Hər kəsə məlumdur ki, aşıq sənəti ilə məşğul olan şəxslər sırasında Aşıq Namiq Fərhadoğlunun (Namiq Hüseynov) adı daha çox qalmaqallarda hallanan sənət adamı hesab olunur. Qeyd edək ki, bir müddət bundan öncə bir çox media qurumlarında, əksər sosial şəbəkə istifadəçilərinin facebook səhifələrində və s, bu şəxsin qadına qarşı seksual zorakılıq etməsi ilə bağlı yayılmış səs yazısı geniş müzakirələrə səbəb olmuşdur. Unutmaq olmaz ki, ictimai arenada az-çox tanınan Aşıq Namiq Fərhadoğlunun belə bir addımı çox keçmədi ki, geniş ictimaiyyətin qəzəbi ilə qarşılandı və tam əksəriyyət bu şəxsə qarşı kəskin mövqeyini də ortaya qoydu. Belə bir yanaşma ona görə baş verdi ki, mediaya verdiyi müsahibələrinin birində “Dünən sənətə gəlib sinəsinə döyənlərdən deyiləm. Uşaq yaşlarımdan səhnədəyəm. Ona görə də dilim də, dilçəyim də var” deyən Aşıq Namiq Fərhadoğlunun, özünün çirkin addımına öz düşüncəsindən haqq qazandırmağa çalışması oldu.

 Yayılmış səs yazısında qadının ona “Bura uşağım üçün gəlmişəm. Burax məni, ürəyimdə problem var, burax”, bu şəxsin isə ona “Səndən xoşum gəlir, özünü ələ al” deməsi, əslində aşıq sənətini “yaşadan” bu şəxsin efir mədəniyyətinin göstəricisi oldu. Bəlkə də həmin vaxtlarda hər kəs düşünürdü ki, belə bir qalmaqallı olayla gündəmdə qalan bu şəxs, bundan sonra “özünə yığşırılacaq”, necə deyərlər atdığı hər addımı yüz ölçüb bir biçəcək. Təəssüflər olsun ki, bu heç də belə olmadı. Çünki, bir-iki gün bundan öncə Aşıq Namiq Fərhadoğlu özünün facebook səhifəsində hansısa restoranda süfrə arxasında əyləşməsini, süfrənin üstündə bahalı balıq və digər yemək növlərinin, həmçinin bahalı sprirtli (viski) içkilərin olması ilə bağlı paylaşım edib. Əslində belə bir paylaşımı etmək onun Konstitusion hüququdur və bu heç də ona qadağan olunmur. Amma, məsələnin həm mənəvi, həm də əxlaqi tərəfi var. Yəni, bu gün bir çox həyətlərdə, mərasim evlərində 44 günlük müharibədə şəhid olanların il mərasimləri keçirilir, Qəhrəmanlarımızın xatirələri yada salınır, ruhlarına dualar oxunur. Bir sözlə, şəhidlərimizin axan qanlarının tam qurumadığı bir vaxtda, yuxarıda qeyd etdiyimiz kimi ictimai arenada az-çox tanınan Aşıq Namiq Fərhadoğlunun belə bir paylaşım etməsi heç də yolverilməz haldır. Ona görə ki, özünü daim “Mən dağlaroğluyam, saf əqidəli, saf amallıyam” deyə təqdim və təbliğ edən bu şəxsin bir sənət adamı olaraq etdiyi paylaşım, yəqin ki, kimlərdəsə, ələlxüsus şəhid analarında, şəhidlərin digər əzizlərində hansısa formada qıcıq yaradır, nifrət hissi oyadır. Yəni, bizim qənaətimiz belədir. Çünki, digər sahələrdə çalışanlarla bərabər, müasir aşıq sənətimizi yaşadan hər kəs də, məhz belə anlarda həssas və diqqətcil olmalıdır. Unutmayaq ki, şifahi xalq ədəbiyyatımızın bir qolu olan aşıq sənəti yarandığı tarixi dönəmlərdən indiyə kimi ustad aşıqlarımız həm davranışığı, həm danışığı, həm də digər göstəriciləri ilə ətrafa nümunə olublar. Necə deyərlər, məclislərdə əxlaq dərsi keçiblər, bu sahəni yaşadıblar, aşıq sənətinin müqəddəsliyini təbliğ etməyə çalışıblar. Bu belə olmalı olduğu halda, Aşıq Namiq Fərhadoğlunun ortaya qoyduğu nümunə də budur!. Bu cür əməl və amal sahibi olanların atdıqları addımların nəticəsidir ki, “LİDER” televiziyasının fəaliyyətinə son qoyuldu. Çünki, “LİDER” kanalında belə şəxslər, o cümlədən Aşıq Namiq Fərhadoğlu layihə həyata keçirirdi, kimlərinsə birincilər sırasına çıxmaları üçün külli miqdarda pullarını ələ keçirirdi, saatlarla televiziyanın efir məkanını zəbt edirdilər. Unutmayaq ki, təkcə bu şəxs deyil, bu gün bəzi televiziya kanallarında da şəhid qanı qurumamış yüngül əxlaqlı qadın müğənnilərin konsert proqramları verilir, şəhid ruhuna hörmətsizliklər olunur. Əslində, belə bir şəxsləri televiziya məkanına buraxmağın özü bir cinayətdir. Çünki, əxlaqi-mənəvi dəyərlərimizi tapdaqlar altına atan belə şəxslərdən, kim hansı nümunəni götürə bilər? Odur ki, həm diqqətcil, həm də ayıq olmalıyıq ki, bu cür sənət adamlarının sənətdən biryolluq “çıxdaş olmalarına” nail ola bilək.

GundemXeber.az