqa sözlə, Şuşa şəhidinin doğma yurdunda torpaq hüququ qanunla qorunur. Qalır bu hüququn məhkəmə yolu ilə tanınması.
TORPAĞIN TƏKCƏ ALTI ŞƏHİDİN DEYİL Kİ! Şairin şəhid adından dediyi kimi, ALTINDA YATARKƏN DƏ BİZİMDİR YERİN ÜSTÜ!

M. Ağsu