Yəqin ki, Xaçmaz rayonunun Düztahiroba kənd ibtidai məktəbində yaşanan biabırçılıqları ölkəmizin təhsil sahəsinin üzqarası hesab etsək, heç də yanılmarıq. Buna əsas səbəb, bu ibtidai məktəbdə xadimə vəzifəsində çalışan 31 yaşlı Ağabalayeva Sultanağa Əbülfət qızının üz-üzə qaldığı macəraların varlığıdır. Belə ki,  Sultanağa Ağabalayeva tərəfindən GundemXeber.az saytının redaksiyasına göndərilən şikayət ərizəsində müəyyən məqamlara toxunulur və bu təhsil müəssisəsində direktor vəzifəsini daşıyan Tərlan Qurbanovun hansı əməl sahibi olduğu hər kəsə də çatdırılır. Yəni, şikayətçi xanım ərizəsində yazır ki, “Mən 2013-cü ildən Düztahiroba kənd ibtidai məktəbində xadimə işləyirəm və ötən illər ərzində hər zaman işimin öhdəsindən layiqincə gəlməyi bacarmışam. Son vaxtlar direktor Tərlan Qurbanov söz ataraq, mənə qarşı müəyyən təkliflərə yol verir, xoşagəlməz addımlarını atır. Məsələn, hallar olur ki, qapını döyüb direktorun olduğu sinifə daxil oluram, o halda o, “Sən mənə baxmağa gəlmisən” deyir. Hətta, Tərlan Qurbanov iki dəfə mənə “Gəl belimi ovuşdur” deyib və daha sonra “Çəkim nə qədər olar?” deyə, mənə sual da verib. Ötən günlərin birində o, mənə “Sənin niyə mobil telefonun yoxdur, zəng edəndə mənə cavab verəsən. Yoxdursa, razı ol sənə telefon alım. Əgər mənim dediyimi etməsən, o halda səni işdən çıxardacağam” deyib, məni işdən çıxaracağı ilə hədələyir. Düzdür, həmin vaxtlarda Tərlan Qurbanovun əməlləri ilə bağlı həyat yoldaşıma nəsə demədim. Çünki, fikirləşdim ki, kənd yeridir, hər şey ötüb keçər. Mən belə düşünsəm də, direktor vəzifəsini daşıyan bu şəxs isə günü-gündən həddini aşmağa başladı. Son anda ehtiyat etdim və baş verənlərin hamısını həyat yoldaşıma dəqiqliklə danışdım. Həyat yoldaşım Tərlan Qurbanovun əməlləri ilə bağlı polisə müraciət etsə də, polis əməkdaşları məni günahkar çıxartdılar və şikayət ərizəsini geri götürməyimi qəti şəkildə tələb etdilər. Düztahiroba kənd ibtidai məktəbi direktorunun əməlləri ilə bağlı Xaçmaz Rayon Təhsil Şöbəsinə də müraciət etsək, təəssüflər olsun ki, Tərlan Qurbanovla bağlı bir kimsə hansısa tədbiri görmədi”.

   Bəli, bütün bunlar onu sübut edir ki, gözdən uzaq, könüldən qıraq ərazidə yerləşən Düztahiroba kənd ibtidai məktəbində Tərlan Qurbanov, bu gün özünü “firon” qismində görür və düşündüyü hər cür addımını atmağa da qərar verir. O halda sual oluna bilər ki, görəsən direktor vəzifəsini daşıyan bu şəxsin atdığı addımlardan cənab Nazirin məlumatı varmı? Yoxdursa, şikayətçi Sultanağa Ağabalayevanın bildirdiklərini vaxt tapdıqca nəzərdən keçirsin və belə bir əməlin sahibi olan Tərlan Qurbanovun Azərbaycanın təhsil sistemində çalışıb-çalışmaması məsələsinə özü qərar versin. Bu yöndə apardığımız araşdırmalar zamanı o da məlum oldu ki, Düztahiroba kənd icra nümayəndəsi də bu məsələdə maraqlı tərəf olur və o da, Sultanağa Ağabalayevadan şikayət ərizəsini geri götürməyi tələb edir. Onu da qeyd etmək yerinə düşər ki, son vaxtlar əksər media qurumlarında, sosial şəbəkələrdə və s. təhsil müəssisələrində yaşanan biabırçılıqlarla bağlı yazılar, müəyyən video-çəkilişlər yayımlanır. Düztahiroba kənd ibtidai məktəbinin direktoru bu cür əməllərə qol qoyursa, deməli məktəbli şagirdlərin atdıqları addımlara adi baxmaq gərəkdir. Qarşı tərəfi də dinləyə bilərik.

 GundemXeber.az

Qarşı tərəf:

  Düztahiroba kənd ibtidai məktəbində baş verənlərlə bağlı direktor Tərlan Qurbanovdan (01 fevral 2022-ci il tarixdə, saat 12:45-də) məsələlərə münasibət bildirməsini xahiş etdikdə o, “Bilirsiniz, danışılanlar şər-böhtandır. Qeyd olunanlarla bağlı Xaçmaz polisinə müraciət olunub, iş polisdədir. Sultanağa Ağabalayeva xadimə olsa da, o, səhər saatlarında işə gəlmir, yalnız günorta saatlarından sonra məktəbə gəlib təmizlik işlərini həyata keçirir. Sultanağanın günahı yoxdur, bütün işləri qarışdıran onun qayınanasıdır” deməklə kifayətləndi. Düşündürücü hal odur ki, direktor bu kimi işlərdə xadimənin qayınanasını bu və ya digər formada ittiham etsə də, redaksiyamıza şikayət ərizəsi konkret olaraq Sultanağa Ağabalayevanın tərəfindən daxil olub.

  Bu yöndə araşdırmalarımızı davam etdirəcəyik.

Gundemxeber.az