Baş prokuror yanında korrupsiyaya qarşı mübarizə baş idarəsinin rəisi kimin yanındadır? 

Azərbaycan Respublikasının baş prokurorluğunun hüquqi statusu Konstitusiyanın 133-cü maddəsində qanunların icrasına və tətbiqinə nəzarət edən , qanunla nəzərdə tutulmuş hallarda cinayət işi başlayan və istintaq aparan, məhkəmədə dövlət ittihamını müdafiə edən, iddia qaldıran, məhkəmə qərarlarından protest verən orqan kimi  doğrulanıb . Fəaliyyətinin əsas prinsiplərini qanunçuluq, hər kəsin qanun qarşısında hüquq  bərabərliyi, hüquq və azadlıqlara hörmət, obyektivlik, qərəzsizlik ,  faktlara əsaslanma təşkil edən prokurorluğun üzərinə Azərbaycan Respublikasının Konstitusiyasında, prosessual qanunvericilikdə nəzərdə tutulmamış vəzifələrin qoyulmasını “Prokurorluq haqqında” qanun qadağan edir. Di gəl, qanun qanundur, əməl edən olsa. ..

Baş prokuror yanında korrupsiyaya qarşı mübarizə baş idarəsinin, adından göründüyü kimi, başlıca işi korrupsiyaya qarşı mübarizə aparmaqdır. Mübarizənin effektivliyinin artırılması üçün 2011-ci ilin martından 161 qaynar xətti fəaliyyətə başlayıb. Bu qaynar xətt isə, gerçəkdə “soyuq duş” yetkisi bağışlayır. Təsəvvür edin, qaynar xətt əlaqə mərkəzinə 5 saat ərzində fasiləsiz zəng edirsən, götürən olmur. Qaynar stasionar nömrələr də eləcə susur. 961 Çağrı Mərkəzi isə pullu xidmət göstərir. Belədə, kasıbın korrupsiyadan qorunmaq çabasının sonucsuz qalacağı şübhə doğurmur. 

Bu sətirlərin yazarının 21.10.2021-ci ildə 161 qaynar xəttinə və 961 Çağrı Mərkəzinə şikayətlərini qəbul edən olmasa da, hesabından 3 manata yaxın vəsait silinib. Növbəti gün baş prokuror yanında korrupsiyaya qarşı mübarizə baş idarəsinin növbətçi prokuroru zəng edib şikayətçini çağırıb və şikayəti qəbul edib. Elə həmin gün -22 oktyabr 2021-ci ildə 161 qaynar xətti də şikayəti , necə lazımdır,  yerli-yataqlı qeydə alıb. Həmin gün idarədən bir neçə dəfə zəng edib ilk dəfə neçənci ildə 161-ə zəng edildiyini, Prezident Administrasiyasından zəng edib ünvanı dəqiqləşdiriblər. Dİ gəl, 2 ay keçməsinə,  yenidən iki dəfə 161 qaynar xəttinin şikayəti qeydə almasına baxmayaraq, hələ də 1-ci dərəcəli Qarabağ qazisinə Xətai məhkəməsinin 151 ay və 126 ay ay qabaq 2 qətnaməsi ilə verilən Nizami rayonu, Bəhruz Nuriyev -10-dakı qeyri-yaşayış otaqlarının məmur -oliqarxlar tərəfindən işğalına son qoyulmayıb. Görünür, “Prokurorluq haqqında” qanuna qarşı çıxılaraq, baş prokuror yanında korrupsiyaya qarşı mübarizə baş idarəsinə Konstitusiyada nəzərdə tutulmayan “cinayətə susmaq” vəzifəsi qoyulub. Yoxsa, idarə niyə vəzifəsini icra etməsin? Qarabağ qazilərinin 3 dekabr – Beynəlxalq Əlillər günündə və 10 dekabr – Ümumdünya insan hüquqları günündə 10 nəfərlik qazinin iştirakı ilə məhkəmə qərarı ilə otaqlara girməyinə də BŞİH qadağa qoyub. (?) .Olduqca absurd durum yaranıb, Üzeyir bəyin dünyaca məşhur personajının dediyi kimi, OTAQLARIN HALALCA YİYƏSİ, ƏLİNDƏ MƏHKƏMƏ QƏRARI İLƏ QAPI ARXASINDA QALIB, HANSISA MƏMUR-OLİQARX QAZİNİN ƏMLAKINI İŞĞAL EDİB. Borcluların Nizami RİH, ƏMDK, Ədliyyə Nazirliyinin Xətai və Nizami icra şöbələri olması prokurorluğa qanunsuz basqı yapanların Nizami RİH -in keçmiş başçıları Tahir Budaqov və Arif Qasımov, 1-ci müavin Qərib Məmmədov,  Nizami RİH MKTB-nin keçmiş sədri, hazırda 1 saylı ərazi nümayəndəliyinin başçısı, Tahir Budaqovun bacanağı Həsən Sadıxov,  ƏMDX-nın müavinlər Rüstəm Şahbazov, Elçin Yusubov, Daşınmaz Əmlakın Dövlət Reyestri Xidmətinin keçmiş rəhbərliyi, Bakı ərazi idarəsinin rəisi E. Səmədov, Ədliyyə Nazirliyinin 30 saylı notariat kontorunun müdiri Əli Əliyev, notarius H . Məmmədov, Nizami və Xətai icra şöbələrinin rəhbərliyi, icra məmuru Mehdi Zeynalov, Nizami və Xətai prokurorluğu, Nizami polisinin, 24 PB-nin rəhbərliyi və sahə müvəkkili Elçin İslamov olmasını zənn etməyə əsas verir. Baş prokurorluq və yanındakı korrupsiyaya qarşı mübarizə baş idarəsi korrupsiyaya uğrayan məmurların diqtəsi ilə oturub -duracaqsa, hansı mübarizədən danışmaq olar? Belədə mübarizənin bircə yolu qalır : Korrupsionerlərə qarşı qazilərin yürüşü! 24 dekabr- Prezidentin ad günündə Qarabağ qaziləri Nizami RİH -in qarşısından B. Nuriyev -10-dakı otaqlara 10 nəfərlik yürüş keçirməyi qərara alıblar. 

Korrupsiyaya qarşı mübarizə baş idarəsinin rəisindən isə soruşmağın tam vaxtıdır :”Nə oldu, rəis alınmadı, yoxsa “barıt elə bir atımlıq imiş” ? 

Məğrur Bədəlsoy