ƏƏSM nazirliyinin Respublika Tibbi Sosial Ekspertiza Mərkəzi tərəfindən əlil və ya sağlamlıq imkanlarının məhdudluğunun müəyyən edilməsi ilə bağlı respublika üzrə bütün rayonlarda nazazılıqlar var.

Pisi də odur ki, bu narazılıqlar artmaqda davam edir. Məsələn, Ağstafa rayonundan onlarla həqiqi əlillik dərəcəsi olan şəxslərin qrupunun ləğv edilməsi, ağır dərəcəli boyun yırtığı, şəkər,insult, zob, sağalmaz revmatizma xəstələrinin 6 aydan çoxdur ki, əlillik dərəcəsinin təsdiq edilməməsi, onlara əlavə müalicəyə ehtiyacları olmasına (stasionar) dair arayışların Respublika Tibbi Sosial Ekspertiza Mərkəzi tərəfindən göndərilməsi ciddi narazılıqlarla müşayiət olunur.

Əslində insanlar da bilir ki, nazirlik rəsmiləri “ötür-ötür oyunu oynamaqla” insanların kütləvi şəkildə narazı qalmalarının qarşısını alır. Kütləvi yox, tədricən əlillik qrupunu ləğv etməklə hökumət və nazirə yönələn etirazların kütləviliyini azaltmış olurlar.

Bunu hara qədər edəcəklər o sonrakı məsələdi. Amma bir neçə xəstəliyi olan bu həssas qrupa qarşı hazırkı münasibət bir hadisəni xatırladır. Sabiq nazir Səlim Müslümov da təqaüd yaşını qaldırmaqla minlərlə vətəndaşı pensiya almaqdan kənarda saxlamışdı. Əhalinin artan qəzəbini Səlim Müslümovun adının qabağına “sabiq” yazılması tənzimlədi.

Gündəlik yaşayış tərzini təmin etməli olan, xəstəlik səbəbindən dərman qəbuluna ehtiyac duyulan bir çox əlillər isə çıxılmaz durumdadırlar. Hər halda düşünməyə dəyər.../Faktinfo.az/